CAPÍTULO 35

¿Ndáa ki̱ʼva kivi xa̱i̱ koi̱ migo Ndióxi̱?

Ta̱ Gabriel ki̱ʼinra kuenta ña̱ ndáyáʼviní ña̱ vií kítáʼanra xíʼin Ndióxi̱ tá ni̱ya̱ʼara nu̱ú iin tu̱ndóʼo ña̱ ndeéní. Ta̱yóʼo nátúʼunra: “Yivái̱ sa̱ndákoora ndi̱ʼi̱ tá kúúmiíi̱ 12 ku̱i̱ya̱. Ndákaʼi̱n ña̱ iin ñuú ni̱xi̱yoi̱ cuartoi̱ ta ni̱ka̱ʼa̱nníi̱ xíʼin Jehová ña̱ ná chindeétáʼanra xíʼinra ña̱ ndikóra”.

Kúsuchíní-ini ta̱ Gabriel ta ki̱xáʼara káʼvira Biblia. Ta nda̱ni̱ʼíra iin versículo nu̱ú káʼa̱n iin ta̱ ka̱ʼyí Biblia ña̱yóʼo xíʼin Jehová: “Yóʼó kúú ta̱ chíndeétáʼan xíʼin na̱ ndóʼo tu̱ndóʼo. Yóʼó kúú ta̱ chíndeétáʼan xíʼin na̱ kǒo yivá” (Salmo 10:14). Ta̱ Gabriel káʼa̱nra ña̱ ni̱xa̱a̱ tu̱ʼun yóʼo nda̱a̱ níma̱ra: “Tá ka̱ʼvii̱ña ki̱ʼi̱n kuenta, ña̱ mií Jehová kúú ta̱ káʼa̱n xíʼi̱n ña̱ chindeétáʼanra xíʼi̱n, ta sa̱ndákaʼánra yi̱ʼi̱ ña̱ miíra kúú yivái̱. Ta iinlá ta̱yóʼo kúú yiváyó ta̱ va̱ʼaní-ini”.

¿Á NDÓʼÚN nda̱a̱ táki̱ʼva ndóʼo ta̱ Gabriel? Sana saá ndóʼovaún, á sanatu va̱ása. Soo Jehová kúni̱ra ña̱ ná koún migora. Koto ndáaña káʼa̱n Biblia: “Kuyatinndó nu̱ú Ndióxi̱ ta ta̱kán kuyatinra nu̱úndó” (Santiago 4:8). ¿Á ki̱ʼún kuenta? Va̱ása ndáyáʼviví ña̱ kǒo kívi kuniyóra á ña̱ káʼnuníra nu̱úyó. Chi Jehová káʼa̱nvara xíʼinyó ña̱ ná kooyó migora.

Ña̱ va̱ʼa kooyó migo Ndióxi̱, xíniñúʼu chika̱a̱yó ndee̱ ña̱ vií kutáʼanyó xíʼinra. Ná ka̱ʼa̱nyó xa̱ʼa̱ iin ejemplo. ¿Á sava yichi̱ xa̱a̱ xíkuumiíún iin planta? Tá kúni̱ún ña̱ ná kuaʼnunú ta vií koonú, ¿ndáaña xíniñúʼu keʼún? Xíniñúʼu ndukún iin lugar nu̱ú vií koonú ta ko̱so̱únnú. Ta va̱ása xíniñúʼu sandákoo ndaʼúnnú. Ki̱ʼva saátu íyo ña̱ kítáʼanyó xíʼin Ndióxi̱. ¿Ndáaña xíniñúʼu keʼún ña̱ viíka kutáʼún xíʼinra?

