Jueces 18:1-31
18 Tiempo saá kǒo na̱ rey níxi̱yo chí ñuu Israel. Ta na̱ tribu ta̱ Dan ni̱xi̱kana xi̱ndukúna iin lugar nu̱ú koona, saáchi ta̱ʼán ndakiʼinna ñuʼú táʼan ña̱ nda̱kiʼin ndiʼika na̱ tribu na̱ ñuu Israel.
2 Na̱ tribu ta̱ Dan chi̱ndaʼána u̱ʼu̱n na̱ ta̱a na̱ tribu kán na̱ xíni̱va̱ʼa, na̱ ke̱e chí Zorá xíʼin Estaol ña̱ va̱ʼa ku̱ʼu̱nna kotona̱nína* ñuʼú kán ta kotona ndáa ki̱ʼva íyoña. Ta ni̱ka̱ʼa̱nna xíʼinna: “Ku̱a̱ʼa̱nndó kotona̱níndó ñuʼú yóʼo”. Tá ni̱xa̱a̱na chí yuku̱ nu̱ú íyo ñuʼú ña̱ kúú kuenta na̱ tribu ta̱ Efraín, chí veʼe ta̱ Miqueas, kán ki̱ndoona ni̱ki̱si̱na.
3 Tá ndóona yatin veʼe ta̱ Miqueas nda̱kunina tu̱ʼun ta̱ loʼo levita kán, ña̱kán ni̱xa̱ʼa̱nna nu̱úra ta ni̱nda̱ka̱tu̱ʼunnara: “¿Ndáana ki̱xaún xíʼin yóʼo? ¿Ndáaña kéʼún lugar yóʼo? ¿Ndáa xa̱ʼa̱ kúú ña̱ ki̱ndoún íyoún yóʼo?”.
4 Tasaá ta̱ loʼo yóʼo na̱túʼunra xíʼinna ña̱ ke̱ʼé ta̱ Miqueas xa̱ʼa̱ra ta ni̱ka̱ʼa̱nra: “Ta̱xira chiñu ndaʼíi̱ ña̱ koi̱ su̱tu̱ nu̱úra”.
5 Tasaá ni̱ka̱ʼa̱nna xíʼinra: “Ixaún ña̱ ma̱ní, nda̱ka̱tu̱ʼun Ndióxi̱ á va̱ʼa loʼo keendi̱ nu̱ú ku̱a̱ʼa̱nndi̱ yóʼo”.
6 Ta ta̱ su̱tu̱ yóʼo ni̱ka̱ʼa̱nra xíʼinna: “Kúáʼanndó ta kǒo kundi̱ʼi-inindó chi Jehová chindeétáʼanvara xíʼinndó nu̱ú ku̱ʼu̱nndó”.
7 Ta u̱ʼu̱n saá na̱ ta̱a yóʼo nda̱kiʼinna ku̱a̱ʼa̱nna ta ni̱xa̱a̱na chí Lais. Ta ki̱ʼinna kuenta ña̱ na̱ yiví na̱ ndóo kán va̱ása ndáa-inina nda̱a̱ ni iin na̱ yiví, nda̱a̱ táki̱ʼva kéʼé na̱ sidonio. Viíní xi̱ndoona ta kǒo ña̱ níxi̱sandíʼi̱-inina. Ta kǒo ni iin na̱ chíñu na̱ níxikuni̱ ndakiʼin ñuʼúna á ña̱ ixandi̱va̱ʼana xíʼinna. Xíká xi̱ndoona nu̱ú na̱ sidonio ta kǒo níxi̱kitáʼanna xíʼin inkaka ñuu.
8 Tá ndi̱kóna chí nu̱ú ndóo na̱ táʼanna chí Zorá xíʼin Estaol, na̱yóʼo ni̱nda̱ka̱tu̱ʼunnana: “¿Á va̱ʼa loʼo ni̱xa̱ʼa̱nndó?”.
9 Ta na̱yóʼo nda̱kuiinna: “Ná ku̱ʼu̱nyó kanitáʼanyó xíʼin na̱ yiví kán, chi xi̱nindi̱ ña̱ va̱ʼaní ñuʼúna. ¿Nda̱chun xíka-inindó? Kama koondó, kúáʼanndó ta ndakiʼinndóña.
10 Tá ná xa̱a̱ndó kán, kiʼinndó kuenta ña̱ kǒo nda̱a̱ ni iin ña̱ ndíʼi̱-ini na̱ yiví kán xa̱ʼa̱ ta ndíka̱ní ñuʼúna. Ndióxi̱ xa̱a̱ nda̱taxivara iin ñuʼú ndaʼa̱ndó ta kǒo nda̱a̱ ni iin ña̱ʼa kúma̱ní nu̱úña”.
