¿Á NDÁKAʼÚN nda̱chun iin ángel Ndióxi̱ ni̱xa̱a̱ra ndu̱ura ta̱ Ndi̱va̱ʼa?... Ni̱nuní xi̱kuni̱ra ta xi̱kuni̱ra ña̱ ná ndasakáʼnuna miíra; xa̱ʼa̱ ña̱kán ni̱xa̱a̱ra ni̱sa̱a̱ inira xi̱nira Ndióxi̱. ¿Á ki̱xaa̱ inka na̱ ángel nda̱kutáʼanna xíʼin ta̱ Ndi̱va̱ʼa?... Kixaa̱vana. Biblia káʼa̱nña ña̱ nanína ángel ta̱ Ndi̱va̱ʼa á ta̱chí Ndi̱va̱ʼa (Apocalipsis 12:​9).

¿Á kándíxa na̱ ángel Ndi̱va̱ʼa yóʼo Ndióxi̱?... Tu̱ʼun Ndióxi̱ káʼa̱nña ‘nda̱a̱ na̱ ta̱chí ndi̱va̱ʼa kándíxana ña̱ íyo Ndióxi̱’ (Santiago 2:19). Tiempo vitin yíʼvivana Ndióxi̱, saáchi kúnda̱a̱-inina ña̱ taxira castigo ndaʼa̱na xa̱ʼa̱ ndiʼi ña̱ va̱ása va̱ʼa kéʼéna. ¿Ndáaña kúú ña̱yóʼo?...

Biblia káʼa̱nña ña̱ sa̱ndákoona ndiví chí nu̱ú ni̱xi̱yona ta ki̱xaa̱na nu̱ú ñuʼú yóʼo ña̱ va̱ʼa koona nda̱a̱ táki̱ʼva íyo na̱ yiví. Ke̱ʼéna ña̱yóʼo saáchi xi̱kuni̱na ku̱su̱nna xíʼin ná ñaʼá ná liviní ni̱xi̱yo nu̱ú ñuʼú yóʼo (Génesis 6:​1, 2; Judas 6). ¿Ndáaña xíni̱ún xa̱ʼa̱ ña̱ kísi̱ xíʼin táʼanna?...

Tá xa̱a̱ tíndaʼa̱ iin ta̱a xíʼin iin ñaʼá xáa̱na kísi̱ xíʼin táʼanna. Ta saá kúú ña̱ xáa̱na íyo se̱ʼena ta kúva̱ʼa ña̱ loʼo yóʼo ti̱xin siʼíña. Ndióxi̱ kúnira na̱ tíndaʼa̱ kuití ná keʼé saá. Tasaá, tá ná kaku ña̱ loʼo yóʼo u̱vi̱ saána sákuaʼnuña. Soo na̱ ángel va̱ása kívi keʼéna ña̱yóʼo.

Na̱ ángel ndu̱una táki̱ʼva íyo na̱ yiví ta ni̱xa̱a̱na ni̱ki̱si̱na xíʼin ná ñaʼá, ta ka̱ku se̱ʼena ta na̱yóʼo súkunní ni̱xi̱yona. Na̱yóʼo ndi̱va̱ʼaní ni̱xi̱yona ta xi̱kanitáʼannína xíʼin na̱ yiví. Xa̱ʼa̱ ña̱kán Ndióxi̱ sa̱kúunra sa̱vi̱ kini nu̱ú ñuʼú yóʼo ta sa̱ndíʼi-xa̱ʼa̱ra na̱ súkunní ni̱xi̱yo ta saátu ndiʼi na̱ yiví na̱ xi̱keʼé ña̱ kini. Soo ta̱xira ña̱ ná ixava̱ʼa ta̱ Noé iin arca, á iin barco tú káʼnuní, ña̱ va̱ʼa ka̱ku na̱ yiví na̱ xi̱keʼé ña̱ va̱ʼa. Ta̱ Jesús ni̱ka̱ʼa̱nra ña̱ ndáyáʼviní ndakaʼányó xa̱ʼa̱ ña̱ ku̱u tá ku̱un sa̱vi̱ kini (Génesis 6:​3, 4, 13, 14; Lucas 17:​26, 27).

¿Á xíniún ndáaña ke̱ʼé na̱ ángel Ndi̱va̱ʼa tá ku̱un sa̱vi̱ kini?... Na̱yóʼo ndi̱kóna chí ndiví ta sa̱ndákoona ña̱ ni̱xi̱yona táki̱ʼva íyo na̱ yiví. Va̱ása níkivika koona ángel Ndióxi̱, chi ni̱xa̱a̱na ndu̱una ángel ta̱ Ndi̱va̱ʼa. Ta ¿Ndáaña ku̱u xíʼin se̱ʼena na̱ súkunní ni̱xi̱yo?... Tá ku̱un sa̱vi̱ kini, ni̱xi̱ʼi̱na xíʼin ndiʼika na̱ yiví na̱ kǒo níxiniso̱ʼo Ndióxi̱.

