Si̱lóʼo tiempo kíndo̱o ndaʼa̱ ta̱ Ndi̱va̱ʼa xíʼin na̱ ta̱chí ndi̱va̱ʼa tasaá va̱ása sandáʼvikana na̱ yiví. Jehová xa̱a̱ sa̱kánarana ta ki̱xaa̱na chí nu̱ú ñuʼú yóʼo (Apocalipsis 12:9). Si̱lóʼoní kúma̱ní ta Jehová taxira castigo ndaʼa̱ ta̱ Ndi̱va̱ʼa xíʼin na̱ ta̱chí ndi̱va̱ʼa. Ta̱ apóstol Juan xi̱nira iin visión i̱xaa Ndióxi̱, ña̱kán ni̱ka̱ʼa̱nra ña̱yóʼo: “Xi̱nii̱ iin ángel ta̱ va̱xinuu chí ndiví ta níʼira llave ña̱ ya̱vi̱ naá ta saátu níʼira iin cadena ña̱ káʼnuní. Ta ti̱inra tí dragón tí kúú ko̱o̱ tí nu̱ú va̱ʼa, tí káʼa̱nna xíʼin ña̱ kúúrí ta̱ Ndi̱va̱ʼa ta ka̱túnrarí ña̱ kunuʼnirí 1,000 ku̱i̱ya̱. Ta sa̱kánararí ini ya̱vi̱ naá ta nda̱kasirarí, ta kútu̱ va̱ʼa nda̱kasira yéʼé ña̱yóʼo ña̱ va̱ʼa kǒo sandáʼvikarí na̱ yiví nda̱a̱ ná ya̱ʼa 1,000 ku̱i̱ya̱” (Apocalipsis 20:1-3). Ta chí nu̱únínu Jehová sandíʼi-xa̱ʼa̱ va̱ʼara ta̱ Ndi̱va̱ʼa xíʼin na̱ ta̱chí ndi̱va̱ʼa (Apocalipsis 20:10).

Saátu sandíʼi-xa̱ʼa̱ra na̱ yiví na̱ kéʼé ña̱ va̱ása va̱ʼa (Salmo 37:9, 10; Lucas 13:5).

Jehová sandíʼi-xa̱ʼa̱ra ta̱ Ndi̱va̱ʼa xíʼin na̱ ta̱chí ndi̱va̱ʼa. Tá ná ndiʼi keʼéra ña̱yóʼo, ku̱a̱ʼání bendición taxira ndaʼa̱ na̱ yiví. Ndakaʼán chi na̱ ni̱xi̱ʼi̱ kǒokaña kúnda̱a̱-inina xa̱ʼa̱. Ta̱ Jesús ni̱ka̱ʼa̱nra xa̱ʼa̱ na̱ ni̱xi̱ʼi̱ ña̱ íyona nda̱a̱ táki̱ʼva íyo na̱ kísi̱ (Juan 11:11-14). Ni̱ka̱ʼa̱nra ña̱yóʼo chi xi̱kunda̱a̱-inira ña̱ kixaa̱ iin tiempo ña̱ ndataku na̱ ni̱xi̱ʼi̱. Ta ka̱chira: “Va̱xi hora ta ndiʼi na̱ ni̱xi̱ʼi̱ na̱ ñúʼu ti̱xin ya̱vi̱ [...] keena” (Juan 5:28, 29; chitáʼanña xíʼin Hechos 24:15).

Ndatakuna ña̱ kundoona nu̱ú ñuʼú yóʼo. Nu̱úka ña̱ kuniso̱ʼoyó ña̱ ka̱ʼa̱nna ña̱ ni̱xi̱ʼi̱ iin na̱ yiví, kusi̱íníva-iniyó kuniso̱ʼoyó ña̱ ka̱ʼa̱nna ña̱ xa̱a̱ ki̱xáʼana ndátakuna. Kusi̱íníva-iniyó ndakiʼinyó na̱ veʼeyó na̱ ndataku.