Ña̱ ka̱ʼyí ta̱ Lucas 14:1-35
-
Ki̱vi̱ sábado sándaʼara iin ta̱a ta̱ xi̱kuumií iin kue̱ʼe̱ ña̱ xi̱kiʼvi kuiñu ndaʼa̱ra xíʼin xa̱ʼa̱ra (1-6)
-
Vitá koo iniún tá kánana yóʼó ku̱ʼún kuxún veʼena (7-11)
-
Kana na̱ kǒo kívi taxi nda̱a̱ ni iin ña̱ʼa ndaʼún ña̱ ná ku̱ʼu̱nna veʼún (12-14)
-
Ilustración ña̱ káʼa̱n xa̱ʼa̱ na̱ kǒo níxiin ku̱ʼu̱n nu̱ú ka̱nanana (15-24)
-
Ña̱ xíniñúʼu keʼéyó ña̱ va̱ʼa kooyó discípulo ta̱ Cristo (25-33)
-
Ñi̱i̱ ña̱ va̱ása o̱ʼva̱ka (34, 35)
14 Inka yichi̱, tá ki̱vi̱ sábado, ni̱xa̱ʼa̱nra xi̱xira xíʼin iin ta̱ xáʼndachíñu nu̱ú na̱ fariseo. Ta na̱ ndóo kán iin xíto káxina nu̱úra.
2 Ta nu̱úra kán níndúʼu iin ta̱a ta̱ xi̱kuumií iin kue̱ʼe̱ ña̱ xi̱kiʼvi kuiñu ndaʼa̱ra xíʼin xa̱ʼa̱ra.
3 Tasaá ni̱nda̱ka̱tu̱ʼun ta̱ Jesús na̱ xíni̱ va̱ʼa xa̱ʼa̱ Ley ta saátu ni̱nda̱ka̱tu̱ʼunra na̱ fariseo: “¿Á kivi sandáʼana iin na̱ yiví ki̱vi̱ sábado á kǒo kivi?”.
4 Soo na̱kán kǒo ni iin ña̱ʼa níndakuiinna. Tasaá ti̱inra ta̱ ta̱a kán, ta sa̱ndáʼarara ta ni̱ka̱ʼa̱nra xíʼinra ña̱ ná ku̱ʼu̱nra.
5 Tasaá ni̱ka̱ʼa̱nra xíʼinna: “¿Ndáa ndóʼó tá iin se̱ʼendó á iin si̱ndi̱ki̱ sa̱na̱ndó ná ndakava iin pozo ki̱vi̱ sábado, á va̱ása ndi̱ku̱n tavándóna á tavándórí?”.
6 Ta kǒo níkuchiñuna ndakuiinna yuʼúra.
7 Tá xi̱nira na̱ yiví na̱ kíxaa̱ kán ta ndúkúna chí nu̱ú va̱ʼaka náʼa̱ koona, ni̱ka̱ʼa̱nra iin ilustración yóʼo xíʼinna:
8 “Tá ná kanana yóʼó ku̱ʼún iin vikó tíndaʼa̱, va̱ása ku̱ʼún koún nu̱ú va̱ʼaka náʼa̱. Chi sana ka̱nana inkaka na̱ ndáyáʼvika nu̱ú miíún.
9 Tasaá kixi ta̱ ka̱na u̱vi̱ saá ndóʼó ta ka̱ʼa̱nra xíʼún: ‘Taxi nu̱ú íyoún ná koo ta̱ ta̱a yóʼo’. Ta kukaʼanní nu̱ún ku̱ʼún koún nda̱a̱ chí sa̱tá.
10 Ña̱ va̱ʼaka keʼún kúúña, tá ná kanana yóʼó, kúáʼan koún nda̱a̱ chí sa̱tá, ña̱kán tá ná kixi ta̱ ka̱na yóʼó, ta ka̱ʼa̱nra xíʼún: ‘Migo, naʼa chí nu̱ú va̱ʼaka náʼa̱ yóʼo’. Tasaá ndukáʼnún nu̱ú ndiʼi na̱ ki̱xaa̱ kán.