Ndáyáʼviní ña̱ kaʼviún Biblia

Nda̱a̱ táki̱ʼva kúnda̱a̱-iniún, ña̱ va̱ʼa vií kutáʼan u̱vi̱ na̱ migo xíniñúʼu natúʼun táʼanna ta kuniso̱ʼona ña̱ káʼa̱n táʼanna. Ta ki̱ʼva saátu xíniñúʼu keʼé iin na̱ yiví tá kúni̱na vií kutáʼanna xíʼin Ndióxi̱. Soo, ¿ndáa ki̱ʼva kivi kuniso̱ʼoyó ña̱ káʼa̱n Jehová? Kaʼviyó ta nandukúyó xa̱ʼa̱ ña̱ káʼa̱n tu̱ʼunra ña̱ Biblia (Salmo 1:2, 3).

Sana va̱ása kútóoníún kaʼviún, sana ña̱ kútóún kúú inkaka ña̱ʼa, tá kúú ña̱ kotoún televisión ña̱ kusíkíún videojuego, á ña̱ ku̱ʼu̱n si̱íún xíʼin na̱ migoún. Soo tá kúni̱ún koún migo Ndióxi̱, ndáyáʼviní ña̱ kaʼviún tu̱ʼunra ña̱ va̱ʼa kuniso̱ʼún ña̱ káʼa̱nra.

Va̱ása ndakanixi̱níún ña̱ kuxúxanníún tá ná kaʼviún ña̱ Biblia. Kiviva sakuaʼún ña̱ kusi̱í-iniún ña̱ kaʼviúnña, ni va̱ása kútóún kaʼviún libro. Ña̱ siʼna kivi keʼún kúú ña̱ taváún tiempo. ¿Ndáa ki̱ʼva keʼún ña̱yóʼo? Kivi keʼún nda̱a̱ táki̱ʼva kéʼé iin ñá loʼo ñá naní Lais. Ñáyóʼo káchiñá: “Kúúmiíi̱ iin hora ña̱ va̱ʼa kaʼvii̱ ña̱ Biblia. Tá kúú, tá ndákoi̱ káʼvii̱ iníí capítulo ña̱ Biblia”. Ta ñá María ñá kúúmií 15 ku̱i̱ya̱ xa̱a̱ síín hora káʼviñá, ñáyóʼo káchiñá: “Ndiʼi ki̱vi̱, tá kúma̱níka ku̱ʼi̱n ku̱su̱i̱n káʼvii̱ ña̱ Biblia iin rato loʼo”.

¿Ndáa hora kúú ña̱ ndaka̱xiún kaʼviún ña̱ Biblia? Siʼna koto  recuadro ña̱ va̱xi nu̱ú página 292. Tándi̱ʼi káʼyí yóʼo, ama kúú ña̱ kivi kaʼviún 30 minuto ña̱ Biblia ndiʼi ki̱vi̱.

․․․․․

Ña̱ ndaka̱xiún ndáa hora kúú ña̱ kaʼviún ña̱ Biblia kúú ña̱ nu̱ú xíniñúʼu keʼún. Soo tá ná kixáʼún kaʼviún ña̱ Biblia, kiʼún kuenta ña̱ sava yichi̱ kivi ixayo̱ʼvi̱ña xíʼún ña̱ kaʼviúnña. Sana kivi kundoʼún nda̱a̱ táki̱ʼva ndóʼo iin ta̱ loʼo ta̱ kúúmií 11 ku̱i̱ya̱ ta̱ naní Jezreel, ta̱yóʼo káchira: “Sava táʼví ña̱ Biblia íxayo̱ʼvi̱ loʼoña xíʼi̱n ña̱ kaʼvii̱ña”. Soo va̱ása ndakava-iniún. Ndakaʼún saáchi tá káʼviún ña̱ Biblia xíniso̱ʼún ña̱ káʼa̱n Jehová ta̱ va̱ʼaní kúú migoún. Tá ná ya̱ʼa loʼo tiempo kiʼún kuenta ña̱ kixáʼún kutóovaún kaʼviún ña̱ Biblia. Tá ná kuni̱kaún kaʼviún ña̱yóʼo, kusi̱íka-iniún kaʼviúnña ta ku̱a̱ʼáka ña̱ va̱ʼa ndakiʼún xa̱ʼa̱ ña̱yóʼo.

