Jueces 5:1-31
5 Ki̱vi̱ saá, ñá Débora xi̱tañá yaa yóʼo xíʼin ta̱ Barac se̱ʼe ta̱ Abinoam:
2 “Ndasakáʼnundó Jehová xa̱ʼa̱ na̱ ta̱a na̱ ñuu Israelna̱ ni̱xa̱ʼa̱n ka̱nitáʼan na̱ va̱ása núʼni ixí* xi̱ní.Ndasakáʼnundóra xa̱ʼa̱ na̱ ñuu na̱ chi̱kaa̱-ini ña̱ ku̱ʼu̱nna kanitáʼanna.
3 Kuniso̱ʼo ndóʼó na̱ kúú rey, ndóʼó na̱ chíñu kuniso̱ʼondó.
Yi̱ʼi̱ katai̱ nu̱ú Jehová.
Katai̱ yaa nu̱ú Jehová ta̱ kúú Ndióxi̱ na̱ ñuu Israel.
4 Jehová, tá ki̱taún chí Seír,tá ki̱taún ku̱a̱ʼún chí nu̱ú ñuʼú na̱ Edom,ñuʼú yóʼo ka̱ndaña, ta ndeéní ki̱xáʼa kúun sa̱vi̱;ta vi̱kó ndu̱uña sa̱vi̱.
5 Yuku̱ ka̱ndaña nu̱ú Jehová,nda̱a̱ yuku̱ Sinaí ka̱ndaña nu̱ú Jehová ta̱ kúú Ndióxi̱ na̱ ñuu Israel.
6 Tá ni̱xi̱yo ta̱ Samgar se̱ʼe ta̱ Anat,ta saátu tá ni̱xi̱yo ñá Jael, kǒo na̱ yiví níxi̱ka chí yichi̱ náʼnu;ta na̱ yiví na̱ xi̱xika xi̱nandukúna inkaka yichi̱ válí nu̱ú kivi ku̱ʼu̱nna.
7 Na̱ yiví na̱ xi̱ndoo ñuu válí ña̱ ni̱xi̱yo chí Israel kǒokana,kǒokana níxi̱yo nda̱a̱ tá ki̱xaa̱ yi̱ʼi̱ ñá Débora,nda̱a̱ tá ndu̱i̱ nda̱a̱ táki̱ʼva íyo siʼí na̱ ñuu Israel.
8 Na̱yóʼo nda̱kaxinna ndasakáʼnuna inka ndióxi̱.Tasaá ni̱xi̱yoní ku̱a̱chi chí yéʼé ñuu.
Ni 40,000 xi̱kuu na̱ ñuu Israel,kǒo nda̱a̱ ni iin lanza ta kǒo nda̱a̱ ni iin escudo níxi̱kuumiína.
9 Yi̱ʼi̱ íyoi̱ xíʼin na̱ comandante na̱ ñuu Israelna̱ chi̱kaa̱-ini ña̱ ku̱ʼu̱nna xíʼin na̱ ñuu ña̱ kanitáʼanna.
Ndasakáʼnundó Jehová.
10 Ndóʼó na̱ yósó* burro tí yáʼá;*ndóʼó na̱ ndóo nu̱ú ti̱ko̱to̱ ña̱ yaʼviní,ta saátu ndóʼó na̱ ku̱a̱ʼa̱n chí yichi̱,ndakani va̱ʼa xi̱níndó.
11 Chí nu̱ú xíʼi kití ti̱kui̱í, kán xi̱taku̱ ña̱ xi̱natúʼun na̱ xi̱ndataʼví ti̱kui̱í.Kán xi̱natúʼunna xa̱ʼa̱ ña̱ʼa ña̱ va̱ʼa ña̱ ke̱ʼé Jehová,saátu xa̱ʼa̱ ña̱ʼa ña̱ va̱ʼa ña̱ ke̱ʼé na̱ xi̱ndoo ñuu válí ña̱ ni̱xi̱yo chí Israel.
Tasaá na̱ ñuu Jehová nda̱kiʼinna ku̱a̱ʼa̱nna chí yéʼé ñuu.
12 Ndakáxí-iniún* Débora, ndakáxí-iniún.
Ndakáxí-iniún Débora, ndakáxí-iniún, ta kataún iin yaa.
