LECCIÓN 03
¿Á kivi kandíxayó ña̱ káʼa̱n ña̱ Biblia?
Nu̱ú Biblia va̱xi ku̱a̱ʼání ña̱ káʼa̱n xa̱ʼa̱ ña̱ koo chí nu̱únínu, ta saátu va̱xi consejo nu̱úña. Sana kúni̱ún kunda̱a̱-iniún xa̱ʼa̱ ña̱ sánáʼa̱ña. Soo sanatu xíka-iniún xa̱ʼa̱ ña̱yóʼo. ¿Á kivi kandíxayó ña̱ káʼa̱n iin libro ña̱ yatání xa̱ʼa̱ ña̱ koo chí nu̱únínu ta saátu consejo ña̱ va̱xi nu̱úña? ¿Á kivi kandíxayó ña̱ káʼa̱n Biblia xa̱ʼa̱ ña̱ koo si̱íyó tiempo vitin ta saátu chí nu̱únínu? Ku̱a̱ʼání na̱ yiví kándíxana ña̱yóʼo. Káʼa̱nndi̱ xíʼún ña̱ ná nandukún xa̱ʼa̱ ña̱yóʼo nda̱chun ndákanixi̱nína saá, ta kotoún á kivi kandíxaún ña̱yóʼo.
1. ¿Á ndixa ku̱u ña̱ káʼa̱n ña̱ Biblia xa̱ʼa̱?
Ña̱ Biblia nátúʼunña xíʼinyó xa̱ʼa̱ ña̱ ndixa ku̱u ta viíní ni̱ka̱ʼyi̱ ña̱yóʼo (Eclesiastés 12:10). Káʼa̱nña xa̱ʼa̱ ña̱ʼa ña̱ ndixa ku̱u ta saátu xa̱ʼa̱ na̱ yiví na̱ ndixa ni̱xi̱yo (kaʼvi Lucas 1:3; xíʼin 3:1, 2). Ku̱a̱ʼání na̱ historiador ta saátu na̱ arqueólogo káʼa̱nna ña̱ káxiní káʼa̱n ña̱ Biblia xa̱ʼa̱ iin fecha ña̱ ku̱u iin ña̱ʼa, xa̱ʼa̱ na̱ yiví, xa̱ʼa̱ lugar á xa̱ʼa̱ iin ña̱ʼa ña̱ ndáyáʼviní ña̱ ku̱u.
2. ¿Nda̱chun kándíxayó ña̱ káʼa̱n Biblia ni kúúña iin libro ña̱ yatání?
Xa̱a̱ íyo ku̱a̱ʼání ku̱i̱ya̱, Biblia ni̱ka̱ʼa̱nña xa̱ʼa̱ ña̱ʼa ña̱ kǒo níxi̱kunda̱a̱-inina xa̱ʼa̱ tá tiempo xi̱naʼá. Chi káʼa̱nña xa̱ʼa̱ ña̱ʼa ña̱ kítáʼan xíʼin ña̱ ciencia. Soo ku̱a̱ʼánína xa̱a̱ síín síín íyo ña̱ xi̱ka̱ʼa̱nna xa̱ʼa̱ ña̱yóʼo tá tiempo ni̱ka̱ʼyi̱ ña̱ Biblia. Ta tiempo vitin ña̱ ciencia náʼa̱ña ña̱ káxiníva káʼa̱n ña̱ Biblia. Ta kivi kandíxayó ña̱ káʼa̱n ña̱ Biblia ndiʼi tiempo (Salmo 111:8).
3. ¿Nda̱chun va̱ʼa kándíxayó ña̱ káʼa̱n ña̱ Biblia xa̱ʼa̱ ña̱ koo chí nu̱únínu?
Nu̱ú Biblia va̱xi profecía ña̱ káʼa̱n xa̱ʼa̱ ña̱ʼa ña̱ kúma̱ní kuu (Isaías 46:10). Káxiní ni̱ka̱ʼa̱nña xa̱ʼa̱ ku̱a̱ʼání ña̱ʼa tá kúma̱níka kuuña. Ta saátu viíní ni̱ka̱ʼa̱nña xa̱ʼa̱ ña̱ʼa ña̱ kúu ñuyǐví yóʼo tiempo vitin. Nu̱ú lección yóʼo ka̱ʼa̱nyó xa̱ʼa̱ sava profecía ña̱ va̱xi nu̱ú Biblia. Ta kotoyó ña̱ káxiníva káʼa̱nña.