Kǒo sandákoún ña̱ keʼún oración

Iin regalo ña̱ ndáyáʼviní ta̱xi Ndióxi̱ ndaʼa̱yó kúú ña̱ oración, saáchi ti̱xin ña̱yóʼo kivi ka̱ʼa̱nyó xíʼinra. Ndakanixi̱ní xa̱ʼa̱ ña̱yóʼo: kivi ka̱ʼún xíʼinra nda̱a̱ ndáaka hora kúni̱ miíún, kúúña káʼñu á ñuú. Chi Jehová ndiʼi tiempo íyo tu̱ʼvara ña̱ kuniso̱ʼora miíyó, ta saátu kúni̱ra kuniso̱ʼora ña̱ káʼún. Ña̱ Biblia káʼa̱nña xíʼún ña̱ ná ka̱ʼún xíʼinra xa̱ʼa̱ ndiʼi ña̱ xíniñúʼún ti̱xin ña̱ oración, ta saátu kǒo nandósóún ña̱ taxiún tíxa̱ʼvi ndaʼa̱ra (Filipenses 4:6).

Ña̱yóʼo kúni̱ kachiña, ña̱ kivi natúʼún xíʼin Ndióxi̱ xa̱ʼa̱ ku̱a̱ʼání ña̱ʼa, tá kúú tu̱ndóʼo ña̱ yáʼún nu̱ú á ña̱ sándi̱ʼi̱-iniún. Ta saátu ndáyáʼviní ña̱ ná taxiún tíxa̱ʼvi ndaʼa̱ra. Saáchi ndiʼivayó táxiyó tíxa̱ʼvi ndaʼa̱ na̱ migoyó tá chíndeétáʼanna xíʼinyó. Ta iinlá Jehová kúú ta̱ xa̱a̱ kéʼé ku̱a̱ʼání ña̱ʼa xa̱ʼún nu̱ú ndiʼika na̱ migoún (Salmo 106:1).

Yóʼo kaʼyíún sava ña̱ʼa ña̱ kúni̱ún taxiún tíxa̱ʼvi xa̱ʼa̱ ndaʼa̱ Jehová.

․․․․․

Tá sava yichi̱ kǒo kúnda̱a̱ka-iniún ndáaña keʼún xa̱ʼa̱ ña̱ yíʼviún á xa̱ʼa̱ ña̱ ndíʼi̱ní-iniún, ¿ndáaña kivi keʼún? “Ndaʼa̱ Jehová sandákoún ña̱ sándi̱ʼi̱-iniún, ta miíra chindeé yóʼó. Chi va̱ása sándakoora na̱ xíniso̱ʼo ña̱ káʼa̱nra” (Salmo 55:22).

Yóʼo kivi kaʼyíún sava ña̱ sándi̱ʼi̱-iniún ña̱ kúni̱ún ka̱ʼún xa̱ʼa̱ tá kéʼún oración.

․․․․․

Sákuaʼa xíʼin ña̱ ndóʼún

Íyo inka ña̱ va̱ása xíniñúʼu nandósó-iniún xa̱ʼa̱ ña̱ va̱ʼaka kutáʼún xíʼin Ndióxi̱. Ta̱ David ka̱ʼyíra iin yaa ña̱ káchi: “Kotondó chi Jehová va̱ʼaní-inira” (Salmo 34:8). Tá ke̱ʼéra ña̱ yaa yóʼo sa̱kán ni̱ya̱ʼara nu̱ú iin tu̱ndóʼo ña̱ ndeéní. Saáchi ta̱ rey Saúl xi̱kuni̱ra kaʼnírara. Xa̱ʼa̱ ña̱ va̱ása níkunda̱a̱ka-inira ndáaña keʼéra, ni̱xa̱ʼa̱nra ni̱xi̱yo se̱ʼéra tañu na̱ filisteo na̱ sáa̱-ini xíni miíra, ta na̱yóʼo kamava nda̱kuninara. Ta saátu na̱yóʼo xi̱kuni̱na kaʼnínara, soo kǒo ña̱ níndoʼora. ¿Ndáa ki̱ʼva ni̱ka̱kura? Íyo iin ña̱ ke̱ʼéra, ke̱ʼéra nda̱a̱ táki̱ʼva kéʼé iin na̱ sána (1 Samuel 21:10-15).

