CAPÍTULO 8

¿Ndáa ki̱ʼva ndani̱ʼíyó na̱ vií kutáʼan xíʼinyó?

“Tá sáíi̱, ku̱nii̱ natúʼi̱n xíʼin iinna xa̱ʼa̱ ña̱ ndóʼi̱. Tá kúsuchí-inii̱, kúnii̱ kuniso̱ʼi̱ ña̱ va̱ʼava kana ña̱ kúnii̱ keʼíi̱. Tá kúsi̱í-inii̱, saátu kúnii̱ natúʼi̱n xíʼin iinna xa̱ʼa̱ ña̱ kúsi̱íní-inii̱. Nu̱ú yi̱ʼi̱, ndáyáʼviníva na̱ migoyó.” (Ñá Brittany)

SAVANA káʼa̱nna na̱ va̱lí xíniñúʼuna na̱ kusíkí xíʼinna, ta na̱ va̱lí kúa̱an, ña̱ koo migona. Soo ¿ndáaña násama?

Na̱ sasíkí xíʼún loʼova tiempo kitáʼanna xíʼún.

Iin na̱ migoún chika̱a̱na nde̱e xíʼún.

Ña̱ Biblia káʼa̱nña xíʼinyó, iin migo na̱ ndixa “ndiʼi tiempo kúʼvi̱-inina xínina miíyó, tá íyo tu̱ndóʼo nu̱úyó nda̱a̱ táki̱ʼva íyo iin ñaniyó a ku̱ʼvayó saá íyona xíʼinyó” (Proverbios 17:17). Ña̱kán, ña̱ vií kitáʼan u̱vi̱ na̱ migo ndakúníkaña nu̱úka ña̱ kitáʼan u̱vi̱ na̱ va̱lí tá sasíkína.

Ña̱ nda̱a̱ kúúña, nani xáʼnún ku̱a̱ʼún, xíniñúʼu koo migoún na̱...

1) ... kúúmií ña̱ va̱ʼa.

2) ... ndíku̱n principio ña̱ va̱xi nu̱ú Biblia.

3) ... chindeétáʼan xíʼún ña̱ kéʼún ña̱ va̱ʼa.

Xa̱ʼa̱ ña̱kán, xíniñúʼu nda̱ka̱tu̱ʼún xíʼin miíún á kéʼé na̱ migoún ña̱ xa̱a̱ ni̱ka̱ʼa̱nyó xa̱ʼa̱. Ná kotoyó ndáaña kúni̱ kachi iin tá iin ña̱yóʼo.

Ña̱ nu̱ú: Ña̱ va̱ʼa ña̱ kúúmiína

Ña̱ xíniñúʼu kunda̱a̱-iniún xa̱ʼa̱. Ku̱a̱ʼánína káʼa̱n ña̱ kúúna migoún soo loʼova kúú na̱ náʼa̱ ña̱ ndixa kúúna migoún. Tu̱ʼun Ndióxi̱ káchiña “íyo sava na̱ migoyó na̱ saxóʼvi̱-iniyó” (Proverbios 18:​24, Nueva Traducción Viviente [NTV]). Sana ndakanda̱-iniún xíʼin ña̱yóʼo, soo ndakanixi̱ní xa̱ʼa̱ ña̱yóʼo: ¿á xa̱a̱ kúúmiíún iin na̱ “migo” na̱ xi̱ndaaní-iniún soo ke̱ʼéna iin ña̱ va̱ása va̱ʼa xíʼún, á ña̱ ni̱ka̱ʼa̱nna ña̱ va̱ása va̱ʼa xáʼún tá ko̱ún íyó á ni̱ka̱ʼa̱nna tu̱ʼun vatá xaʼún? Na̱ ke̱ʼé saá kivi sandíʼi-xa̱ʼa̱na ña̱ vií kítáʼanna a. Ta káʼa̱nyó xa̱ʼa̱ na̱ migo, ndáyáʼviníka ña̱ vií kutáʼún xíʼinna nu̱úka ña̱ koo ku̱a̱ʼá na̱ migoún.

Ña̱ kivi keʼún. Ndaka̱xín na̱ migoún na̱ kúúmií ña̱ va̱ʼa.

“Ndiʼina va̱ʼaní káʼa̱nna xa̱ʼa̱ migai̱ ñá Fiona. Kúnii̱ koi̱ nda̱a̱ táki̱ʼva íyo ñáyóʼo ta vií ná ka̱ʼa̱nna xa̱ʼíi̱. Kutóoníi̱ ki̱ʼva íyoña.” (Ñá Yvette, ñá kúúmií 17 ku̱i̱ya̱.)

