Nu̱ú Biblia ni̱ka̱ʼyi̱ tu̱ʼun Ndióxi̱ ña̱ va̱ʼa kunda̱a̱-iniyó xa̱ʼa̱ña. Xíniñúʼu kaʼviyóña ña̱ va̱ʼa kuxini̱yó Ndióxi̱ (Juan 17:3; 2 Timoteo 3:16). Nu̱ú ña̱yóʼo káʼa̱n Jehová Ndióxi̱ ndáaña kúni̱ra keʼéra xa̱ʼa̱ na̱ yiví ta saátu ndáaña keʼéra xíʼin ñuʼú yóʼo (Génesis 3:15; Apocalipsis 21:3, 4).

Kǒo inka libro ña̱ va̱ʼaní chíndeétáʼan xíʼin na̱ yiví, chi iinlá Biblia kúú ña̱ kéʼé ña̱yóʼo. Biblia chíndeétáʼanña xíʼinyó ña̱ na̱ʼa̱yó ña̱ va̱ʼa táʼan ña̱ kúúmií Jehová, tá kúú ña̱ kuʼvi̱-iniyó kuniyó inkana, ña̱ kundáʼvi-iniyó kuniyó inkana ta ixakáʼnu-iniyó xa̱ʼa̱na. Saátu chíndeétáʼanña xíʼin na̱ xóʼvi̱ ña̱ va̱ʼa kundeé-inina ta kundatuna ña̱ koo ña̱ va̱ʼa chí nu̱únínu. Saátu káʼa̱nña xa̱ʼa̱ ña̱ʼa ña̱ kúu ñuyǐví yóʼo, ña̱ kǒo níxikuni̱ Ndióxi̱ kuu (Salmo 119:105; Hebreos 4:12; 1 Juan 2:15-17).

Tu̱ʼun hebreo, arameo xíʼin tu̱ʼun griego kúú ña̱ ni̱ka̱ʼyi̱ Biblia, ta xa̱a̱ yáʼaka 3,000 nu̱ú tu̱ʼun íyo iníísaáña á iin táʼvíña. Ta ña̱yóʼo kúú ña̱ sándaya̱ʼaníkana nu̱ú inkaka tu̱ʼun ta ku̱a̱ʼánína kúúmií ña̱yóʼo. Va̱ása xíniñúʼu ndakanda̱-iniyó xíʼin ña̱yóʼo saáchi iin profecía káʼa̱nña ña̱yóʼo xa̱ʼa̱ ña̱ ndáyáʼviní káʼa̱n Biblia xa̱ʼa̱: “Natúʼunna tu̱ʼun va̱ʼa xa̱ʼa̱ Reino Ndióxi̱ iníísaá nu̱ú ñuʼú yóʼo ña̱ va̱ʼa kunda̱a̱-ini ndiʼi na̱ yiví tasaá ndiʼi-xa̱ʼa̱ ñuyǐví” (Mateo 24:14).

Xa̱ʼa̱ ña̱ kúnda̱a̱-inindi̱ ña̱ ndáyáʼviní ña̱ va̱xi nu̱ú Biblia, ki̱xáʼandi̱ xítondi̱ ndáa ki̱ʼva viíka koo ña̱ va̱xi nu̱ú Biblia, saáchi íxato̱ʼóníndi̱ ña̱ káʼa̱nña. Kúnda̱a̱-inindi̱ ña̱ ndáyáʼviní káxi koo ña̱ káʼa̱n tu̱ʼun Ndióxi̱, ña̱kán chíkaa̱níndi̱ ndee̱ ña̱ keʼéndi̱ ña̱yóʼo. Nu̱ú ña̱ Traducción del Nuevo Mundo ña̱ xa̱a̱ yáʼaka 60 ku̱i̱ya̱ ka̱na ña̱ tu̱ʼun inglés, kúú ña̱ ta̱vándi̱ ña̱ sa̱ndáya̱ʼandi̱ yóʼo. Soo xa̱ʼa̱ ña̱ xa̱a̱ ni̱ya̱ʼa ku̱a̱ʼání ku̱i̱ya̱, ku̱a̱ʼa̱n nása̱ma tu̱ʼun ña̱ káʼa̱n na̱ yiví. Xa̱ʼa̱ ña̱kán, ndi̱ʼi̱ na̱ ñúʼu ti̱xin Comité ña̱ Traducción de la Biblia del Nuevo Mundo, ki̱xáʼa tukundi̱ xi̱tondi̱ ndáa ki̱ʼva viíka koo ña̱ va̱xi nu̱ú Biblia. Tá sa̱ndáya̱ʼandi̱ Biblia yóʼo xi̱ndiku̱nndi̱ ki̱ʼva ña̱ ni̱ka̱ʼyi̱ña tiempo xi̱naʼá, soo saátu chi̱kaa̱ndi̱ ndee̱ ña̱ káxi ná koo ña̱ ka̱ʼa̱nña ta va̱ása ixayo̱ʼvi̱ña xíʼinna tá ná kaʼvinaña. Apéndice yóʼo káʼa̱nña xa̱ʼa̱ ña̱ ki̱ʼinndi̱ kuenta xíʼin tá sa̱ndáya̱ʼandi̱ ña̱ va̱xi nu̱ú Biblia yóʼo (“Criterios para la traducción de la Biblia”, “Características de esta revisión” y “Cómo llegó la Biblia hasta nuestros días”).

Na̱ kúʼvi̱-ini xíni Jehová Ndióxi̱ ta ndásakáʼnunara, kúni̱na kuumiína tu̱ʼun Ndióxi̱ ña̱ káxi ná ka̱ʼa̱n ta kunda̱a̱-inina xíʼinña (1 Timoteo 2:4). Ña̱kán kúú ña̱ ta̱vándi̱ Biblia yóʼo ña̱ tu̱ʼun inglés, chi kúni̱ndi̱ ná sandáya̱ʼanaña nu̱ú ku̱a̱ʼáníka tu̱ʼun. Ña̱kán káʼa̱nndi̱ xíʼin Ndióxi̱ xa̱ʼa̱ ndóʼó na̱ kúni̱ sakúaʼaka xa̱ʼa̱ra ña̱ va̱ʼa ná chindeétáʼan Biblia yóʼo xíʼinndó ña̱ kunda̱a̱-inindó xa̱ʼa̱ra (Hechos 17:27).