Tá ni̱xa̱a̱yó veʼena ta ki̱ta iin na̱ va̱lí, ná nda̱ka̱tu̱ʼunyó xa̱ʼa na̱ yivána, chi saá náʼa̱yó ña̱ íxato̱ʼóyóna (Pr 6:20). Tá káʼa̱n na̱ va̱lí yóʼo xíʼinyó ña̱ ya̱ʼayó veʼena, va̱ása ya̱ʼayó. Tá kǒo kívi natúʼunyó xíʼin yivána, va̱ʼaka ná ndikóyó inka ki̱vi̱.

Ni iin na̱ va̱lí na̱ xa̱a̱ chée kúúna, va̱ʼaka ná nda̱ka̱tu̱ʼunyó xa̱ʼa na̱ yivána. Tá kǒo kívi natúʼunyó xíʼin yivána, ná nda̱ka̱tu̱ʼunyó á táxi na̱ yivána kaʼvina tutu ña̱ kúni̱ miína. Tá káʼa̱nna ña̱ kivi kaʼvinaña, kivi na̱ʼa̱yó sava tutu ña̱ kúúmiíyó nu̱úna á kivitu ka̱ʼa̱nyó xíʼinna ná ki̱ʼvina nu̱ú jw.org.

Tá ná ndikóyó ña̱ natúʼunyó xíʼin iin na̱ va̱lí na̱ kúni̱ ka̱ʼvi, kivi ka̱ʼa̱nyó xíʼinna ña̱ kúni̱yó kuniyó na̱ yivána. Tasaá kivi natúʼunyó xíʼinna nda̱chun ku̱a̱ʼa̱nyó veʼena, ta saátu natúʼunyó xíʼinna xa̱ʼa Biblia xíʼin xa̱ʼa consejo ña̱ va̱xi nu̱úña ña̱ kivi chindeéña miína xíʼin na̱ veʼena (Sl 119:86, 138). Tá saá ná keʼéyó, na̱ yiví ka̱ʼa̱n va̱ʼana xa̱ʼayó ta taxina natúʼunkayó xíʼinna xa̱ʼa tu̱ʼun Ndióxi̱ tá ná ya̱ʼayó nu̱úna inka ki̱vi̱ (1Pe 2:12).