11 Tasaá 600 na̱ ta̱a na̱ tribu ta̱ Dan ke̱ena chí Zorá xíʼin Estaol. Ta xa̱a̱ íyo tu̱ʼvana ña̱ ku̱ʼu̱nna kanitáʼanna xíʼin na̱ ndóo kán.
12 Tasaá ni̱xa̱ʼa̱nna chí Judá ta xi̱kundoona yatin chí Quiryat-Jearim. Xa̱ʼa̱ ña̱kán lugar ña̱ kíndo̱o yatin chí Quiryat-Jearim naníña Mahané-Dan* nda̱a̱ tiempo vitin.
13 Ta kán ke̱ena ta nda̱kiʼinna ku̱a̱ʼa̱nna chí yuku̱ nu̱ú ni̱xi̱yo ñuʼú na̱ tribu ta̱ Efraín ta ni̱xa̱a̱na veʼe ta̱ Miqueas.
14 Ta u̱ʼu̱n saá na̱ ta̱a na̱ ni̱xa̱ʼa̱n xi̱tona̱ní ñuʼú ña̱ ni̱xi̱yo chí Lais ni̱ka̱ʼa̱nna xíʼin táʼanna: “¿Á xa̱a̱ kúnda̱a̱-inindó ña̱ ini veʼe yóʼo íyo iin efod,* terafim* ta saátu u̱vi̱ ña̱ʼa ña̱ plata ña̱ ndásakáʼnuna? Ndaka̱xinndó ndáaña keʼéndó”.
15 Tasaá xi̱kundatuna kán ta u̱ʼu̱n saá na̱ ta̱a yóʼo ni̱xa̱ʼa̱nna veʼe ta̱ loʼo levita ña̱ ni̱xi̱yo yatin síi̱n* veʼe ta̱ Miqueas, ta ni̱nda̱ka̱tu̱ʼunnara á íyo va̱ʼara.
16 Ta 600 saá na̱ ta̱a na̱ tribu ta̱ Dan na̱ xa̱a̱ íyo tu̱ʼva ña̱ kanitáʼanna ki̱ndoona ndátuna chí yéʼé.
17 Ta u̱ʼu̱n saá na̱ ta̱a na̱ ni̱xa̱ʼa̱n xi̱tona̱ní ñuʼú kán ni̱ki̱ʼvina ta nda̱kiʼinna efod, terafim ta saátu u̱vi̱ saá ña̱ʼa ña̱ plata ña̱ ndásakáʼnuna (ta̱ su̱tu̱ xi̱ndichira chí yéʼé xíʼin 600 saá na̱ ta̱a na̱ xa̱a̱ íyo tu̱ʼva kanitáʼan).
18 Ta ni̱ki̱ʼvina ta nda̱kiʼinna efod, terafim ta saátu u̱vi̱ saá ña̱ʼa ña̱ plata ña̱ ndásakáʼnuna ku̱a̱ʼa̱n xíʼinna ta ta̱ su̱tu̱ kán ni̱nda̱ka̱tu̱ʼunrana: “¿Nda̱chun kéʼéndó saá?”.
19 Ta na̱kán nda̱kuiinna: “Kasi yuʼún, va̱ása ka̱ʼún. Ná ku̱ʼu̱nyó xíʼinndi̱ ña̱ va̱ʼa koún ta̱ taxi consejo ndaʼa̱ndi̱ ta saátu ña̱ koún su̱tu̱ nu̱úndi̱. ¿Ndáaña kúú ña̱ va̱ʼaka, ña̱ koún su̱tu̱ nu̱ú iin kuití ta̱a xíʼin na̱ veʼera, á ña̱ koʼún su̱tu̱ nu̱ú iníí na̱ tribu na̱ ñuu Israel xíʼin na̱ veʼena?”.
20 Ta ta̱ su̱tu̱ ku̱tóovara ña̱ ni̱ka̱ʼa̱nna xíʼinra. Ña̱kán tándi̱ʼi nda̱kiʼinna efod, terafim ta saátu u̱vi̱ saá ña̱ʼa ña̱ plata ña̱ ndásakáʼnuna, nda̱kiʼinra ku̱a̱ʼa̱nra xíʼinna.
21 Tasaá nda̱kiʼinna ku̱a̱ʼa̱nna, ta chí nu̱ú ku̱a̱ʼa̱n na̱ va̱lí se̱ʼena xíʼin kití sa̱na̱na ta saátu ña̱ʼa ña̱ ndáyáʼvi ña̱ kúúmiína.
