Romanos 2:1-29
2 Ña̱kán, ni nda̱a̱ ndáaka na̱ yiví kúún, tá ndátiún ku̱a̱chi xíʼin inkana su̱ví ña̱ va̱ʼa kúú ña̱ kéʼún. Saáchi tá ndátiún ku̱a̱chi xíʼin inkana, náʼún ña̱ xíniñúʼu ndakiʼintu yóʼóva castigo, chi nda̱a̱ táki̱ʼva kéʼé na̱kán saátu kéʼé miívaún.
2 Soo miíyó kúnda̱a̱va-iniyó tá ná kixaa̱ ki̱vi̱ ña̱ ndatiin Ndióxi̱ ku̱a̱chi xíʼin na̱ kéʼé ña̱yóʼo, nda̱kúní tiinraña.
3 Soo yóʼó na̱ tíin ku̱a̱chi xíʼin na̱ kéʼé ku̱a̱chi táʼan ña̱ kéʼé miíún, ¿á ndákanixi̱níún ña̱ ka̱kún tá ná ndatiin Ndióxi̱ ku̱a̱chi?
4 ¿Á va̱ása xíni̱ún xa̱ʼa̱ ña̱ va̱ʼaní-ini Ndióxi̱ xíʼún kúú ña̱ kúni̱ra ña̱ ná ndikó-iniún, ta xa̱ʼa̱ ña̱ va̱ása xíni̱ún ña̱yóʼo kǒo táxiún ña̱ na̱ʼa̱ra ña̱ va̱ʼaní-inira xíʼún ni ña̱ kúee íyo inira xíʼún?
5 Soo xa̱ʼa̱ ña̱ so̱ʼoníún ta va̱ása ndíkó-iniún, ña̱ ndúkú miíún kúú ña̱ sa̱a̱ Ndióxi̱ xíʼún tá ná kixaa̱ ki̱vi̱ ña̱ nda̱kúní ndatiinra ku̱a̱chi.
6 Ta̱kán ndatiinra ku̱a̱chi xíʼin iin tá iinna nda̱a̱ táki̱ʼva íyo ña̱ ke̱ʼéna:
7 na̱ chíka̱a̱ ndee̱ ña̱ kuumiína iin ña̱ va̱ʼaní, taxira ña̱ kutakuna ndiʼi tiempo ta taxira ña̱ kuumiína iin ku̱ñu ña̱ va̱ása ndiʼi-xa̱ʼa̱ chi chíka̱a̱nína ndee̱ ña̱ keʼéna ña̱ va̱ʼa;
8 soo Ndióxi̱ ndeéní sa̱a̱ra xíʼin na̱ sákaku ku̱a̱chi ta kǒo kándíxana ña̱ nda̱a̱ ta kéʼéna ña̱ va̱ása nda̱kú.
9 Kooní tu̱ndóʼo nu̱úna ta xo̱ʼvi̱ní ndiʼi na̱ kéʼé ña̱ va̱ása va̱ʼa, siʼna na̱ judío ta saátu na̱ griego.
10 Ndiʼi na̱ kéʼé ña̱ va̱ʼa, Ndióxi̱ taxira iin chiñu káʼnu ndaʼa̱na ta va̱ʼaní xa̱a̱na kutáʼanna xíʼinra, siʼna na̱ judío ta saátu na̱ griego.
11 Saáchi Ndióxi̱ va̱ása ndáka̱xinra na̱ yiví.
12 Ndiʼi na̱ kíʼvi ku̱a̱chi ta va̱ása xíni̱na xa̱ʼa̱ ña̱ ley, kuvina ni kǒo ley ña̱ ndatiin ku̱a̱chi xíʼinna. Soo ndiʼi na̱ kíʼvi ku̱a̱chi ta xíni̱na xa̱ʼa̱ ña̱ ley, ndatiinna ku̱a̱chi xíʼinna nda̱a̱ táki̱ʼva káʼa̱n ña̱ ley.
13 Saáchi su̱ví na̱ yiví na̱ xíniso̱ʼo ley kúú na̱ nda̱kú-ini nu̱ú Ndióxi̱, chi na̱ kéʼé ña̱ káʼa̱n ley kúú na̱ nda̱kúní-ini nu̱úra.
14 Saáchi na̱ yiví na̱ kǒo kúú judío ni va̱ása xíni̱vana ña̱ káʼa̱n ley Ndióxi̱ soo kéʼévana ña̱ káʼa̱nña. Ni va̱ása xíni̱vana ña̱ káʼa̱n ley yóʼo, soo ñúʼuña níma̱na.
15 Xíʼin ña̱ kéʼéna náʼa̱na ña̱ ndíku̱nna ña̱ sánáʼa̱ ley chi xa̱a̱ ni̱ka̱ʼyi̱ña níma̱na, ta ña̱ xínitúni̱na náʼa̱ña á ña̱ va̱ʼa kúú ña̱ kéʼéna á su̱ví ña̱ va̱ʼa kúúña, tasaá kíʼinna kuenta á kúúmiína ku̱a̱chi á va̱ása.
