Ña̱ ka̱ʼyí ta̱ Mateo 1:1-25
1 Libro ña̱ nátúʼun xa̱ʼa̱ ta̱ Jesucristo,* se̱ʼe* ta̱ David, se̱ʼe ta̱ Abrahán.
2 Ta̱ Abrahán xi̱kuura yivá ta̱ Isaac,ta̱ Isaac xi̱kuura yivá ta̱ Jacob,ta̱ Jacob xi̱kuura yivá ta̱ Judá xíʼin na̱ ñanira;
3 Ta̱ Judá xi̱kuura yivá ta̱ Pérez xíʼin ta̱ Zérah (ta siʼína xi̱kuu ñá Tamar);ta̱ Pérez xi̱kuura yivá ta̱ Hezrón;ta̱ Hezrón xi̱kuura yivá ta̱ Ram;
4 Ta̱ Ram xi̱kuura yivá ta̱ Aminadab;ta̱ Aminadab xi̱kuura yivá ta̱ Nahsón;ta̱ Nahsón xi̱kuura yivá ta̱ Salmón;
5 Ta̱ Salmón xi̱kuura yivá ta̱ Boaz (ta siʼíra xi̱kuu ñá Rahab);ta̱ Boaz xi̱kuura yivá ta̱ Obed (ta siʼíra xi̱kuu ñá Rut);ta̱ Obed xi̱kuura yivá ta̱ Jesé;
6 Ta̱ Jesé xi̱kuura yivá ta̱ rey David.Ta̱ David xi̱kuura yivá ta̱ Salomón (ta siʼí ta̱yóʼo xi̱kuu ñá síʼi ta̱ Urías);
7 Ta̱ Salomón xi̱kuura yivá ta̱ Rehoboam;ta̱ Rehoboam xi̱kuura yivá ta̱ Abías;ta̱ Abías xi̱kuura yivá ta̱ Asá;
8 Ta̱ Asá xi̱kuura yivá ta̱ Jehosafat;ta̱ Jehosafat xi̱kuura yivá ta̱ Jehoram;ta̱ Jehoram xi̱kuura yivá ta̱ Uzías;
9 Ta̱ Uzías xi̱kuura yivá ta̱ Jotán;ta̱ Jotán xi̱kuura yivá ta̱ Acaz;ta̱ Acaz xi̱kuura yivá ta̱ Ezequías;
10 Ta̱ Ezequías xi̱kuura yivá ta̱ Manasés;ta̱ Manasés xi̱kuura yivá ta̱ Amón;ta̱ Amón xi̱kuura yivá ta̱ Josías;
11 Ta̱ Josías xi̱kuura yivá ta̱ Jeconías xíʼin na̱ ñanira tá tiempo ña̱ ki̱xi na̱ ñuu Babilonia nda̱kiʼinna na̱ judío ku̱a̱ʼa̱nna xíʼinna.
12 Tá ndóona ñuu Babilonia ka̱ku ta̱ Sealtiel se̱ʼe ta̱ Jeconías;ta̱ Sealtiel xi̱kuura yivá ta̱ Zorobabel;
13 Ta̱ Zorobabel xi̱kuura yivá ta̱ Abiud;ta̱ Abiud xi̱kuura yivá ta̱ Eliaquim;ta̱ Eliaquim xi̱kuura yivá ta̱ Azor;
14 Ta̱ Azor xi̱kuura yivá ta̱ Sadoc;ta̱ Sadoc xi̱kuura yivá ta̱ Aquim;ta̱ Aquim xi̱kuura yivá ta̱ Eliud;
15 Ta̱ Eliud xi̱kuura yivá ta̱ Eleazar;ta̱ Eleazar xi̱kuura yivá ta̱ Mattán;ta̱ Mattán xi̱kuura yivá ta̱ Jacob;
16 Ta̱ Jacob xi̱kuura yivá ta̱ José, ta̱ xi̱kuu yií ñá María, ta ñáyóʼo xi̱kuu siʼí ta̱ Jesús, ta̱ káʼa̱nna Cristo xíʼin.
