CAPÍTULO 37

¿Á xa̱a̱ xíniñúʼu ndakuchii̱?

Ka̱ʼa̱n á ña̱ ndixa kúúña á ña̱ vatá kúúña:

Ndiʼi na̱ ndásakáʼnu Ndióxi̱ xíniñúʼu ndakuchina.

□ Ña̱ ndixa kúúña

□ Ña̱ vatá kúúña

Ndáyáʼviní ña̱ ndakuchiyó chi saá va̱ása ki̱ʼvikayó ku̱a̱chi.

□ Ña̱ ndixa kúúña

□ Ña̱ vatá kúúña

Ña̱ ndakuchiyó chíndeétáʼanña xíʼinyó ña̱ ka̱kuyó.

□ Ña̱ ndixa kúúña

□ Ña̱ vatá kúúña

Tá ta̱ʼán ndakuchii̱ va̱ása ndatiinví Ndióxi̱ ku̱a̱chi xíʼi̱n.

□ Ña̱ ndixa kúúña

□ Ña̱ vatá kúúña

Xa̱ʼa̱ ña̱ xa̱a̱ nda̱kuchi na̱ migoi̱ saátu xíniñúʼu ndakuchi yi̱ʼi̱.

□ Ña̱ ndixa kúúña

□ Ña̱ vatá kúúña

¿Á kéʼún nda̱a̱ táki̱ʼva káʼa̱n Biblia? ¿Á chíka̱ún ndee̱ ña̱ koún migo Ndióxi̱? ¿Á káʼún xa̱a̱ ña̱ kándíxaún xíʼin inka na̱ yiví? Tá xa̱a̱ kéʼún u̱ni̱ saá ña̱yóʼo, soo tá ta̱ʼán ndakuchiún sana xa̱a̱ ndákanixi̱níún keʼún ña̱yóʼo, soo tá kúma̱ní ndakuchiún xíniñúʼu kiʼún kuenta á xa̱a̱ íyo tu̱ʼvaún ña̱ keʼún ña̱yóʼo. Soo iin ña̱ chindeétáʼan xíʼún kúú ña̱ á vií nda̱kuiún ña̱ va̱xi chí xa̱ʼa̱.

● Ndiʼi na̱ ndásakáʼnu Ndióxi̱ xíniñúʼu ndakuchina.

Ña̱ ndixa kúúña. Ña̱yóʼo kúú ña̱ ni̱ka̱ʼa̱n ta̱ Jesús xíʼin na̱ discípulora (Mateo 28:​19, 20). Nda̱a̱ miíra ndakuchiva. Ña̱kán ña̱ va̱ʼa kundikún yichi̱ra saátu miíún xíniñúʼu ndakuchiún, tá xa̱a̱ kúnda̱a̱ va̱ʼa iniún xa̱ʼa̱ tu̱ʼun Ndióxi̱ ta kúni̱ún keʼún ña̱yóʼo.

● Ndáyáʼviní ña̱ ndakuchiyó chi saá va̱ása ki̱ʼvikayó ku̱a̱chi.

Ña̱ vatá kúúña. Tá xa̱a̱ nda̱kuchiún saá kúú ña̱ náʼún nu̱ú na̱ yiví ña̱ xa̱a̱ ndataxiún miíún ndaʼa̱ Jehová. Ndátaxiyó miíyó ndaʼa̱ Jehová chi kúniyó keʼéyó ña̱ káʼa̱nra, va̱ása ndákuchiyó xa̱ʼa̱ ña̱ va̱ása ki̱ʼvi kuitíyó ku̱a̱chi.

● Ña̱ ndakuchiyó chíndeétáʼanña xíʼinyó ña̱ ka̱kuyó.

Ña̱ ndixa kúúña. Nda̱a̱ táki̱ʼva káchi Biblia, ndáyáʼviní ña̱ ndakuchiyó ña̱ va̱ʼa ka̱kuyó (1 Pedro 3:21). Ta su̱ví ña̱ xa̱a̱ nda̱kuchiyó kúni̱ kachiña ña̱ xa̱a̱ ni̱ka̱kuyó. Xíniñúʼu ndakuchiún xa̱ʼa̱ ña̱ kúʼvi̱-iniún xíniún Jehová ta kúni̱ún kachíñún nu̱úra xíʼin ndiʼi níma̱ún ta su̱ví xa̱ʼa̱ ña̱ kúni̱ kuitíún ka̱kún (Marcos 12:​29, 30).

● Tá ta̱ʼán ndakuchii̱ va̱ása ndatiinví Ndióxi̱ ku̱a̱chi xíʼi̱n.

