LECCIÓN 01
¿Ndáa ki̱ʼva kivi chindeétáʼan ña̱ Biblia xíʼún?
Ku̱a̱ʼáníyó ndáka̱tu̱ʼunyó miíyó nda̱chun kúú ña̱ tákuyó, nda̱chun kúú ña̱ xóʼvi̱yó, nda̱chun kúú ña̱ xíʼi̱yó ta ndáaña koo chí nu̱únínu. Ku̱a̱ʼáníyó ndíʼi̱-iniyó xa̱ʼa̱ ña̱ xíniñúʼuyó ki̱vi̱ tá ki̱vi̱, ña̱ kachíñuyó ña̱ va̱ʼa taxiyó ña̱ kuxu na̱ veʼeyó á ndáa ki̱ʼva koo si̱íyó xíʼin na̱ veʼeyó. Ku̱a̱ʼání na̱ yiví kíʼinna kuenta ña̱ Biblia káʼa̱nña xa̱ʼa̱ ña̱ʼa ña̱ ndáyáʼviní yóʼo, ta saátu va̱ʼaní consejo va̱xi nu̱úña ña̱ kivi chindeétáʼan xíʼinyó. ¿Á túviún ña̱ kivi chindeétáʼan ña̱ Biblia xíʼin iin na̱ yiví na̱ xíni̱ún?
1. ¿Ndáaña kúú sava pregunta ña̱ ndákuiin ña̱ Biblia?
Ña̱ Biblia ndákuiinña pregunta ña̱ ndáyáʼviní, tá kúú ña̱yóʼo: ¿ndáa ki̱ʼva ki̱xáʼa ña̱ tákuyó?, ¿ndáa xa̱ʼa̱ kúú ña̱ tákuyó?, ¿nda̱chun xóʼvi̱ na̱ yiví va̱ʼa?, ¿ndáaña ndóʼoyó ta xíʼi̱yó?, ¿nda̱chun íyoní guerra iníísaá ñuyǐví ta ndiʼina kúni̱ kundoo va̱ʼa?, ta ¿ndáaña kuu xíʼin ñuyǐví nu̱ú ndóoyó yóʼo? Ta nu̱ú Biblia kivi ndani̱ʼíyó ña̱ káʼa̱n xa̱ʼa̱ ña̱ pregunta yóʼo, ta ku̱a̱ʼání na̱ yiví na̱ xa̱a̱ nda̱ni̱ʼí ña̱yóʼo kúsi̱íní-inina xíʼin ña̱ na̱kunda̱a̱-inina.
2. ¿Ndáa ki̱ʼva chíndeétáʼan ña̱ Biblia xíʼinyó ña̱ kusi̱í-iniyó xíʼin ña̱ kéʼéyó ki̱vi̱ tá ki̱vi̱?
Ña̱ Biblia va̱ʼaní consejo táxiña ndaʼa̱yó. Tá kúú, sánáʼa̱ña na̱ familia ndáa ki̱ʼva ndixa kusi̱í-inina. Saátu káʼa̱nña xíʼinyó ndáaña xíniñúʼu keʼéyó ña̱ va̱ása kundi̱ʼi̱ní-iniyó ta kusi̱íní-iniyó tá káchíñuyó. Nani káʼviyó tutu yóʼo, sakuaʼún xa̱ʼa̱ ña̱ káʼa̱n ña̱ Biblia ta saátu xa̱ʼa̱ inkaka ña̱ʼa. Ndiʼi ña̱ ni̱ka̱ʼyi̱ nu̱ú Biblia va̱ʼaní chíndeétáʼanña xíʼinyó (2 Timoteo 3:16).
Tutu yóʼo chindeétáʼanña xíʼún, ña̱ viíka kunda̱a̱-iniún xíʼin ña̱ káʼa̱n Biblia. Xa̱ʼa̱ ña̱kán, káʼa̱nndi̱ xíʼún ña̱ ná kaʼviún ndiʼi texto ña̱ va̱xi nu̱ú iin tá iin lección ta chitáʼúnña xíʼin ña̱ ku̱a̱ʼún sákuaʼún.