17 Ña̱kán, 14 xi̱kuu na̱ veʼera nda̱a̱ tá tiempo ta̱ Abrahán nda̱a̱ tiempo ta̱ David, ta 14 xi̱kuu tukuna nda̱a̱ tá tiempo ta̱ David nda̱a̱ tá nda̱kiʼinnana ku̱a̱ʼa̱nna xíʼinna chí ñuu Babilonia. Ta tuku 14 xi̱kuuna nda̱a̱ tá nda̱kiʼinnana ku̱a̱ʼa̱n xíʼinna chí ñuu Babilonia nda̱a̱ tá ka̱ku ta̱ Cristo.
18 Ta ña̱yóʼo kúú ña̱ ku̱u tá ka̱ku ta̱ Jesucristo: siʼíra ñá María xa̱a̱ íyo tu̱ʼun ña̱ tindaʼa̱ñá xíʼin ta̱ José, soo tá kúma̱níka tindaʼa̱na ni̱ke̱e se̱ʼeñá xíʼin espíritu santo.*
19 Ta̱ José yiíñá,* iin ta̱a va̱ʼa xi̱kuura ta kǒo níxikuni̱ra sakúkaʼanra nu̱ú ñá María nu̱ú ndiʼina. Ña̱kán nda̱kanixi̱níra sandákoorañá ta kǒo ni iinna kunda̱a̱-ini.
20 Soo, tándi̱ʼi ña̱ nda̱kanixi̱níra xa̱ʼa̱ ña̱yóʼo, ni̱ki̱si̱ra tasaá ni̱xa̱níra ña̱ ki̱ta iin ángel Jehová* nu̱úra ta ni̱ka̱ʼa̱nra xíʼinra: “José se̱ʼe ta̱ David, va̱ása yi̱ʼvíún ña̱ ndakiʼún ñá María ña̱ ku̱ʼu̱nñá xíʼún veʼún ña̱ kooñá ñá síʼún, saáchi ta̱ loʼo ta̱ ndíka̱a̱ ti̱xinñá xíʼin espíritu santo ni̱ke̱era.
21 Ta kaku iin se̱ʼeñá ta xíniñúʼu chinúún ki̱vi̱ra ña̱ kunaníra Jesús* saáchi ta̱yóʼo kúú ta̱ sakǎku na̱ ñuura xa̱ʼa̱ ku̱a̱china”.
22 Ndiʼi ña̱yóʼo ku̱u ña̱ va̱ʼa xi̱nu tu̱ʼun Jehová* ña̱ ni̱ka̱ʼa̱n ta̱ profetara:
23 “Kotondó, iin ñá loʼo kúa̱an ke̱e se̱ʼeñá, ta kaku iin ta̱ loʼo se̱ʼeñá, ta kunaníra Emmanuel”, ña̱yóʼo kúni̱ kachiña “Ndióxi̱ íyora xíʼinyó”.
24 Tá nda̱koo ta̱ José, ke̱ʼéra nda̱a̱ táki̱ʼva ni̱ka̱ʼa̱n ta̱ ángel Jehová* xíʼinra ta nda̱kiʼinra ñá síʼira ñá María ku̱a̱ʼa̱nñá xíʼinra chí veʼera.
25 Soo kǒo níki̱si̱ra xíʼinñá nda̱a̱ tá ka̱ku ta̱ loʼo se̱ʼeñá. Ta chi̱núura ki̱vi̱ra ña̱ kunaníra Jesús.
Nota
^ Á “ta̱ Jesús ta̱ kúú Mesías”. Tu̱ʼun Cristo ta saátu Mesías kúni̱ kachiña ‘ta̱ nda̱kaxin Ndióxi̱’.
^ Á “ta̱ ki̱xi ti̱xin na̱ veʼe ta̱ David”.
^ Á “ndee̱ Ndióxi̱”.
^ Costumbre na̱ judío xi̱kuuña ni kúma̱níka tindaʼa̱na xi̱ka̱ʼa̱nna ña̱ xi̱kuuna yiína.
^ Ki̱vi̱ Ndióxi̱ Jehová 241 yichi̱ va̱xiña ta ña̱yóʼo kúú ña̱ yichi̱ nu̱ú ña̱ va̱xiña nu̱ú Escrituras Griegas Cristianas nu̱ú tutu yóʼo. Koto glosario.
^ Ki̱vi̱ yóʼo iin kúúña xíʼin ki̱vi̱ hebreo Jesúa, á Josué, ña̱ kúni̱ kachi ‘Jehová kúú ta̱ sakǎku’.