Ta̱ David va̱ása níndakanixi̱níra ña̱ xa̱ʼa̱ ña̱ xíni̱níra kúú ña̱ ni̱ka̱kura. Chí nu̱ú kíxáʼa yaa ña̱ ke̱ʼéra nda̱kunira ña̱ mií Ndióxi̱ kúú ta̱ xíniñúʼu ndukáʼnu xa̱ʼa̱ ña̱ chi̱ndeétáʼanra xíʼinra, ka̱chira: “Ni̱nda̱ka̱tu̱ʼíi̱n Jehová ta nda̱kuiinra yuʼíi̱. Ta sa̱kǎkura yi̱ʼi̱ nu̱ú ndiʼi ña̱ xi̱sayiʼví yi̱ʼi̱” (Salmo 34:4). Ta xa̱ʼa̱ ña̱ ndo̱ʼora va̱ʼa ni̱ka̱ʼa̱nra ña̱yóʼo: “Kotondó chi Jehová va̱ʼaní-inira”.

Ndakaʼán ama kúú ña̱ ki̱ʼún kuenta ña̱ xi̱ndaa Jehová yóʼó, ta kaʼyí ndáaña ku̱u. Va̱ása xíniñúʼu kooña iin ña̱ káʼnuníví, chi kivi kooña iin ña̱ʼa loʼo ña̱ sava yichi̱ va̱ása chíndayáʼviyó.

․․․․․

Iin tá iinyó xíniñúʼu chika̱a̱yó ndee̱ ña̱ va̱ʼa vií kutáʼanyó xíʼin Ndióxi̱, ni na̱ yiváyó sa̱náʼa̱na miíyó xa̱ʼa̱ ña̱ nda̱a̱. ¿Á xa̱a̱ chíka̱ún ndee̱ ña̱ vií kutáʼún xíʼin Ndióxi̱? ¿Á kúma̱níva keʼúnña? Tá saá, ña̱ capítulo yóʼo chindeétáʼanña xíʼún ña̱ kixáʼún keʼún ña̱yóʼo. Ta Jehová taxira ña̱ va̱ʼa ndaʼún xa̱ʼa̱ ña̱ chíka̱ún ndee̱, saáchi ña̱ Biblia káʼa̱nña ña̱yóʼo xíʼinyó: “Ndakundeéndó ndukúndó ña̱ va̱ʼa nu̱ú Ndióxi̱ ta taxiraña ndaʼa̱ndó, ndakundeéndó nandukúndóña ta ndani̱ʼívandóña” (Mateo 7:7).

NDANI̱ʼÍKAÚN ÑA̱ KÁʼA̱N XA̱ʼA̱ ÑA̱YÓʼO NU̱Ú CAPÍTULO 38 XÍʼIN 39 ÑA̱ VOLUMEN NU̱Ú?

ÑA̱ INKA CAPÍTULO

¿Á íxayo̱ʼvi̱ña xíʼún ña̱ natúʼun xíʼin na̱ yiví xa̱ʼa̱ Ndióxi̱? ¿Nda̱saa kivi ka̱ʼún xíʼin inkana xa̱ʼa̱ ña̱ kándíxaún?

TEXTO ÑA̱ KÁXINÍ KÁʼA̱N

“Si̱íní íyo na̱ kúnda̱a̱-ini ña̱ xíniñúʼuna Ndióxi̱” (Mateo 5:3).

IIN ÑA KIVI KEʼÚN

Tá ndiʼi ki̱vi̱ ná kaʼviún ku̱mí página ña̱ va̱xi nu̱ú Biblia ti̱xin iin ku̱i̱ya̱ sandíʼún kaʼviúnña.

¿Á XA̱A̱ XÍNI̱ÚN XA̱ʼA̱ ÑA̱YÓʼO?