Ña̱ vatá kúúña. Santiago 4:17 káchiña “tá iin na̱ yiví kúnda̱a̱-inina ndáa ña̱ʼa kúú ña̱ va̱ʼa soo va̱ása kéʼéna ña̱yóʼo na̱ xa̱a̱ ni̱ki̱ʼvi ku̱a̱chi kúúna”, ni xa̱a̱ nda̱kuchina á ta̱ʼán ndakuchina. Xa̱ʼa̱ ña̱kán ndakanixi̱ní xa̱ʼa̱ ña̱yóʼo: ¿Á kúnda̱a̱-iniún ndáaña kúni̱ Ndióxi̱ ná keʼún? ¿Á xa̱a̱ kúnda̱a̱ va̱ʼa iniún ndáaña kúni̱ún keʼún? Tásaá, sana xíniñúʼu ka̱ʼún xíʼin na̱ yiváún á xíʼin inkaka na̱ hermano na̱ xa̱a̱ xu̱xa xíʼin tu̱ʼun Ndióxi̱ xa̱ʼa̱ ña̱yóʼo. Na̱yóʼo chindeétáʼanna xíʼún ña̱ va̱ʼa xa̱ún ndakuchiún.

● Xa̱ʼa̱ ña̱ xa̱a̱ nda̱kuchi na̱ migoi̱ saátu xíniñúʼu ndakuchi yi̱ʼi̱.

Ña̱ vatá kúúña. Ña̱ xa̱ún ndakuchiún xíniñúʼu kanaña nda̱a̱ níma̱ún (Salmo 110:3). Ta xíniñúʼu keʼúnña tá xa̱a̱ ku̱nda̱a̱ va̱ʼa iniún ndáaña kúni̱ kachiña ña̱ kooyó ndiʼi tiempo testigo Jehová ta saátu tá va̱ása xíka-iniún ña̱ xa̱a̱ íyo tu̱ʼvaún ña̱ keʼún ña̱yóʼo (Eclesiastés 5:​4, 5).

Tá ná ndakuchiún ku̱a̱ʼání ña̱ va̱ʼa ndakiʼún

Ña̱ ndakuchiún nasamaña ki̱ʼva ña̱ íyoún ta ku̱a̱ʼání bendición ndakiʼún xíʼin ña̱yóʼo. Ta saátu xíniñúʼu kiʼinníún kuenta xíʼin ña̱ kéʼún xíniñúʼu saxínún ndiʼi ña̱ ni̱ka̱ʼún xíʼin Jehová keʼún tá ná ndakuchiún.

Tá xa̱a̱ ku̱nu̱mí ndakuchiún sana kúsi̱íníva-iniún. ¿á íyo inkaka ña̱ sákusi̱íní-iniún ña̱ kachíñún nu̱ú Jehová xíʼin ndiʼi níma̱ún ta na̱ʼún nu̱úra ña̱ ki̱vi̱ tá ki̱vi̱ iinlá nu̱ú miíra kachíñún? (Mateo 22:​36, 37.)

NU̱Ú INKA CAPÍTULO

Sakúaʼún ndáaka ña̱ va̱ʼa keʼún ña̱ va̱ʼa kusi̱í-iniún.

TEXTO ÑA̱ KÁXINÍ KÁʼA̱N

“Ndataxindó miíndó ta saátu ña̱ tákundó ndaʼa̱ Ndióxi̱, ta ná kooña nda̱a̱ táki̱ʼva íyo iin ña̱ yi̱i̱ ña̱ ndakiʼinra; chi saá kúú ña̱ kuniñúʼundó ndiʼi ña̱ ndákanixi̱níndó ña̱ ndasakáʼnundó Ndióxi̱.” (Romanos 12:1)

IIN ÑA̱ KIVI KEʼÚN

Nda̱ka̱tu̱ʼun na̱ yiváún ndáa na̱ hermano á ná hermana kivi chindeétáʼan xíʼún ña̱ va̱ʼa kuaʼnukaún xíʼin tu̱ʼun Ndióxi̱ (Hechos 16:​1-3).

¿Á XA̱A̱ XÍNIÚN XA̱ʼA̱ ÑA̱YÓʼO?

Ndáyáʼviní ña̱ ndakuchiún chi ña̱yóʼo chindeétáʼan xíʼún ña̱ kutakún? (Ezequiel 9:​4-6).

