Ta̱ Dauda káchira: “Xa̱ʼnui̱ iin ñuu loʼo ña̱ ndíka̱a̱ chí África. Iin yichi̱ tá ni̱xi̱yo loʼi̱, na̱ veʼi̱ xíʼin inka na̱ familia ka̱nitáʼanna xa̱ʼa̱ iin ñuʼú, u̱vi̱ saána xi̱ka̱ʼa̱n ña̱ kuenta miína kúúña. Ña̱ va̱ʼa nduvií ku̱a̱chi yóʼo ka̱nana iin ta̱ tási, ta̱yóʼo ta̱xira iin espejo ndaʼa̱ inka ta̱ ta̱a ta tándi̱ʼi nda̱kasira sa̱tára xíʼin iin ti̱ko̱to̱ yaa. Tá ni̱ya̱ʼa loʼo tiempo, ta̱a ta̱ ndási ti̱ko̱to̱ sa̱tá yóʼo ki̱xáʼa kísira ta ki̱xáʼa kóyo tati̱ínra. Nda̱kotora nu̱ú espejo ta ka̱chira: ‘Xítoi̱ ña̱ kúyatin iin ta̱a va̱xira ta ndíxira iin ti̱ko̱to̱ yaa, súkunra ta xa̱a̱ chéera, nda̱a̱ íyo vi̱xi xi̱níra ta xíka tosora va̱xira’.

”Ta̱ káʼa̱n ta̱ ta̱a yóʼo xa̱ʼa̱, xi̱ívai̱ kúúra. Ta xa̱ʼa̱ ña̱ yíʼviníra ka̱na kóʼóra: ‘Tá va̱ása kándíxandó ña̱ káʼi̱n xíʼinndó naʼandó ta koto miíndóra nu̱ú espejo yóʼo’. Nda̱a̱ ni iinna kǒo níxiin keʼé ña̱yóʼo. Ta̱ tási kán, ki̱xáʼara sákaara ti̱kui̱í sa̱tá ta̱ ta̱a yóʼo. Ta táyóʼo i̱xava̱ʼarará xíʼin ku̱a̱ʼá nu̱ú yuku̱ ña̱ chi̱táʼanra ta ndíka̱a̱rá ini iin yaxín ña̱ yiki̱n.

”Ta̱ níʼi espejo kán ni̱ka̱ʼa̱nra xíʼinndi̱ ña̱ xi̱íi̱ ni̱ka̱ʼa̱nra ña̱ kuenta miívandi̱ kúú ñuʼú kán. Ta ni̱ka̱ʼa̱nra xíʼin xi̱tái̱n ña̱ ná chiʼiñá nu̱úñá ta ná kǒo kundi̱ʼi̱-iniñá. Na̱ inka familia kán ka̱ndíxavana ña̱ ni̱ka̱ʼa̱nra ta ndi̱ʼiva ku̱a̱chi”.

Ku̱a̱ʼání na̱ yiví na̱ ndóo iníísaá ñuyǐví kándíxana táʼan ña̱yóʼo. Chi ndákanixi̱nína tá xíʼi̱ iin na̱ yiví ku̱a̱ʼa̱nna ñuu xi̱ʼí ta kán kivi kotona ña̱ kéʼé na̱ yiví na̱ ndóo nu̱ú ñuʼú yóʼo ta kivi chindeétáʼanna xíʼinna á kivitu kundi̱va̱ʼana xíʼinna. ¿Á ña̱ ndixa kúú ña̱yóʼo? ¿Á kíndo̱o níma̱ na̱ ni̱xi̱ʼi̱? Ta tá va̱ása kíndo̱o ña̱yóʼo, ¿ndáana kúú na̱ káʼa̱n na̱ yiví xíʼin tá saá? Ndáyáʼviní ña̱ kunda̱a̱-iniyó xa̱ʼa̱ ndiʼi ña̱yóʼo chi chindeétáʼanña xíʼinyó ña̱ va̱ʼa ni̱ʼíyó ña̱ kutakuyó ta va̱ása kuviyó.