Na̱ espíritu, ¿á níma̱ na̱ yiví na̱ ni̱xi̱yo nu̱ú ñuʼú yóʼo kúúna?
Na̱ espíritu ña̱ ndixa kúú ña̱ íyovana. Íyo na̱ va̱ʼa ta íyotu na̱ va̱ása va̱ʼa. Soo, ¿á na̱ yiví na̱ xa̱a̱ ni̱xi̱ʼi̱ kúú na̱ ndu̱u espíritu yóʼo?
Va̱ása; su̱ví na̱yóʼoví kúúna. Tá xíʼi̱ iin na̱ yiví va̱ása ndúuvína iin espíritu nda̱a̱ táki̱ʼva ndákanixi̱ní ku̱a̱ʼání na̱ yiví. ¿Nda̱chun va̱ʼa kúnda̱a̱-iniyó xa̱ʼa̱ ña̱yóʼo? Saáchi saá káchi Biblia. Nina ña̱ nda̱a̱ kúú ña̱ va̱xi nu̱ú Biblia saáchi Ndióxi̱ Jehová kúú ta̱ ta̱xiña ta iinlá ta̱yóʼo kúú Ndióxi̱ ta̱ nda̱a̱. Xa̱ʼa̱ ña̱ miíra kúú ta̱ ke̱ʼé na̱ yiví kúnda̱a̱va-inira ndáaña ndóʼoyó tá xíʼi̱yó (Salmo 83:18; 2 Timoteo 3:16).
Ta̱ Adán xíʼin ñuʼú na̱kuva̱ʼara ta ñuʼú ndi̱kóra ndu̱ura
Biblia káʼa̱nña xa̱ʼa̱ Ndióxi̱ ña̱ xi̱niñúʼura ñuʼú ña̱ va̱ʼa i̱xava̱ʼara ta̱ Adán, ta̱ xi̱kuu ta̱a ta̱ nu̱ú va̱ʼa (Génesis 2:7). Ndióxi̱ ta̱xira ña̱ koora nu̱ú iin ñuʼú livi nu̱ú jardín ña̱ Edén. Tá níkandíxa ta̱ Adán ña̱ ni̱ka̱ʼa̱n Jehová xíʼinra va̱ása kuvivíra ta kutakura nu̱ú ñuʼú yóʼo nda̱a̱ tiempo vitin. Soo tá ni̱ya̱ʼandosó ta̱ Adán ña̱ ni̱ka̱ʼa̱n Ndióxi̱ xíʼinra, Ndióxi̱ ka̱chira: “Ndikóún nu̱ú ñuʼú chi xíʼin ña̱yóʼo na̱kuva̱ʼún. Saáchi ñuʼú kúún ta ñuʼú ndikó tukún nduún” (Génesis 3:19).
¿Ndáaña kúni̱ kachi ña̱yóʼo? Tá kúú, ¿ndáa míí ni̱xi̱yo ta̱ Adán tá kúma̱ní kuniñúʼu Jehová ñuʼú ña̱ va̱ʼa keʼérara? Kǒo nu̱ú níxi̱yovíra. Su̱ví iin espíritu ta̱ ni̱xi̱yo chí ndiví níxikuura. Ña̱kán tá ni̱ka̱ʼa̱n Jehová xíʼin ta̱ Adán ña̱ ndikóra nduura ñuʼú ña̱ xi̱kuni̱ra kachira kúú ña̱ kuvivara. Tá ni̱xi̱ʼi̱ ta̱ Adán va̱ása níndakutáʼanra xíʼin inkaka na̱ espíritu. Chi na̱ ni̱xi̱ʼi̱ va̱ása tákukavína.
Soo, ¿ndáaña ndóʼo ndiʼika na̱ yiví na̱ xa̱a̱ ni̱xi̱ʼi̱? ¿Á ni loʼoví va̱ása kúnda̱a̱-inina? Biblia káʼa̱nkaña xíʼinyó xa̱ʼa̱ ña̱yóʼo.
“Ndiʼina [kúúna na̱ yiví á kití] inkáchi lugar ku̱a̱ʼa̱nna. Xíʼin ñuʼú na̱kuva̱ʼana ta ndíkóna ndúuna ñuʼú” (Eclesiastés 3:20).