Ndako̱o Barac, se̱ʼe ta̱ Abinoam, ndakiʼin na̱ preso ná ku̱ʼu̱nna xíʼún.
13 Na̱ ki̱ndoo nda̱kiʼinna ku̱a̱ʼa̱nna chí nu̱ú ndóo na̱ chíñu;na̱ ñuu Jehová ki̱xina nu̱úi̱ ña̱ va̱ʼa ku̱ʼu̱nna kanitáʼanna xíʼin na̱ yiví na̱ ndakúní.
14 Na̱ tribu ta̱ Efraín kúú na̱ xi̱ndoo chí yoso̱;ta kítáʼanna ku̱a̱ʼa̱nna xíʼin na̱ ta̱a na̱ tribu yóʼó ta̱ Benjamín.
Ti̱xin na̱ veʼe ta̱ Makir ke̱e na̱ comandanteta na̱ tribu ta̱ Zabulón xi̱kuu na̱ xi̱ndaka̱xin na̱ ta̱a na̱ koo soldado.
15 Na̱ ndísochíñu xíʼin na̱ tribu ta̱ Isacar chi̱ndeétáʼanna xíʼin ñá Débora.Nda̱a̱ táki̱ʼva chi̱ndeétáʼan na̱ tribu ta̱ Isacar xíʼinñá, saátu chi̱ndeétáʼan ta̱ Barac xíʼinñá.
Chi̱ndaʼánara ku̱a̱ʼa̱n xáʼára chí yoso̱.
Soo na̱ tribu ta̱ Rubén ndeéní ni̱xi̱ka-inina.
16 ¿Nda̱chun nda̱kandúʼún nda̱a̱ táki̱ʼva kéʼé iin kití tí ndíso u̱vi̱ ña̱ʼa ña̱ ve̱ení
ta xíniso̱ʼún ña̱ tívi na̱ pastor flauta nu̱ú ndikachi* sa̱na̱na?Na̱ tribu ta̱ Rubén, ndeéní ni̱xi̱ka-inina.
17 Na̱ ni̱xi̱yo chí Galaad ki̱ndoona chí inka táʼví tá yu̱ta Jordán.Na̱ tribu ta̱ Dan ki̱ndoona chí nu̱ú ni̱xi̱yo barcona.
Na̱ tribu ta̱ Aser nda̱kundoona yuʼú tá mar chí nu̱ú xi̱kixaa̱ tú barco,ta kǒo nda̱a̱ ni iin ña̱ʼa níkeʼéna.
18 Na̱ tribu ta̱ Zabulón si̱lóʼo kuvina xa̱ʼa̱ ña̱ ke̱ʼéna chí yuku̱;ta saátu na̱ tribu ta̱ Neftalí.
19 Ki̱xi na̱ rey ta ka̱nitáʼanna;na̱ rey na̱ xáʼndachíñu chí Canaán ka̱nitáʼanna chí Taanac,yatin chí nu̱ú xi̱ndikaa̱ ti̱kui̱í chí Meguidó.
Ta va̱ása níkuchiñuna ndakiʼinna nda̱a̱ ni loʼo plata ku̱ʼu̱n xíʼinna.
20 Nda̱a̱ ki̱mi tí íyo chí ndiví ka̱nitáʼanrí,nda̱a̱ nu̱ú níndosorí chí ndiví ka̱nitáʼanrí xíʼin ta̱ Sísara.
21 Yu̱ta Cisón ka̱ñuurána,*yu̱ta tá xa̱a̱ naʼání íyo, yu̱ta Cisón.
Ku̱chiñún ni̱xa̱ñi̱ún* na̱ ndakúní.
22 Tasaá chíi̱n tí kuáyi̱ xi̱kanindaaña nu̱ú ñuʼúxa̱ʼa̱ ña̱ ndeéní xínurí ku̱a̱ʼa̱nrí.
23 ‘Sakúisochiʼñandó* Meroz, ka̱chi ta̱ ángel Jehová,sakúisochiʼñandó na̱ ndóo kán,saáchi va̱ása níkixina chindeétáʼanna xíʼin Jehová,va̱ása níkixina xíʼin na̱ ta̱a na̱ ndakúní na̱ kúúmiína ña̱ chindeétáʼanna xíʼin Jehová’.