22 Tá xa̱a̱ ku̱xíká na̱ tribu ta̱ Dan chí nu̱ú níndichi veʼe ta̱ Miqueas, saá ku̱ndaa̱-ini na̱ ndóo yatin xíʼinra xa̱ʼa̱ ña̱yóʼo ta nda̱kutáʼanna ta ke̱ena ku̱a̱ʼa̱nna sa̱tána, nda̱a̱ tá nda̱kutáʼanna xíʼinna.
23 Tá ndeéní ni̱ka̱ʼa̱nna xíʼin na̱ tribu ta̱ Dan, saá nda̱kotona chí sa̱tá ta ni̱nda̱ka̱tu̱ʼunna ta̱ Miqueas: “¿Ndáaña ndóʼún? ¿Nda̱chun sa̱ndátakaún ndiʼi na̱ yiví yóʼo?”.
24 Tasaá nda̱kuiinra yuʼúna: “Ndóʼó i̱xakuíʼnándó ndióxi̱ ña̱ i̱xava̱ʼi̱ ta nda̱kiʼinndó ta̱ kúú su̱tu̱ nu̱úi̱. Kǒoka ña̱ʼa kúúmiíi̱ vitin. Ña̱kán, ¿nda̱chun ndáka̱tu̱ʼunkandó yi̱ʼi̱ ndáaña ndóʼi̱?”.
25 Ta na̱ tribu ta̱ Dan nda̱kuiinna yuʼúra: “Kuenta koún xíʼin ki̱ʼva ña̱ káʼún xíʼinndi̱, chi sava na̱ ta̱a yóʼo na̱ xa̱a̱ sáa̱ kúúna ta kivi kaʼnína yóʼó ta saátu na̱ veʼún”.
26 Tasaá nda̱kundeé na̱ tribu ta̱ Dan ku̱a̱ʼa̱nna. Tá xi̱ni ta̱ Miqueas ña̱ ndakúka na̱yóʼo nu̱úra, ndi̱kóra chí veʼera.
27 Tá xa̱a̱ nda̱kiʼinna ndióxi̱ ña̱ i̱xava̱ʼa ta̱ Miqueas ta saátu ta̱ xi̱kuu su̱tu̱ nu̱úra, nda̱kiʼinna ku̱a̱ʼa̱nna chí Lais. Ta na̱ yiví na̱ ñuu kán viíní xi̱ndoona ta kǒo ña̱ níxi̱ndiʼi-inina xa̱ʼa̱. Xa̱ʼnína ndiʼi na̱ yiví na̱ ndóo kán xíʼin espada ta xa̱ʼmina ñuu kán.
28 Ta kǒo nda̱a̱ ni iin na̱ nísakǎku na̱ ñuu yóʼo, saáchi xi̱ndikaa̱ña chí yoso̱ ña̱ xi̱kuu kuenta na̱ ñuu Bet-Rehob ta xíkání xi̱kindo̱oña nu̱ú ñuu Sidón, ta na̱ yiví na̱ xi̱ndoo yóʼo va̱ása níxikitáʼanna xíʼin inkaka ñuu. Tándi̱ʼi, na̱ tribu ta̱ Dan nda̱sava̱ʼana ñuu yóʼo ta kán xi̱kundoona.
29 Ta saátu chi̱nanína ñuu kán Dan chi saá kúú ña̱ xi̱naní yivána, ta̱ xi̱kuu se̱ʼe ta̱ Israel. Soo Lais xi̱naní ñuu yóʼo tá ya̱chi̱.
30 Tándi̱ʼi, kán ka̱nindichi na̱ tribu ta̱ Dan iin ña̱ʼa ña̱ plata ña̱ nda̱kiʼinna ndasakáʼnuna. Ta ta̱ Jonatán (ta̱ Jonatán xi̱kuura se̱ʼe ta̱ Guersom, se̱ʼe ta̱ Moisés) xíʼin na̱ se̱ʼera kúú na̱ xi̱kuu su̱tu̱ nu̱ú na̱ tribu ta̱ Dan, nda̱a̱ tá ka̱nitáʼan na̱ inka ñuu xíʼinna ta nda̱kiʼinna na̱ yiví na̱ xi̱ndoo kán ku̱a̱ʼa̱n xíʼinna.
31 Ta kán ka̱nindichina ña̱ʼa ña̱ plata ña̱ xi̱ndasakáʼnuna ña̱ ke̱ʼé ta̱ Miqueas. Ta kán ni̱xi̱yoña ndiʼi tiempo ña̱ ni̱xi̱yo veʼe Ndióxi̱ ta̱ nda̱a̱ chí Siló.
Nota
^ Inka variante “kotose̱ʼéna”, “kotoniʼnivíxína”.
^ Ña̱ kúni̱ kachi ‘nu̱ú xi̱ndoo na̱ tribu ta̱ Dan’.
^ Koto glosario, efod.
^ Inka variante “xiín”.