Tándi̱ʼi ku̱un sa̱vi̱ kini, Ndióxi̱ va̱ása nítaxikara ña̱ nduu na̱ ta̱chí Ndi̱va̱ʼa táki̱ʼva íyo na̱ yiví. Ni va̱ása kivi kotoyó na̱ ta̱chí Ndi̱va̱ʼa yóʼo, soo ndákundeé na̱yóʼo sándaʼvina na̱ yiví ña̱ keʼéna ña̱ kini. Tiempo vitin ku̱a̱ʼání tu̱ndóʼo íyo nu̱ú ñuʼú yóʼo, chi yóʼo íyo na̱ ta̱chí ndi̱va̱ʼa.

¿Á xíniún nda̱chun kǒo kivi kuniyó na̱ ta̱chí ndi̱va̱ʼa?... Saáchi espíritu kúúna. Soo, kúnda̱a̱-iniyó ña̱ íyovana. Tu̱ʼun Ndióxi̱ káʼa̱nña ta̱ Ndi̱va̱ʼa xíniñúʼura na̱ ta̱chí Ndi̱va̱ʼa ña̱ sándaʼvira na̱ yiví iníísaá ñuyǐví (Apocalipsis 12:​9, 12).

¿Á kuchiñu ta̱ Ndi̱va̱ʼa xíʼin na̱ ta̱chí Ndi̱va̱ʼa sandáʼvina miíyó?... Sándaʼvivana miíyó, tá kǒo kiʼinyó kuenta. Soo, va̱ása xíniñúʼu yi̱ʼvíyó. Ta̱ Jesús ni̱ka̱ʼa̱nra ña̱yóʼo: ‘ta̱kán kǒo kuchiñura xíʼi̱n’. Tá yatin ná kooyó nu̱ú Ndióxi̱, ta̱kán kundaara miíyó nu̱ú ta̱ Ndi̱va̱ʼa xíʼin na̱ ta̱chí Ndi̱va̱ʼa ( Juan 14:30).

Ndáyáʼviní kunda̱a̱-iniyó ndáa ña̱ʼa kúú ña̱ kúni̱ ta̱ Ndi̱va̱ʼa xa̱a̱yó keʼéyó. ¿Á xíniún ndáa ña̱ʼa kúú ña̱ va̱ása va̱ʼa ke̱ʼé na̱ ta̱chí Ndi̱va̱ʼa tá ki̱xina nu̱ú ñuʼú yóʼo?... Tá kúma̱ní kuun sa̱vi̱ kini, ni̱ki̱si̱na xíʼin ná ñaʼá ta náyóʼo va̱ása níxiniñúʼu keʼéna ña̱yóʼo. Na̱ ta̱chí Ndi̱va̱ʼa, kúsi̱íní-inina tá xítona ña̱ na̱ yiví va̱ása ndíku̱nna ña̱ káʼa̱n ley Ndióxi̱. ¿Á ndákaʼún ndáana kúú na̱ kivi keʼé ña̱yóʼo?... Ndixava, ndasaa na̱ tindaʼa̱ kuití kivi keʼéña.

Tiempo vitin íyo na̱ va̱lí kúa̱an na̱ kísi̱ xíʼin táʼan, ta iin ña̱ kini kúú ña̱yóʼo. Biblia káʼa̱nña nu̱ú yi̱i̱ na̱ ta̱a naniña pene (Levítico 15:​1-3). Ta nu̱ú yi̱i̱ ná ñaʼá naniña vulva. Jehová ixava̱ʼara táʼví ku̱ñuyó yóʼo ña̱ va̱ʼa kusi̱íní-ini ndasaa na̱ tindaʼa̱ kuití xíʼin ña̱yóʼo. Na̱ ta̱chí Ndi̱va̱ʼa kúsi̱íní-inina tá kéʼé na̱ yiví ña̱ʼa ña̱ kúndasí Jehová xínira, tá kúú, tá iin ta̱ loʼo xíʼin iin ñá loʼo sísikí ndaʼa̱na nu̱ú yi̱i̱na. ¿Á su̱ví ña̱ nda̱a̱ kúúña va̱ása kuni̱yó sakúsi̱íyó-ini na̱ ta̱chí Ndi̱va̱ʼa?...