24 Ñá Jael, ñá síʼi ta̱ Héber ta̱ quenita,ñákán kúú ñá káʼa̱n va̱ʼaníkana xa̱ʼa̱ nu̱ú ndiʼika ná ñaʼá;káʼa̱n va̱ʼana xa̱ʼa̱ñá nu̱ú ndiʼika ná ñaʼá ná ndóo ini veʼe válí.
25 Ti̱kui̱íva ndu̱kúra; soo leche ta̱xiñá xi̱ʼira.
Ini iin ko̱ʼo̱ loʼo ña̱ kúnú ini ña̱ liviní chi̱kaa̱ñá leche tá ku̱yúú xi̱ʼira.
26 Xíʼin iin ndaʼa̱ñá ki̱ʼinñá iin yitu̱n tú kátúnna veʼe válí.Xíʼin ndaʼa̱ kúaʼañá ki̱ʼinñá iin martillo ña̱ xíniñúʼu na̱ káchíñu.
Xíʼin ña̱yóʼo ka̱niñá ta̱ Sísara, ta ta̱ʼvíñá xi̱níra;ni̱ya̱ʼa níí yitu̱n xi̱níra ta cha̱chi válíña.
27 Yatin xa̱ʼa̱ñá nda̱kavara, nda̱kavara ta va̱ása níkanda̱kara.Yatin xa̱ʼa̱ñá nda̱kavara ta kán ki̱ndoovara.Nu̱ú nda̱kavara, kán ni̱xi̱ʼi̱vara.
28 Iin ñá ñaʼá kítañá xítoñá chí ventana.Siʼí ta̱ Sísara xítoñá chí ventana:‘¿Nda̱chun kǒo carretara kíxaa̱?
¿Nda̱chun va̱ása táku̱ ña̱ xínu kuáyi̱ sa̱na̱ra va̱xirí?’.
29 Ná ñaʼá ná ndíchiní ná íyo veʼeñá xi̱ndakuiinná yuʼúñá,ta saátu miíñá tuku ta tuku xi̱kaʼa̱nñá ña̱yóʼo:
30 ‘Sana ña̱ʼa ña̱ ndáyáʼvi ña̱ nda̱kiʼinvana ndátaʼvína:iin ñá loʼo, u̱vi̱ ñá loʼo ndákiʼin iin tá iin na̱ ta̱a na̱ ni̱xa̱ʼa̱n ka̱nitáʼan;ti̱ko̱to̱ ña̱ nda̱kaʼyina ndakiʼin ta̱ Sísara, ña̱ʼa ña̱ ndáyáʼvi ndakiʼinra kúú ti̱ko̱to̱ ña̱ nda̱kaʼyina;iin ti̱ko̱to̱ ña̱ ni̱ku̱kuna, ti̱ko̱to̱ ña̱ nda̱kaʼyina, u̱vi̱ ti̱ko̱to̱ ña̱ ni̱ku̱kunakuñuʼu su̱kún na̱ ni̱xa̱ʼa̱n nda̱kiʼinña’.
31 Saá ná kuvi ndiʼi na̱ sáa̱-ini xíni yóʼó Jehová,soo na̱ kúʼvi̱-ini xíni yóʼó ná koona nda̱a̱ táki̱ʼva íyo ñu̱ʼu,* ña̱ yéʼe̱níña ta táxaníña tá sa̱kán va̱xi kánaña”.
Ta 40 ku̱i̱ya̱ kúú ña̱ kǒoka ku̱a̱chi níxi̱yo nu̱ú ñuʼú kán.
Nota
^ Inka variante “yisi̱”. Ña̱yóʼo sana káʼa̱nña xa̱ʼa̱ ña̱ nda̱taxina miína ña̱ kachíñuna nu̱ú Ndióxi̱.
^ Inka variante “na̱ nándoso ya̱ta̱”, “na̱ kúnuu sa̱ta̱”.
^ Á “tí café”.
^ Inka variante “Ndoto”.
^ Inka variante “levo”.
^ Á “Ta̱nina xíʼin yu̱ta Cisón”. Inka variante “ka̱ñuʼurána”.
^ Inka variante “xi̱niʼniún”, “ni̱xa̱ʼniún”.
^ Inka variante “Chikaa̱ndó chiʼña”, “Satávi̱chiʼñandó”.
^ Inka variante “ña̱ ka̱ndii”.