“Na̱ ni̱xi̱ʼi̱ kǒoka ña̱ xíni̱na xa̱ʼa̱” (Eclesiastés 9:5).
“Ña̱ kúʼvi̱-inina, ña̱ sáa̱-inina, ña̱ kúkuiñuna ndiʼi ña̱yóʼo xa̱a̱ ndi̱ʼi-xa̱ʼa̱ña” (Eclesiastés 9:6).
“Ya̱vi̱ nu̱ú ku̱ʼún kán, kǒoka chiñu keʼún, kǒoka ña̱ ndakanixi̱níún keʼún, kǒoka ña̱ sákuaʼún ta kǒoka ña̱ kuxini̱ún” (Eclesiastés 9:10).
“Ndúu tukuna ñuʼú; tasaá kǒoka ña̱ ndákanixi̱nína” (Salmo 146:4).
Na̱ yiví na̱ táku kuití kúú na̱ kivi keʼé ña̱yóʼo
¿Á íxayo̱ʼvi̱ña xíʼún ña̱ kandíxaún ña̱ káʼa̱n ndiʼi texto yóʼo? Tá saá ndóʼún ndakanixi̱ní xa̱ʼa̱ ña̱yóʼo: Ku̱a̱ʼání ñuu, ta̱ ta̱a kúú ta̱ káchíñu ña̱ va̱ʼa kuxu na̱ veʼera. Soo tá ni̱xi̱ʼi̱ ta̱yóʼo ku̱a̱ʼání tu̱ndóʼo yáʼana nu̱ú. Sava yichi̱ ñá síʼira xíʼin na̱ va̱lí se̱ʼera ni loʼo kǒo xu̱ʼún ndaʼa̱na ña̱ satána ña̱ kuxuna. Ta sana na̱ sáa̱-ini xíni ta̱ ta̱a yóʼo íxandi̱va̱ʼana xíʼin na̱ veʼera. Ta vitin nda̱ka̱tu̱ʼun miíún ña̱yóʼo: “Tá ta̱ ta̱a yóʼo ndákutáʼanra xíʼin na̱ espíritu, ¿nda̱chun va̱ása ndáakara na̱ veʼera? ¿Nda̱chun táxira ña̱ kéʼé inka na̱ yiví ña̱ va̱ása va̱ʼa xíʼin na̱ veʼera?”. Nda̱a̱ táki̱ʼva káʼa̱n ndiʼi texto ña̱ xa̱a̱ ka̱ʼviyó, ta̱ ta̱a yóʼo kǒo kívi keʼéra nda̱a̱ ni iin ña̱ʼa, saáchi su̱ví ta̱ tákukaví kúúra (Salmo 115:17).
Na̱ ni̱xi̱ʼi̱ va̱ása kívi chindeétáʼanna xíʼin na̱ xíʼi̱ so̱ko ni na̱ íxandi̱va̱ʼana xíʼin
¿Á kúni̱ kachi ña̱yóʼo ña̱ nda̱a̱ ni iin ki̱vi̱ va̱ása ndikóyó kuniyó na̱ ni̱xi̱ʼi̱? Va̱ása. Chí nu̱úka loʼo sakúaʼayó xa̱ʼa̱ ña̱ ndataku na̱ ni̱xi̱ʼi̱. Soo ña̱yóʼo kúni̱ kachiña ña̱ va̱ása kúnda̱a̱-ini na̱ ni̱xi̱ʼi̱ ndáa ña̱ʼa kúú ña̱ kéʼéyó. Kǒo kívi kunina miíyó, ni ña̱ kuniso̱ʼona ña̱ káʼa̱nyó, ni ña̱ ka̱ʼa̱nna xíʼinyó. Xa̱ʼa̱ ña̱yóʼo va̱ása xíniñúʼu yi̱ʼvíyó kuniyóna. Chi va̱ása kívi chindeétáʼanna xíʼinyó ta ni kǒo kívi kundi̱va̱ʼana xíʼinyó (Eclesiastés 9:4; Isaías 26:14).