Keʼé ña̱yóʼo:

1. Kaʼvi Gálatas 5:​22, 23.

2. Nda̱ka̱tu̱ʼún miíún ña̱yóʼo: “¿Á kúúmií na̱ migoi̱ ña̱ va̱ʼa ña̱ kúúmií ‘espíritu santo Ndióxi̱’?”.

3. Kaʼyí ki̱vi̱ na̱ migoún na̱ va̱ʼaní kítaún xíʼi̱n ta kaʼyí ña̱ va̱ʼa ña̱ kúúmiína.

Ki̱vi̱na

․․․․․

Ña̱ kúúmiína

․․․․․

Ña̱ kivi chindeétáʼan xíʼún: Tá ndákanixi̱níún xa̱ʼa̱ ña̱ va̱ása va̱ʼa kúúmií na̱yóʼo, sana xíniñúʼu nasamaún na̱ migoún.

Ña̱ u̱vi̱: Ná kundiku̱nna principio ña̱ va̱xi nu̱ú Biblia

Ña̱ xíniñúʼu kunda̱a̱-iniún xa̱ʼa̱. Tá ndíʼi̱ní-iniún ña̱ koo na̱ migoún, sana va̱ása va̱ʼa ndaka̱xiún na̱yóʼo. Ta kǒo nandóso iniún xa̱ʼa̱ ña̱ káʼa̱n tu̱ʼun Ndióxi̱: “Na̱ xíka xíʼin na̱ kíʼvi, kǒo ña̱ va̱ʼa nda̱kiʼinna” (Proverbios 13:20). Tá káʼa̱nña tu̱ʼun na̱ “kíʼvi” kǒo káʼa̱nña xa̱ʼa̱ na̱ va̱ása va̱ʼa ku̱a̱ʼa̱n escuela á na̱ va̱ása ndíchi xi̱ní, chi na̱ káʼa̱nña xa̱ʼa̱ kúú na̱ va̱ása vií ndákanixi̱ní xíʼin na̱ so̱ʼoní. Ta sana miíún kǒo kúni̱ún koo migoún táʼan na̱yóʼo, ¿á su̱ví saá?

Ña̱ kivi kéʼún. Vií ndaka̱xiún na̱ koo migoún (Salmo 26:4). Ña̱yóʼo va̱ása kuni kachiña ña̱ keʼún iin grupo loʼo ta sava kuití na̱ yiví ki̱ʼvi ti̱xin ña̱ grupo yóʼo. Chi ña̱yóʼo, kúni̱ kachiña, ña̱ “ndakuniyó ndáana kúú na̱ va̱ʼa ta ndáana kuu na̱ va̱ása va̱ʼa, ndáana kúú na̱ káchíñu nu̱ú Ndióxi̱ ta ndáana kúú na̱ va̱ása kachíñu nu̱úra” (Malaquías 3:18).

“Kúsi̱íní-inii̱ chi na̱ yivái̱ chíndeétáʼanna xíʼi̱n ña̱ ndani̱ʼíi̱ na̱ va̱ʼa kutáʼan xíʼi̱n, na̱ kúúmií ku̱i̱ya̱ ña̱ kúúmiíi̱ ta va̱ʼa kítáʼanna xíʼin Ndióxi̱.” (Ta̱ Christopher, ta̱ kúúmií 13 ku̱i̱ya̱.)

Ndakuiin pregunta yóʼo:

¿Á yíʼviún ña̱ ka̱ʼa̱n na̱ migoún xíʼún ña̱ keʼún ña̱ va̱ása va̱ʼa?

□ Yíʼvivai̱

□ Va̱ása

¿Á kǒo xíún kuxini̱ na̱ yiváún na̱ migoún saáchi túviún ña̱ va̱ása kutóona ña̱ kutáʼún xíʼinna?

□ Kúni̱vai̱

□ Va̱ása

Ña̱ kivi chindeétáʼan xíʼún: Tá va̱ása va̱ʼa níndakuiún u̱vi̱ saá pregunta yóʼo, xíniñúʼún nandukún na̱ kéʼé ña̱ va̱ʼa ña̱ kutáʼanna xíʼún, ta kúú na̱ hermano na̱ xíni̱ va̱ʼa xa̱ʼa̱ Ndióxi̱.