Ña̱ nda̱a̱, káʼviún libro yóʼo ta kándíxaún consejo ña̱ va̱xi nu̱ú Biblia, saáchi Jehová ndíʼi̱-inira xa̱ʼún ña̱ va̱ʼa ná koún migora (Juan 6:44).

ÑA̱ XÍNIÑÚʼU KEʼÚN

Ña̱yóʼo kúú ña̱ xíniñúʼu keʼíi̱ ña̱ va̱ʼa viíka kunda̱a̱-inii̱ xíʼin ña̱ káʼvii̱ nu̱ú Biblia:․․․․․

Ña̱yóʼo kúú ña̱ xíniñúʼu keʼíi̱ ña̱ va̱ʼa ka̱ʼa̱n ni̱ʼi̱n xíʼin Ndióxi̱:․․․․․

¿Ndáaña kúni̱i̱ nda̱ka̱tu̱ʼíi̱n yivái̱ á siʼíi̱ xa̱ʼa̱ ña̱yóʼo?․․․․․

TA YÓʼÓ, ¿NDÁAÑA NDÁKANIXI̱NÍÚN?

● ¿Ndáaña kivi keʼún ña̱ va̱ʼa kutóokaún kaʼviún Biblia?

● ¿Nda̱chun kúni̱ Jehová kuniso̱ʼora oración ña̱ kéʼé na̱ yiví ni kúúna na̱ ku̱a̱chi?

● ¿Ndáa ki̱ʼva kivi viíka keʼún oración?

[Comentario]

“Tá ni̱xi̱yo loʼi̱, ndiʼi oración ña̱ xi̱keʼíi̱ inkáchi ni̱xi̱yoña. Vitin chíka̱i̱ ndee̱ ña̱ ka̱ʼi̱n xa̱ʼa̱ ña̱ʼa va̱ʼa ña̱ ndóʼi̱ ndiʼi ki̱vi̱ á xa̱ʼa̱ ña̱ʼa ña̱ va̱ása va̱ʼa. Xa̱ʼa̱ ña̱ xa̱a̱ síín síín íyo ña̱ ndóʼi̱ ki̱vi̱ tá ki̱vi̱, va̱ása inkáchika íyo oración ña̱ kéʼíi̱” (ñá Eva).

[Cuadro]

 Koto ña̱ va̱xi nu̱ú Biblia ña̱ kúúmiíún

1. Ndaka̱xin iin relato ña̱ va̱xi nu̱ú Biblia ña̱ kútóún kunda̱a̱-iniún xa̱ʼa̱. Ña̱ va̱ʼaka kunda̱a̱-iniún xíʼinña, ka̱ʼa̱n xíʼin Jehová ná taxira ña̱ ndíchi ndaʼún.

2. Kiʼin kuenta xíʼin ña̱ káʼviún. Va̱ása kamaní kaʼviúnña. Ndakanixi̱ní xa̱ʼa̱ ña̱ káʼviún, tá kúú koto ndáaña kúú, ndáa ki̱ʼva káʼa̱nna, ndáa xiko̱ kúú ña̱ íyo ta ndáa ki̱ʼva xáʼa̱n ña̱ comida. Tasaá kunda̱a̱-iniún ndáa ki̱ʼva ni̱xi̱yo ña̱ káʼa̱n ña̱yóʼo xa̱ʼa̱.

3. Keʼé pregunta. Tá sa̱ndíʼún ka̱ʼviún iin historia, nda̱ka̱tu̱ʼun ña̱yóʼo miíún:

● ¿Nda̱chun ta̱xi Jehová ña̱ ni̱ka̱ʼyi̱ ña̱yóʼo nu̱ú tu̱ʼunra?

● ¿Ndáana káʼa̱n ña̱yóʼo xa̱ʼa̱ chínúu iin yichi̱ va̱ʼa nu̱úi̱ ta ndáana va̱ása?

● ¿Ndáaña sánáʼa̱ ña̱yóʼo yi̱ʼi̱ ña̱ kivi chindeétáʼan xíʼi̱n ki̱vi̱ tá ki̱vi̱?