16 Ña̱yóʼo kuuña tá ná kuniñúʼu Ndióxi̱ ta̱ Cristo Jesús ña̱ ndatiinra ku̱a̱chi xíʼin na̱ yiví xa̱ʼa̱ ña̱ kéʼé se̱ʼéna, ta ña̱yóʼo kúú tu̱ʼun va̱ʼa* ña̱ nátúʼi̱n xa̱ʼa̱.
17 Yóʼó káʼún ña̱ kúún judío, ta kándíxaún ña̱ káʼa̱n ley ta ndeéní káʼún ña̱ kítáʼún xíʼin Ndióxi̱,
18 yóʼó xíni̱vaún ndáaña kúni̱ Ndióxi̱ keʼún, ta ña̱ʼa ña̱ va̱ʼa, va̱ʼavaña nu̱ún saáchi xa̱a̱ saá sa̱náʼa̱na yóʼó xíʼin Ley,
19 yóʼó kándíxaún ña̱ kúún iin ta̱ níʼi yichi̱ nu̱ú iin na̱ kúáa nu̱ú, ta kúún ñuʼu̱ nu̱ú na̱ ndóo nu̱ú naá,
20 yóʼó ndákanixi̱níún ña̱ kivi sanáʼún na̱ va̱ása xíni̱ ta saátu na̱ va̱lí chi xíni̱kaún nu̱úna ta kúnda̱a̱ka loʼo iniún xa̱ʼa̱ ña̱ nda̱a̱ ña̱ va̱xi nu̱ú Ley...,
21 tá saá, yóʼó na̱ sánáʼa̱ inkana, ¿á va̱ása sánáʼún miíún? Yóʼó na̱ nátúʼun xíʼin inkana “Va̱ása ixakuíʼnáún”, ¿á íxakuíʼnáún?
22 Yóʼó na̱ káʼa̱n “Va̱ása ku̱su̱ún xíʼin na̱ kǒo nítindaʼa̱ xíʼún”,* ¿á kéʼún ña̱yóʼo? Yóʼó na̱ kúndasí xíni ndióxi̱ vatá, ¿á íxakuíʼnáún ini templo?
23 Yóʼó na̱ ndeéní káʼa̱n ña̱ kándíxaún ley, ¿á yáʼandosóún ña̱ káʼa̱n Ley ta kǒo íxato̱ʼún Ndióxi̱?
24 Saáchi nda̱a̱ táki̱ʼva ni̱ka̱ʼyi̱ nu̱ú tu̱ʼun Ndióxi̱, “xa̱ʼa̱ ña̱ kéʼé ndóʼó, na̱ ñuyǐví va̱ása va̱ʼa ka̱ʼa̱nna xa̱ʼa̱ ki̱vi̱ Ndióxi̱”.
25 Ña̱ ta̱ʼnda̱ nu̱ú yi̱ún* chindeéña yóʼó tá ndíku̱ún ña̱ káʼa̱n ley. Soo tá va̱ása ndíku̱ún ña̱ káʼa̱n ley, nda̱a̱ táki̱ʼva íyo ta̱ va̱ása níta̱ʼnda̱ nu̱ú yi̱i̱* saá íyoún.
26 Ña̱kán tá iin ta̱a ta̱ va̱ása ni̱ta̱ʼnda̱ nu̱ú yi̱i̱* ndíku̱nra ña̱ káʼa̱n Ley, ¿á su̱ví nu̱ú Ndióxi̱ nda̱a̱ táki̱ʼva íyo ta̱ xa̱a̱ ni̱ta̱ʼnda̱ nu̱ú yi̱i̱* saá íyora?
27 Ña̱kán, ta̱ ta̱a ta̱ va̱ása níta̱ʼnda̱ nu̱ú yi̱i̱,* xa̱ʼa̱ ña̱ ndíku̱nra ña̱ káʼa̱n Ley, ndatiinra ku̱a̱chi xíʼún chi sa̱náʼa̱na yóʼó xa̱ʼa̱ ña̱ ta̱ʼnda̱ nu̱ú yi̱ún* ta saátu ña̱ kundiku̱ún ley soo va̱ása ndíku̱únña.
28 Saáchi na̱ ndixa kúú judío su̱ví chí sa̱tá kuitína náʼa̱na ña̱ kúúna judío, ta ni va̱ása ndáyáʼvi ña̱ kaʼnda kuitína nu̱ú yi̱i̱na.*
29 Soo na̱ ndixa kúú judío, xíʼin ndiʼi níma̱na náʼa̱naña, ta ña̱ chíndeétáʼan xíʼinna ña̱ na̱ʼa̱na ña̱yóʼo xíʼin ndiʼi níma̱na kúú ña̱ espíritu santo Ndióxi̱, ta su̱ví ña̱ kúúmiína iin ley kúúña. Ta su̱ví na̱ yiví kúú na̱ káʼa̱n va̱ʼa xa̱ʼa̱ na̱yóʼo chi mií Ndióxi̱ kúú ta̱ káʼa̱n va̱ʼa xa̱ʼa̱na.