Ña̱ u̱ni̱: Kutáʼan xíʼin na̱ ndixa kivi chindeétáʼan xi̱ún

Ña̱ xíniñúʼu kunda̱a̱-iniún xa̱ʼa̱. Tu̱ʼun Ndióxi̱ káchiña “tá kítáʼanndó xíʼin na̱ yiví na̱ kéʼé ña̱ va̱ása va̱ʼa, nandósóndó keʼéndó ña̱ va̱ʼa” (1 Corintios 15:​33, NTV). Saá ndo̱ʼo ñá Lauren. “Xi̱kuni̱ kutáʼi̱n xíʼin ná xi̱kaʼvi xíʼi̱n escuela. Ña̱ va̱ʼa kutáʼi̱n xíʼinna xi̱xiniñúʼu keʼíi̱ ndiʼi ña̱ xi̱ka̱ʼa̱nna xíʼi̱n. Xa̱ʼa̱ ña̱ xi̱kuni mitúʼi̱n, ki̱xáʼíi̱ kéʼíi̱ táʼan ña̱ xi̱keʼéna.” Ña̱ nda̱a̱ kúúña, tá kéʼéyó ña̱ káʼa̱n inkana xíʼinyó, nda̱a̱ táki̱ʼva ke̱ʼé ñá Lauren, kivi keʼéna ña̱ kúni̱ miína xíʼinyó. ¿Á kúniún ña̱ keʼéna ña̱yóʼo xíʼún?

Ña̱ kivi keʼún. Kuxíká nu̱ú na̱ yiví na̱ kúni̱ nasama ki̱ʼva ña̱ íyoún chi kuni̱na keʼún ña̱ kúni̱ miína. Sana si̱lóʼova koo na̱ migoún, soo va̱ʼaníka kuniún tá ná keʼún ña̱yóʼo. Ta kivi ndani̱ʼún na̱ migoún na̱ ndixa chindeétáʼan xíʼún (Romanos 12:2).

“Iin ta̱ va̱ʼaní ki̱táʼan xíʼi̱n kúú ta̱ Clint. Ta̱yóʼo kíʼinníra kuenta xíʼin ña̱ kéʼéra ta kúnda̱a̱-inira xíʼin ña̱ ndóʼi̱ ta chíkaa̱níra ndee̱ xíʼi̱n.” (Ta̱ Jason, ta̱ kúúmií 21 ku̱i̱ya̱.)

Ndakuiin pregunta yóʼo:

¿Á násamaún ki̱ʼva ña̱ ndíxiún, ña̱ káʼún á ña̱ kéʼún ña̱ va̱ʼa sakúsi̱íún-ini na̱ migoún?

□ Násamavaiña

□ Va̱ása

¿Á xa̱ʼa̱ ña̱ kúni̱ kuitíún kutáʼún xíʼin na̱kán xáʼún lugar nu̱ú va̱ása xíniñúʼu ku̱ʼún?

□ Xáʼa̱nvai̱

□ Va̱ása

Ña̱ kivi chindeétáʼan xíʼún: Tá va̱ása va̱ʼa níndakuiún u̱vi̱ saá pregunta yóʼo, ka̱ʼa̱n xíʼin na̱ yiváún á inka na̱ xa̱a̱ xu̱xa-ini ña̱ ná chindeé-táʼanna xíʼún ña̱ vií ndaka̱xiún na̱ koo migoún na̱ ndixa kivi chindeétáʼan xíʼún. Tá testigo Jehová kúún, kivi ka̱ʼún xíʼin na̱ anciano ti̱xin congregación ña̱ ná chindeé-táʼanna xíʼún.

NDANI̱ʼÍKAÚN ÑA̱ KÁʼA̱N XA̱ʼA̱ ÑA̱YÓʼO NUÚ CAPÍTULO 9 ÑA̱ VOLUMEN U̱VI̱

NU̱Ú INKA CAPÍTULO

¿Á xa̱a̱ kúni̱ún keʼún ña̱ va̱ása va̱ʼa sava yichi̱ á inkana káʼa̱nna xíʼún ña̱ ná keʼúnña?

[Nota]

TEXTO ÑA̱ KÁXINÍ KÁʼA̱N

“Íyo na̱ migo na̱ va̱ʼaníka kítáʼan xíʼinyó nu̱úka na̱ veʼeyó.” (Proverbios 18:24)

ÑA̱ KIVI KEʼÚN

Chika̱a̱ ndee̱ keʼún ña̱ káʼa̱n Ndióxi̱. Ta saá na̱ kúni̱ keʼé táʼa̱n ña̱ kúni̱ miíún keʼún kuyatinna nu̱ún. ¡Ta na̱yóʼo va̱ʼa xa̱a̱na koona migoún!

