Rut 3:1-18
3 Ñá Noemí ni̱ka̱ʼa̱nñá xíʼin ñá Rut: “Siʼí, xíniñúʼu ndukúi̱ yii̱ún chi saá kúú ña̱ va̱ʼa koún.
2 Táʼanvayó kúú ta̱ Boaz, ta ná ñaʼá ná xi̱kitáʼún xíʼin tá nda̱kayaún cebada ná káchíñu nu̱úvara kúúná. Ñuú vitin ku̱ʼu̱nra ndativira cebada nu̱ú ñuʼúra.
3 Ña̱kán, kuchi ta chika̱ún aceite tá xáʼa̱n támi miíún. Ndaku̱ndixi ti̱ko̱to̱ mií ña̱ va̱ʼaka ta kúáʼan nu̱ú ndíkaa̱ra ndátivira cebada. Ta kuentaní koún ña̱ ná kǒo kunira yóʼó nda̱a̱ ná ndiʼi kuxura.
4 Tá xa̱a̱ ná ku̱ʼu̱nra ku̱su̱nra kiʼin va̱ʼún kuenta ndáa míí kandúʼura,* tasaá ku̱ʼún kandúʼún xa̱ʼa̱ra. Ta miíra ná ka̱ʼa̱n xíʼún ndáaña keʼún”.
5 Ta ñá Rut nda̱kuiinñá: “Nda̱a̱ táki̱ʼva ni̱ka̱ʼún xíʼi̱n saá keʼévai̱”.
6 Tasaá nda̱kiʼinñá ku̱a̱ʼa̱nñá chí nu̱ú ndátivina cebada ta ke̱ʼéñá ndiʼi ña̱ ni̱ka̱ʼa̱n si̱soñá xíʼinñá.
7 Ta̱ Boaz ndi̱ʼi xi̱xira ta ki̱xáʼa kúsi̱íní-inira. Tasaá nda̱kiʼinra ku̱a̱ʼa̱nra kandúʼura chí nu̱ú ndóo cebada. Tándi̱ʼi, kúee kuití ku̱yatin ñá Rut nu̱ú kánduʼúra ta nda̱niʼiñá ti̱ko̱to̱ ña̱ ndási sa̱tára ta nda̱kandúʼuñá xa̱ʼa̱ra.
8 Ta tá xa̱a̱ kúúña savañuú,* ki̱xáʼa vi̱xinní xíʼi̱ra,* ña̱kán nda̱koora ta xi̱nira kánduʼú iin ñaʼá xa̱ʼa̱ra.
9 Tasaá ni̱nda̱ka̱tu̱ʼunra: “¿Ndáa ndóʼó kánduʼú xa̱ʼíi̱?”.* Ta ñákán nda̱kuiinñá: “Ñá Rut kúi̱ táta. Chindeétáʼan xíʼi̱n* chi yóʼó kúú ta̱ kivi ndasatá* yi̱ʼi̱”.
10 Ta ta̱ Boaz ni̱ka̱ʼa̱nra xíʼinñá: “Mií Jehová ná taxi ña̱ va̱ʼa ndaʼún siʼí. Saáchi ña̱ʼa ña̱ ke̱ʼún tá ya̱chi̱ ni̱na̱ʼa̱ña ña̱ ndixaní kúʼvi̱-iniún* xíniún inkana, soo xíʼin ña̱ kéʼún vitin va̱ʼaníka náʼún ña̱yóʼo, chi va̱ása níndukún iin ta̱ loʼo koo xíʼún, ni kúúra ta̱ nda̱ʼví á ta̱ ku̱i̱ká.
11 Va̱ása yi̱ʼvíún siʼí. Keʼévai̱ ndiʼi ña̱ ni̱ka̱ʼún, chi ñuu yóʼo ndiʼina kúnda̱a̱-ini ña̱ iin ñaʼá ñá va̱ʼaní kúún.
12 Ni kiviva ndasatái̱ yóʼó, soo íyo inka ta̱ táʼan yatinndi̱ ta̱ kivi ndasatá yóʼó.
13 Kivi kindo̱vaún ku̱sún yóʼo. Tá ná tu̱vi saá kotoyó á kandíxara ndasatára yóʼó. Soo tá va̱ása níxiinra ndasatára yóʼó, chínaʼíi̱* xa̱ʼa̱ Jehová, Ndióxi̱ ta̱ táku ña̱ ndasatávai̱ yóʼó. Ña̱kán yóʼo kandúʼún nda̱a̱ ná tu̱vi”.
14 Ña̱kán, xa̱ʼa̱ra kán ki̱ndooñá ni̱ki̱si̱ñá nda̱a̱ tá ni̱tu̱vi ta ya̱chi̱ní nda̱ko̱oñá ña̱ va̱ʼa ku̱ʼu̱nñá tasaá va̱ása ndakuninañá. Saáchi va̱ása níxikuni̱ra ná kunda̱a̱-ini inkana ña̱ ni̱xa̱ʼa̱n iin ñaʼá nu̱ú ndátivira cebada.
15 Ta ni̱ka̱ʼa̱nra xíʼinñá: “Ndandika ti̱ko̱to̱ káni̱ ña̱ ndíxiún ta kútu̱va̱ʼa* tiúnña”. Nani tíinñá ti̱ko̱to̱ yóʼo, ta̱ Boaz chi̱kaa̱ra 25 kilo* ña̱ cebada nu̱úña. Tándi̱ʼi, nda̱niʼira ña̱yóʼo ta ta̱xiraña ndaʼa̱ñá kundisoñá ku̱ʼu̱nñá, tasaá nda̱kiʼinñá ku̱a̱ʼa̱nñá chí ñuu.
16 Saá ndi̱xaa̱ñá veʼe si̱soñá, ta ñákán ni̱nda̱ka̱tu̱ʼunñáñá: “¿Á va̱ʼa loʼo ni̱xa̱ʼún siʼí?”. Tasaá na̱túʼun ñá Rut xíʼin si̱soñá xa̱ʼa̱ ndiʼi ña̱ ke̱ʼé ta̱ Boaz
17 ta ni̱ka̱ʼa̱nkañá: “Ta̱xira ndiʼi cebada yóʼo ndaʼíi̱, ta ni̱ka̱ʼa̱nra xíʼi̱n ‘Kuniʼi ña̱yóʼo ku̱ʼu̱n xíʼún nu̱ú si̱soún’”.
18 Tasaá ni̱ka̱ʼa̱n ñá Noemí xíʼinñá: “Siʼí, ná kundatuyó ña̱ va̱ʼa kuniyó ndáaña keʼékara, chi saxínuvara ña̱ ni̱ka̱ʼa̱nra xíʼún”.
Nota
^ Inka variante “kundúʼura”, “kondúʼú síi̱nra”.
^ Inka variante “ma̱ʼñúñuú”.
^ Inka variante “vi̱xi xíníra”.
^ Á “¿Yukú yóʼó?”.
^ Tu̱ʼun ña̱ ni̱ka̱ʼyi̱ña káchiña “Sakáa̱ ti̱ko̱to̱ún sa̱tái̱”.
^ Inka variante “kueen”.
^ Koto glosario, ña̱ ndixaní kúʼvi̱-ini.
^ Inka variante “tuunva̱ʼa”.
^ Tu̱ʼun ña̱ ni̱ka̱ʼyi̱ña káchiña “i̱ñu̱ medida”. Ña̱yóʼo sana káʼa̱nña xa̱ʼa̱ i̱ñu̱ sea. Koto apéndice B14.