ÑA̱ XÍNIÑÚʼU KEʼÚN

Ña̱ sánáʼa̱ Biblia xa̱ʼa̱ ña̱ xíniñúʼu kunda̱a̱ va̱ʼa-inii̱ tasaá ndakuchii̱: ․․․․․

¿Ndáaña kúni̱i̱ nda̱ka̱tu̱ʼíi̱n yivái̱ á siʼíi̱ xa̱ʼa̱ ña̱yóʼo? ․․․․․

TA YÓʼÓ, ¿NDÁAÑA NDAKANIXI̱NÍÚN?

● ¿Nda̱chun ndáyáʼviní ña̱ ndakuchiyó?

● ¿Nda̱chun kamaní ndákuchi sava na̱ va̱lí kúa̱an?

● ¿Nda̱chun ndákanixi̱ní sava na̱ va̱lí kúa̱an ña̱ xíniñúʼu kundatuna ku̱a̱ʼá tiempo tasaá ndakuchina?

[Comentario]

“Tá ndákaʼíi̱n xa̱ʼa̱ ña̱ nda̱kuchii̱, chíndeétáʼan xíʼi̱n ña̱ keʼíi̱ ña̱ va̱ʼa ta va̱ása ki̱ʼvii̱ tu̱ndóʼo.” (Ñá Noemí)

[Cuadro]

Ña̱ kúni̱na kunda̱a̱-inina xa̱ʼa̱ ña̱ ndákuchina

¿Ndáaña ndána̱ʼa̱ ña̱ ndakuchiyó? Tá sáki̱ʼvi níína yóʼo ini ti̱kui̱í nda̱a̱ táki̱ʼva íyo na̱ xíʼi̱ saá íyoún, ña̱ va̱ása ndikókaún keʼún ña̱ xi̱keʼún tá ya̱chi̱. Ta tá xa̱a̱ ki̱taún inirá nda̱a̱ táki̱ʼva íyo na̱ xa̱a̱ nda̱taku saá íyoún, ta kixáʼún kéʼún ña̱ kúni̱ Jehová.

¿Ndáaña kúni̱ kachi ña̱ ndataxiyó miíyó ndaʼa̱ Jehová? Ña̱yóʼo kúni̱ kachiña ña̱ xa̱a̱ nda̱taxiún miíún ndaʼa̱ Jehová ta miíra kúú ta̱ ka̱ʼa̱n xíʼún ndáaña kúú ña̱ keʼún (Mateo 16:24). Ña̱kán tá kúma̱níka ndakuchiún xíniñúʼu keʼún iin oración nu̱ú Jehová ña̱ ka̱ʼún xíʼinra ña̱ ndataxiún miíún ndaʼa̱ra.

¿Ndáaña xíniñúʼu keʼíi̱ tá kúma̱níka ndakuchii̱? Xíniñúʼu keʼún nda̱a̱ táki̱ʼva káʼa̱n Biblia ta ka̱ʼún xíʼin inkana xa̱ʼa̱ ña̱ kándíxaún Ndióxi̱. Ta saátu xíniñúʼu viíní kítáʼún xíʼin Ndióxi̱ ta ña̱ va̱ʼa keʼún ña̱yóʼo xíniñúʼu kaʼviún Biblia ta keʼún oración. Ndáyáʼviní ña̱ káchíñún nu̱ú Jehová saáchi kúni̱ún keʼúnña, ta su̱ví xa̱ʼa̱ ña̱ káʼa̱n inkana xíʼún.

¿Nda̱saa ku̱i̱ya̱ xíniñúʼu kuumiíi̱ ña̱ va̱ʼa ndakuchii̱? Su̱ví ña̱ ndáyáʼvika kúú ña̱ nda̱saa ku̱i̱ya̱ kúúmiíún. Soo xíniñúʼu kunda̱a̱ va̱ʼa iniún xíʼin ña̱ káʼa̱n tu̱ʼun Ndióxi̱ ña̱ va̱ʼa ndataxiún miíún ndaʼa̱ra.

¿Ndáaña xíniñúʼu keʼíi̱ tá xa̱a̱ kúni̱ ndakuchii̱ soo na̱ yivái̱ káʼa̱nna xíʼin ña̱ ná kundatukai̱? Tá na̱ yiváún káʼa̱nna xíʼún ña̱ xíniñúʼu ya̱ʼaka tiempo ña̱ va̱ʼa viíka keʼún ña̱ káʼa̱n tu̱ʼun Ndióxi̱, kuniso̱ʼo ña̱ káʼa̱nna ta saá chika̱a̱ka ndee̱ ña̱ va̱ʼaka kutáʼún xíʼin Jehová (1 Samuel 2:26).

[Cuadro]

Ña̱ kivi keʼún á kusíkíún

¿Á ndákanixi̱níún ndakuchiún?