¿Á XA̱A̱ XÍNI̱ÚN XA̱ʼA̱ ÑA̱YÓʼO?

Ndióxi̱ kǒo ndáka̱xin kuitíra ndáana koo migora, soo kíʼinra kuenta ndáana kivi xa̱a̱ koo migora (Salmo 15:​1-5).

¡ÑA̱ XÍNIÑÚʼU KEʼÚN!

¿Ndáaña kivi keʼíi̱ ña̱ va̱ʼa ndani̱ʼíi̱ na̱ migo na̱ va̱ʼa? ․․․․․

Na̱yóʼo kúú na̱ yiví na̱ xa̱a̱ chée na̱ kúnii̱ kutáʼi̱n xíʼin: ․․․․․

¿Ndáaña kúnii̱ nda̱ka̱tu̱ʼíi̱n yivái̱ á siʼíi̱ xa̱ʼa̱ ña̱yóʼo? ․․․․․

TA YÓʼÓ, ¿NDÁAÑA NDÁKANIXI̱NÍÚN?

● ¿Ndáaña kúú ña̱ va̱ʼa ña̱ kúúmií na̱ migoún ña̱ ndáyáʼvika nu̱ún? Ka̱ʼa̱n nda̱chun.

● ¿Ndáaña xíniñúʼu viíka kixáʼún keʼún ña̱ va̱ʼa vií kutáʼún xíʼin na̱ migoún?

[Comentario]

‘‘Na̱ yivái̱ ni̱ka̱ʼa̱nna xíʼi̱n ña̱ ná kuxíkái̱ nu̱ú sava na̱ migoi̱. Tá xa̱ʼa̱ kǒo níxii̱n keʼíi̱ ña̱yóʼo saáchi ndakanixi̱níi̱ na̱kán kúú na̱ va̱ʼaní kítáʼi̱n xíʼin. Va̱ʼaníva consejo ta̱xína ndaʼi̱, saáchi tándi̱ʼi, ku̱ndaa̱-inii̱ ña̱ íyokava na̱ yiví na̱ kivi kutáʼi̱n xíʼi̱n.’’ (Ta̱ Carlos)

[Recuadro]

Inkaka ña̱ kivi keʼún

Ka̱ʼa̱n xa̱ʼa̱ña xíʼin na̱ yiváún. Nda̱ka̱tu̱ʼun miína ndáa ki̱ʼva ni̱xi̱yo na̱ migona tá xi̱kuumiína ku̱i̱ya̱ún. ¿Á va̱ása va̱ʼa níndáka̱xínna na̱ migona sava yichi̱? ¿Nda̱chun? Ta ka̱ʼa̱n xíʼinna ndáaña kivi keʼún ña̱ kǒo ki̱ʼviún ku̱a̱chi.

Na̱ʼa̱ na̱ migoún nu̱ú na̱ yiváún. Tá va̱ása kúni̱ún, ndakanixi̱ní nda̱chun. ¿Á íyo iin ña̱ xíni̱ún xa̱ʼa̱ ta kúnda̱a̱-iniún ña̱ kǒo kutóo na̱ yiváún ña̱yóʼo? Tásaá íyoña, sana xíniñúʼu ndaka̱xiún na̱ kitáʼan xíʼún.

Vií va̱ʼa kuniso̱ʼún na̱ migoún. Na̱ʼa̱ nu̱úna ña̱ kúni̱vaún kunda̱a̱-iniún xíʼin ña̱ káʼa̱nna xíʼún ta chíndayáʼviún ña̱ ndíʼi-inina xa̱ʼún (Filipenses 2:4).

Ixakáʼnu-iniún ta kundáʼvi-iniún kuniúnna. Va̱ása kundatún ña̱ xa̱a̱ na̱ migoún keʼéna nina ña̱ va̱ʼa. Nda̱a̱ tá ki̱ʼva káʼa̱n Santiago 3:​2, “Saáchi ndiʼivayó ku̱a̱ʼání yichi̱ kíʼviyó ku̱a̱chi”.

Va̱ása sandíʼúnna. Tá ndixa migoún na̱ nda̱a̱ kúúna, koovana xíʼún ki̱vi̱ ña̱ xíniñúʼunna (Eclesiastés 4:​9, 10).

[Na̱ʼná]

Tá kéʼéyó ña̱ káʼa̱n inkana xíʼinyó, kivi keʼéna ña̱ kúni̱ miína xíʼinyó