NÁ SAKUAʼAKAYÓ XA̱ʼA̱ÑA
Ná kotoyó ndáa ki̱ʼva xa̱a̱ chíndeétáʼan ña̱ Biblia xíʼin inkaka na̱ yiví, ta saátu ndáaña kivi keʼéyó ña̱ va̱ʼa kusi̱íka-iniyó kaʼviyóña, ta ndáaña va̱ʼa ndakiʼinyó tá ná chindeétáʼan inkana xíʼinyó ña̱ kunda̱a̱-iniyó xíʼinña.
3. Ña̱ Biblia níʼiña yichi̱ nu̱úyó
Ña̱ Biblia íyoña nda̱a̱ táki̱ʼva íyo iin lampara ña̱ sándayeʼe̱ nu̱úyó. Kivi chindeétáʼanña xíʼinyó ña̱ ndaka̱xin viíyó ña̱ keʼéyó ta saátu ña̱ kunda̱a̱-iniyó xa̱ʼa̱ ña̱ kuu chí nu̱únínu.
Kaʼvindó Salmo 119:105 ta ka̱ʼa̱nndó xa̱ʼa̱ ña̱yóʼo:
-
¿Ndáaña xi̱ndakanixi̱ní ta̱ ka̱ʼyí salmo yóʼo xa̱ʼa̱ ña̱ Biblia?
-
¿Ndáaña ndákanixi̱ní miíún xa̱ʼa̱ ña̱ Biblia?
4. Ña̱ Biblia ndákuiinña pregunta ña̱ kúúmiíyó
Xa̱a̱ ku̱a̱ʼání ku̱i̱ya̱ iin ñá ñaʼá xi̱kuni̱ñá kunda̱a̱-iniñá xa̱ʼa̱ ña̱ xi̱sandíʼi̱ní-iniñá, soo nu̱ú Biblia nda̱ni̱ʼíñá ña̱yóʼo. Kotondó VIDEO ta ka̱ʼa̱nndó xa̱ʼa̱ ña̱yóʼo:
-
¿Ndáa pregunta kúú ña̱ xi̱kuumií ñá ñaʼá ñá xi̱niyó nu̱ú video?
-
Ña̱ ka̱ʼviñá nu̱ú Biblia, ¿ndáa ki̱ʼva chi̱ndeétáʼanña xíʼinñá?
Ña̱ Biblia káʼa̱nña xíʼinyó ña̱ ná nandukúyó xa̱ʼa̱ ña̱ kǒo kúnda̱a̱-iniyó xa̱ʼa̱. Kaʼvindó Mateo 7:7 ta ka̱ʼa̱nndó xa̱ʼa̱ ña̱yóʼo:
-
¿Á kivi ndakuiin ña̱ Biblia sava pregunta ña̱ kúúmiíún? Ta, ¿ndáa pregunta kúú ña̱ kúúmiíún?
5. Kiviva kusi̱í-iniyó tá káʼviyó Biblia
Ku̱a̱ʼánína kútóona kaʼvina Biblia, ta va̱ʼaní chíndeétáʼanña xíʼinna. Kotondó VIDEO ta ka̱ʼa̱nndó xa̱ʼa̱ ña̱yóʼo:
-
¿Ndáaña ndákanixi̱ní na̱ va̱lí kúa̱an na̱ xi̱niyó nu̱ú video xa̱ʼa̱ ña̱ káʼvina?
-
¿Nda̱chun síín íyo ña̱ ndákanixi̱nína xa̱ʼa̱ ña̱ káʼvina nu̱ú Biblia?
Ña̱ Biblia sándi̱koña-iniyó, saátu káʼa̱nña xíʼinyó xa̱ʼa̱ ña̱ va̱ʼa ña̱ ndátuyó ndakiʼinyó chí nu̱únínu. Kaʼvindó Romanos 15:4 ta ka̱ʼa̱nndó xa̱ʼa̱ ña̱yóʼo:
-
¿Á kúni̱ún kunda̱a̱ka-iniún ndáa ki̱ʼva sándi̱ko ña̱ Biblia iniyó ta saátu xa̱ʼa̱ ña̱ ndátuyó ndakiʼinyó chí nu̱únínu?