11 Saáchi Ndióxi̱ sakúkaʼanra nu̱ú ndiʼi na̱ ndásakáʼnu mií, ta na̱ vitá-ini ndukáʼnuna”.
12 Tándi̱ʼi ni̱ka̱ʼa̱nra xíʼin ta̱ ka̱nañaʼá: “Tá ná kanaún iinna kixina kuxuna veʼún, va̱ása kanaún na̱ migoún, ni na̱ ñaniún, ni na̱ táʼún, ni na̱ ku̱i̱ká na̱ ndóo yatin xíʼún. Chi tá saá ná keʼún, kivitu kana na̱yóʼo miíún inka yichi̱, ta ña̱yóʼo kúú ña̱ ndakiʼún.
13 Ña̱ va̱ʼaka keʼún kúúña, tá ná keʼún iin vikó kana na̱ ndáʼvi, na̱ kǒo kívi kaka, na̱ kúáa nu̱ú,
14 tasaá si̱í koún, chi na̱yóʼo va̱ása ni̱ʼína ña̱ chaʼvina yóʼó. Ta Ndióxi̱ ndataxira ña̱ va̱ʼa ndaʼún tá ná ndataku na̱ ke̱ʼé ña̱ va̱ʼa”.*
15 Tá xi̱niso̱ʼo iin ta̱ ni̱xa̱a̱ kán ña̱yóʼo ta ni̱ka̱ʼa̱nra: “Si̱íní koo na̱ kuxu* ti̱xin Reino Ndióxi̱”.
16 Ta ni̱ka̱ʼa̱n ta̱ Jesús xíʼinra: “Iin ta̱a ke̱ʼéra ña̱ kuxu ku̱a̱ʼání na̱ yiví na̱ ka̱nara.
17 Tá ki̱xaa̱ hora ña̱ kuxuna, chi̱ndaʼára ta̱ káchíñu nu̱úra ña̱ ná ku̱ʼu̱nra ka̱ʼa̱nra xíʼin na̱ ka̱nara: ‘Naʼandó chi xa̱a̱ íyo tu̱ʼva ndiʼiña’.
18 Soo ña̱ kǒo kúni̱na ku̱ʼu̱nna, xa̱a̱ síín síín ña̱ ni̱ka̱ʼa̱n iin iinna. Ta̱ nu̱ú ni̱ka̱ʼa̱nra: ‘Sa̱tái̱* iin ñuʼú ta xíniñúʼu ku̱ʼi̱n kotoi̱ña; káʼa̱n-ndáʼvii̱ xíʼún ña̱ koo káʼnu-iniún xa̱ʼíi̱’.
19 Ta inkara ni̱ka̱ʼa̱n xíʼinra: ‘Sa̱tái̱ u̱ʼu̱n yunta tí si̱ndi̱ki̱ ta ku̱ʼi̱n kotoi̱rí; káʼa̱n-ndáʼvii̱ xíʼún ña̱ koo káʼnu-iniún xa̱ʼíi̱’.
20 Ta inkara ni̱ka̱ʼa̱n xíʼinra: ‘Sa̱kán ti̱ndaʼíi̱ ña̱kán va̱ása kivi ku̱ʼi̱n’.
21 Tasaá ta̱ káchíñu kán ni̱xa̱ʼa̱nra na̱túʼunra ndiʼi ña̱yóʼo xíʼin ta̱ káchíñura nu̱ú. Ta ta̱ xíʼin veʼe kán ni̱sa̱a̱níra ta ni̱ka̱ʼa̱nra xíʼin ta̱ káchíñu nu̱úra: ‘Kita ta ndi̱ku̱n ku̱ʼún chí calle náʼnu xíʼin yichi̱ válí, ta ná kixi na̱ ndáʼvi xíʼún, na̱ kúáa nu̱ú, ta saátu na̱ kǒo kívi kaka’.
22 Tá ni̱ya̱ʼa loʼo, ta̱ káchíñu kán ni̱ka̱ʼa̱nra: ‘Táta, xa̱a̱ ke̱ʼíi̱ ndiʼi ña̱ ni̱ka̱ʼún xíʼi̱n, soo núnakava nu̱ú kivi koona’.