● ¿Ndáaña sánáʼa̱ña yi̱ʼi̱ xa̱ʼa̱ Jehová ta saátu xíʼin ki̱ʼva ña̱ kéʼéra?

4. Keʼé iin oración. Natúʼun xíʼin Jehová xa̱ʼa̱ ña̱ sa̱kuaʼún tá ka̱ʼviún tu̱ʼunra, ta ndáa ki̱ʼva keʼún ña̱ sa̱kuaʼún. Ta saátu ndakaʼán ña̱ taxiún tíxa̱ʼvi ndaʼa̱ra xa̱ʼa̱ ña̱ Biblia.

[Na̱ʼná]

“Tu̱ʼún iin ñuʼu̱ túu̱n kúúña nu̱úi̱, ñuʼu̱ ña̱ níʼi yichi̱ nu̱úi̱ nu̱ú ku̱a̱ʼi̱n kúúña” (Salmo 119:105).

[Cuadro/​Na̱ʼná]

Ña̱ siʼna xíniñúʼu keʼún

¿Á xa̱a̱ sava yichi̱ túviún ña̱ kǒo tiempo nu̱ún ña̱ keʼún oración ta saátu ña̱ kaʼviún Biblia? Ku̱a̱ʼání yichi̱ ña̱ chíndeétáʼan xíʼinyó kúú ña̱ kunda̱a̱-iniyó ndáaña kúú ña̱ ndáyáʼvi va̱ʼaka keʼéyó.

Ná keʼéyó iin ña̱ʼa: Kuniñúʼu iin cubeta ta taán ku̱a̱ʼá yu̱u̱ náʼnu ti̱xinña. Tándi̱ʼi sakútúña xíʼin yu̱tí. ¿Ndáaña kúúmiíyó? Iin cubeta ña̱ chútú yu̱u̱ xíʼin yu̱tí.

Ta vitin tavá yu̱tí xíʼin yu̱u̱ ña̱ ñúʼu ti̱xin cubeta, ta tuku ndikóún keʼún ña̱yóʼo, soo vitin siʼna yu̱tí taún ta tándi̱ʼi taún yu̱u̱. ¿Ndáaña kuu vitin? Va̱ása nani ki̱ʼvi yu̱u̱, ¿á su̱ví saá? Saáchi siʼna yu̱tí ta̱ún.

¿Ndáaña sákuaʼayó xíʼin ña̱yóʼo? Tá kúú, tá ña̱ siʼna kéʼún kúú ña̱ʼa ña̱ kǒo ndáyáʼvi tá kúú ña̱ kusíkíún va̱ása kuumiíún tiempo ña̱ keʼún ña̱ʼa ña̱ ndáyáʼvi, tá kúú ña̱ kaʼviún Biblia á inkaka ña̱ʼa. Xa̱ʼa̱ ña̱kán káʼa̱n ña̱ Biblia xíʼinyó ña̱ ná kiʼinyó kuenta ndáaña kúú ña̱ ndáyáʼvi va̱ʼaka (Filipenses 1:10). Tá ná kundiku̱ún consejo yóʼo kiʼún kuenta ña̱ koova tiempo nu̱ún ña̱ keʼún ña̱ʼa ña̱ ndáyáʼvika, tá kúú ña̱ kaʼviún Biblia á ña̱ kaʼviún inkaka ña̱ʼa, ta saátu ña̱ koo tiempo nu̱ún ña̱ keʼún ña̱ sakúsi̱í-iniún sava yichi̱, ndakaʼán ña̱ʼa ña̱ ndáyáʼvika kúú ña̱ siʼna xíniñúʼu keʼún.

[Na̱ʼná]

Ña̱ kítáʼanyó xíʼin Ndióxi̱ nda̱a̱ táki̱ʼva íyo iin planta saá íyoña, saáchi xíniñúʼu kundaayóña ña̱ va̱ʼa kuaʼnuña á vií kooña