Íyo inka ña̱ʼa ña̱ kútóoní na̱ ta̱chí Ndi̱va̱ʼa, soo Jehová sáa̱-inira xínira ña̱yóʼo. ¿Á xíniún ndáaña kúúña?... Ña̱ kánitáʼanna (Salmo 11:​5). Na̱ yiví na̱ kútóoní kanitáʼan sáxo̱ʼvi̱nína inkana. Ndakaʼún, chi ña̱yóʼo kúú ña̱ xi̱keʼé na̱ yiví na̱ súkunní ni̱xi̱yo, na̱ xi̱kuu se̱ʼe na̱ ta̱chí Ndi̱va̱ʼa.

Na̱ ta̱chí Ndi̱va̱ʼa kútóonína sayíʼvina na̱ yiví. Sava yichi̱ nda̱saana miína nda̱a̱ táki̱ʼva ni̱xi̱yo iin na̱ yiví na̱ xa̱a̱ ni̱xi̱ʼi̱, ta nda̱a̱ xi̱kaʼa̱nna nda̱a̱ táki̱ʼva xi̱kaʼa̱n na̱yóʼo. Ta saá, sándaʼvina ku̱a̱ʼání na̱ yiví chi ndákanixi̱nína ña̱ tákukava na̱ ni̱xi̱ʼi̱ ta kivika ka̱ʼa̱nna xíʼin na̱yóʼo. Xa̱ʼa̱ ña̱kán íyo ku̱a̱ʼání na̱ yiví na̱ kándíxa ña̱ íyo ña̱ yíʼna á fantasma.

Ña̱kán, xíniñúʼu koo tu̱ʼvaníyó ta saá va̱ása sándaʼvi ta̱ Ndi̱va̱ʼa miíyó ni na̱ ta̱chí Ndi̱va̱ʼa. Biblia káʼa̱nña xíʼinyó: ‘ta̱ Ndi̱va̱ʼa ndáasara miíra nda̱a̱ táki̱ʼva íyo iin ángel ta̱ va̱ʼa, saátu kéʼé na̱ ndíku̱nra’ (2 Corintios 11:​14, 15). Soo mií ña̱ nda̱a̱, su̱ví na̱ va̱ʼaví kúú na̱yóʼo. Ná kotoyó ndáa ña̱ʼa kúú ña̱ xíniñúʼuna ña̱ va̱ʼa sándaʼvina miíyó.

¿Ndáa mií sákuaʼaní na̱ yiví ña̱ kanitáʼanna, ña̱ kísi̱na xíʼin táʼanna tá kúma̱níka tindaʼa̱na ta saátu xa̱ʼa̱ na̱ ta̱chí Ndi̱va̱ʼa?... ¿Á su̱ví nu̱ú tele, videojuego, Internet xíʼin nu̱ú libro kána ña̱yóʼo? Ndiʼi ña̱ ni̱ka̱ʼa̱nyó xa̱ʼa̱ yóʼo ¿Á sákuyatinña miíyó nu̱ú Jehová á nu̱ú ta̱ Ndi̱va̱ʼava? ¿Ndáaña túviún?...

¿Ndáana kúni ná kuniso̱ʼoyó ta saátu kotoyó ña̱ kini?... Ta̱ Ndi̱va̱ʼa xíʼin na̱ ta̱chí Ndi̱va̱ʼa. Ña̱kán, ¿Ndáaña xíniñúʼu keʼéyó?... Xíniñúʼu kaʼviyó, kuniso̱ʼoyó ta saátu kotoyó ña̱ chindeétáʼan xíʼinyó ña̱ kachíñukayó nu̱ú Jehová. ¿Á kivi ka̱ʼún xa̱ʼa̱ savaña?...

Tá kéʼéyó ña̱ va̱ʼa, kǒo xíniñúʼu yi̱ʼvíviyó na̱ ta̱chí Ndi̱va̱ʼa, saáchi íyoka ndee̱ ta̱ Jesús nu̱ú na̱yóʼo. Iin yichi̱, na̱ ta̱chí Ndi̱va̱ʼa yíʼvinína ni̱nda̱ka̱tu̱ʼunnara: “¿Á va̱xiún sandíʼi-xa̱ʼún ndi̱ʼi̱?” (Marcos 1:24). Kusi̱íní-iniyó tá ná sandíʼi-xa̱ʼa̱ ta̱ Jesús na̱yóʼo... Nani ndátuyó kixaa̱ ki̱vi̱ yóʼo, kándíxaníyó ña̱ kundaa ta̱ Jesús miíyó nu̱ú na̱yóʼo, ta ná kandíxayó ña̱ káʼa̱nra ta saátu ña̱ káʼa̱n yivára.