23 Ta ta̱ xíʼin veʼe kán ni̱ka̱ʼa̱nra xíʼinra: ‘Kúáʼan chí inka yichi̱ ña̱ íyo chí nu̱ú ñuu, ta ixandúxa xíʼin na̱ yiví kán ña̱ ná ki̱ʼvina veʼi̱ ña̱ va̱ʼa ná kutúña.
24 Saáchi káʼi̱n xíʼinndó ña̱ nda̱a̱ ni iin ta̱a na̱ ka̱nai̱ tá xa̱ʼa̱, va̱ása kotondosóna ña̱ʼa ña̱ i̱xava̱ʼi̱’”.
25 Ta xíʼin ta̱ Jesús ku̱a̱ʼa̱n ku̱a̱ʼání na̱ yiví; ta xi̱tora nu̱úna ta ni̱ka̱ʼa̱nra xíʼinna:
26 “Tá iinna kúni̱na koona discípuloi̱ xíniñúʼu kuʼvi̱ka-inina kunina yi̱ʼi̱ nu̱úka* yivána, siʼína, ñá síʼina, se̱ʼena, ñanina, ku̱ʼvana á nda̱a̱ nu̱úka miína.* Chi tá kǒo, va̱ása kivi xa̱a̱na koona discípuloi̱.
27 Na̱ va̱ása ndíso yitu̱n tú sáxo̱ʼvi̱* miína ta ndíku̱nna yi̱ʼi̱ va̱ása kivi xa̱a̱na koona discípuloi̱.
28 ¿Ndáa ndóʼó kúni̱ keʼé iin veʼe* á va̱ása siʼna kundoondó ta tavándó ki̱ʼva á kita xu̱ʼúnndó ña̱ saxínundóña?
29 Chi sana kixáʼandó tavándó xa̱ʼa̱ña soo kǒo kuchiñundó saxínundóña, ta ndiʼi na̱ ná kuniña kixáʼana ku̱a̱ku̱ndaana ndóʼó
30 ta kachina: ‘Ta̱ ta̱a yóʼo ki̱xáʼara íxava̱ʼara veʼe, soo kǒo níkuchiñura saxínuraña’.
31 Tá iin rey kúúmiíra 10,000 soldado ta kúni̱ra ku̱ʼu̱nra kanitáʼanra xíʼin inka rey ta̱ kúúmií 20,000 soldado, ¿á su̱ví siʼna koora ta ndukúra consejo nu̱ú inkana á kuchiñura, á va̱ása kuchiñura?
32 Soo tá kíʼinra kuenta ña̱ va̱ása kuchiñura, va̱ʼaka chindaʼára na̱ kuniʼi tu̱ʼunra ña̱ ná ku̱ʼu̱nna kindo̱o va̱ʼana xíʼin inka ta̱ rey tá xíkáka va̱xira.
33 Ña̱kán, ndakaʼánndó tá iin ndóʼó va̱ása sándakoondó ndiʼi ña̱ kúúmiíndó, va̱ása kivi koondó discípuloi̱.
34 ”Ñi̱i̱ ña̱ va̱ʼaní kúúña. Soo tá ná ndiʼi-xa̱ʼa̱ ña̱ o̱ʼva̱ña, ¿nda̱saa kivi nduu o̱ʼva̱ tukuña?
35 Ni ña̱ kuniñúʼunaña xíʼin ñuʼú va̱ása va̱ʼaña ni ña̱ ndasakánaña xíʼin si̱ʼví kití; ña̱kán xátanaña. Na̱ va̱ʼa xíniso̱ʼo, vií va̱ʼa ná kuniso̱ʼona”.
Nota
^ Tu̱ʼun ña̱ ni̱ka̱ʼyi̱ña káchiña “na̱ kuxu si̱táva̱ʼa”.
^ Inka variante “Xe̱ei̱n”.
^ Tu̱ʼun ña̱ ni̱ka̱ʼyi̱ña káchiña “kundasína kunina”, ña̱yóʼo kúni̱ kachiña loʼoka kuʼvi̱-inina kunina.
^ Tu̱ʼun ña̱ ni̱ka̱ʼyi̱ña káchiña “iin torre”.