Pregunta ña̱ va̱xi yóʼo chindeétáʼan xíʼún ña̱ va̱ʼa kunda̱a̱-iniún á xa̱a̱ íyo tu̱ʼvaún ña̱ ndakuchiún. Va̱ása nandósóún kaʼviún texto tá kúma̱níka ndakuiún.

¿Á ndáa-iniún Jehová? ¿Ndáa ki̱ʼva náʼúnña? (Salmo 71:5.) ․․․․․

¿Á kúnda̱a̱-iniún ndáaña kúú ña̱ va̱ʼa ta ndáaña kúú ña̱ va̱ása va̱ʼa? ¿Ama kúú ña̱ xa̱a̱ kéʼúnña? (Hebreos 5:14.) ․․․․․

¿Nda̱saa yichi̱ káʼún xíʼin Ndióxi̱? ․․․․․

¿Á íyo ña̱ káʼa̱n káxiún xa̱ʼa̱ tá kéʼún oración? ¿Á xíʼin ña̱ káʼún náʼún ña̱ kúʼvi̱-iniún xíniún Jehová? (Salmo 17:6.) ․․․․․

¿Ndáaña kúni̱ún viíka ka̱ʼún xíʼin Ndióxi̱ tá kéʼún oración? ․․․․․

¿Á káʼviún Biblia ndiʼi ki̱vi̱? (Josué 1:8.) ․․․․․

¿Tá káʼvi iinlá miíún Biblia ndáa xa̱ʼa̱ kúú ña̱ káʼviún? ․․․․․

¿Ndáaka ña̱ kúni̱ún keʼún tá káʼvi iinlá miíún? ․․․․․

¿Á va̱ʼa sánáʼún tá nátúʼun iinlá miíún xa̱ʼa̱ tu̱ʼun Ndióxi̱? (Tá kúú: ¿Á kivi ka̱ʼún xíʼin inkana xa̱ʼa̱ ña̱ sánáʼa̱ Biblia? ¿Á ndíkó tukún káʼún xíʼin na̱ yiví na̱ xa̱a̱ na̱túʼún xíʼin xa̱ʼa̱ tu̱ʼun Ndióxi̱? ¿Á chíka̱ún ndee̱ ña̱ natúʼun xíʼin inkana xa̱ʼa̱ ña̱ sánáʼa̱ Biblia?)

□ Kéʼévai̱ña □ Va̱ása kéʼi̱ña

¿Á kítaún nátúʼun xa̱ʼa̱ tu̱ʼun Ndióxi̱ ni va̱ása kíta na̱ yiváún? (Hechos 5:42.)

□ Kéʼévai̱ña □ Va̱ása kéʼi̱ña

¿Ndáaña kúni̱kaún keʼún xa̱ʼa̱ ña̱ nátúʼun xíʼin na̱ yiví? (2 Timoteo 2:15.) ․․․․․

¿Á xáʼún ndiʼi reunión? (Hebreos 10:25.) ․․․․․

¿Á yáʼún ti̱xin reunión ta táxiún comentario? ․․․․․

¿Á táxi na̱ yiváún ña̱ ku̱ʼún reunión ni va̱ása kívi kuʼun na̱kán?

□ Kéʼévai̱ña □ Va̱ása kéʼi̱ña

¿Á kúsi̱í-iniún ña̱ kéʼún ña̱ kúni̱ Ndióxi̱? (Salmo 40:8.)

□ Kéʼévai̱ña □ Va̱ása kéʼi̱ña

¿Ndáaña kúú ña̱ i̱xayo̱ʼvi xíʼún xa̱ʼa̱ ña̱ ke̱ʼé na̱ káʼvi xíʼún ta ndáa ki̱ʼva ni̱ya̱ʼún nu̱úña? (Romanos 12:2.) ․․․․․

¿Ndáaña ndákanixi̱níún keʼún ña̱ va̱ása sandákoún ña̱ kuʼvi̱-iniún kuniún Jehová? (Judas 20, 21.) ․․․․․

Tá na̱ yiváún á na̱ migoún ná sandákoona ña̱ nda̱a̱, ¿á ndakundeún kachíñún nu̱ú Jehová? (Mateo 10:​36, 37.)

□ Kéʼévai̱ña □ Va̱ása kéʼi̱ña

[Na̱ʼná]

Ña̱ ndakuchiún íyoña nda̱a̱ táki̱ʼva ña̱ tíndaʼa̱na: xíniñúʼu ndakani vií xi̱niún xa̱ʼa̱ ña̱yóʼo