6. Va̱ʼaka kunda̱a̱-iniyó xíʼin ña̱ káʼa̱n Biblia tá ná chindeétáʼan inkana xíʼinyó
Ku̱a̱ʼánína káʼvi miína Biblia, soo va̱ʼaníka kúnda̱a̱-inina xíʼinña tá chíndeétáʼan inka na̱ yiví xíʼinna. Kaʼvindó Hechos 8:26-31 ta ka̱ʼa̱nndó xa̱ʼa̱ ña̱yóʼo:
-
¿Ndáaña xíniñúʼuyó ña̱ va̱ʼa kunda̱a̱-iniyó xíʼin ña̱ káʼa̱n Biblia? (Kotondó ña̱ versículo 30 xíʼin 31).
Ta̱ ta̱a ña̱ ñuu Etiopía xi̱niñúʼura ña̱ ná chindeétáʼan iinna xíʼinra ña̱ kunda̱a̱-inira xa̱ʼa̱ ña̱ káʼa̱n tu̱ʼun Ndióxi̱. Ta tiempo vitin, ku̱a̱ʼání na̱ yiví va̱ʼaka kúnda̱a̱-inina xa̱ʼa̱ ña̱ káʼa̱n Biblia tá chíndeétáʼan inkana xíʼinna.
ÑA̱ KÁʼA̱N SAVA NA̱ YIVÍ: “¿Nda̱chunví kaʼviyó Biblia ta ni va̱ása chíndeétáʼanña xíʼinyó?”.
-
Ta miíún, ¿ndáaña ndákanixi̱níún? Ta, ¿nda̱chun ndákanixi̱níún saá?
ÑA̱ XA̱A̱ SA̱KUAʼAYÓ
Ña̱ Biblia táxiña consejo ña̱ kivi chindeétáʼan xíʼinyó ndiʼi ki̱vi̱, ta saátu sándi̱koña-iniyó ta ndákuiinña pregunta ña̱ ndáyáʼviní, saátu káʼa̱nña xíʼinyó xa̱ʼa̱ ña̱ ndátuyó ndakiʼinyó chí nu̱únínu.
Ná ndakaʼányó xa̱ʼa̱ ña̱yóʼo
-
¿Ndáa consejo kúú ña̱ ndáni̱ʼíyó nu̱ú Biblia?
-
¿Ndáa pregunta kúú ña̱ ndákuiin ña̱ Biblia?
-
Ta miíún, ¿ndáaña va̱xi nu̱ú Biblia kúni̱ún kunda̱a̱-iniún xa̱ʼa̱?
NANDUKÚKA XA̱ʼA̱ÑA
Kivi kunda̱a̱-iniún nda̱chun va̱ʼaní chíndeétáʼan consejo ña̱ va̱xi nu̱ú Biblia xíʼinyó tiempo vitin.
“Consejo ña̱ va̱xi nu̱ú Biblia ndiʼi tiempo chíndeétáʼanña xíʼinyó” (La Atalaya, núm. 1, 2018)
Koto ndáa ki̱ʼva chi̱ndeétáʼan ña̱ Biblia xíʼin iin ta̱a ta̱ xi̱ndakava-ini tá ni̱xi̱yo loʼora.
¿Ndáa ki̱ʼva na̱sama ki̱ʼva ña̱ íyoi̱ tasaá ki̱xáʼíi̱ kúsi̱í-inii̱? (2:53)
Kivi kunda̱a̱-iniún xa̱ʼa̱ consejo ña̱ táxi ña̱ Biblia ña̱ kivi chindeétáʼan xíʼinyó ña̱ koo si̱íyó xíʼin na̱ veʼeyó.
“12 ña̱ʼa ña̱ kivi chindeétáʼan xíʼin na̱ familia ña̱ koo si̱ína” (¡Despertad!, núm. 2, 2018)
Koto ndáa ki̱ʼva káʼa̱n ña̱ Biblia ña̱ nda̱a̱ xa̱ʼa̱ ndáana kúú na̱ ndixa xáʼndachíñu ñuyǐví yóʼo.
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