NÁ SAKUAʼAKAYÓ XA̱ʼA̱ÑA
Ná kotoyó ndáa ki̱ʼva kítáʼan ña̱ xa̱a̱ ndáni̱ʼí ña̱ ciencia xíʼin ña̱ káʼa̱n Biblia ta ka̱ʼa̱nyó xa̱ʼa̱ sava profecía ña̱ ndáyáʼviní va̱xi nu̱úña.
4. Ña̱ ciencia náʼa̱ña ña̱ nda̱a̱ káʼa̱n Biblia
Xa̱a̱ íyo ku̱a̱ʼání ku̱i̱ya̱ na̱ yiví xi̱ndakanixi̱nína ña̱ íyo iin ña̱ʼa ña̱ tíin ñuʼú yóʼo. Kotondó VIDEO.
Koto ña̱ ni̱ka̱ʼyi̱ xa̱a̱ íyo 3,500 ku̱i̱ya̱ nu̱ú libro ta̱ Job. Kaʼvindó Job 26:7 ta ka̱ʼa̱nndó xa̱ʼa̱ ña̱yóʼo:
-
¿Nda̱chun ndákanda̱ní-iniyó xa̱ʼa̱ ña̱ káʼa̱n Biblia ña̱ kǒo nda̱a̱ ni iin ña̱ʼa tíin ñuʼú yóʼo?
Sa̱kán 200 ku̱i̱ya̱ kúú ña̱ na̱kunda̱a̱ va̱ʼa inina ndáa ki̱ʼva íyo ña̱ kúun sa̱vi̱. Soo koto ña̱ ni̱ka̱ʼa̱n Biblia xa̱a̱ íyo ku̱a̱ʼání ku̱i̱ya̱. Kaʼvindó Job 36:27, 28 ta ka̱ʼa̱nndó xa̱ʼa̱ ña̱yóʼo:
-
¿Ndáaña kútóokaún ña̱ káʼa̱n xa̱ʼa̱ ndáa ki̱ʼva íyo ña̱ kúun sa̱vi̱?
-
¿Á chíndeétáʼan texto ña̱ sa̱kán ka̱ʼviún, ña̱ kandíxaún ña̱ káʼa̱n Biblia?
5. Ña̱ Biblia ni̱ka̱ʼa̱nña ña̱ kuu iin ña̱ ndáyáʼviní
Kaʼvindó Isaías 44:27-45:2 ta ka̱ʼa̱nndó xa̱ʼa̱ ña̱yóʼo:
-
¿Ndáaña ni̱ka̱ʼa̱n ña̱ Biblia kundoʼo ñuu Babilonia 200 ku̱i̱ya̱ chí sa̱tá?
Ña̱ historia káʼa̱nña, tá ku̱i̱ya̱ 539 tiempo xi̱naʼá iin ta̱ rey ta̱ ñuu Persia ta̱ xi̱naní Ciro xíʼin na̱ xi̱kitáʼan xíʼinra ni̱ki̱ʼvina ñuu Babilonia. Siʼna na̱samana ki̱ʼva ña̱ ku̱a̱ʼa̱n yu̱ta tá ni̱xa̱ʼa̱n sa̱tá ñuu kán, ta xa̱ʼa̱ ña̱ núná yéʼé ñuu Babilonia va̱ʼa ni̱ki̱ʼvina ta ni kǒo níkanitáʼanna xíʼin na̱ ñuu kán. Xa̱a̱ íyo 2,500 ku̱i̱ya̱ ku̱u ña̱yóʼo ta nda̱a̱ tiempo vitin kǒo nda̱a̱ ni iin na̱ yiví íyo Babilonia. Koto ndáaña ni̱ka̱ʼa̱n ña̱ Biblia.
Kaʼvindó Isaías 13:19, 20 ta ka̱ʼa̱nndó xa̱ʼa̱ ña̱yóʼo:
-
¿Ndáa ki̱ʼva ni̱xi̱nu ña̱ profecía yóʼo?
Ña̱ ndi̱ʼi-xa̱ʼa̱ ñuu Babilonia ña̱ ndíka̱a̱ chí Irak
6. Ña̱ Biblia ni̱ka̱ʼa̱nña xa̱ʼa̱ ña̱ kúú tiempo vitin
Ña̱ Biblia káʼa̱nña, ña̱ tiempo ña̱ ndóoyó vitin kúúña “ki̱vi̱ nu̱ú ndíʼi” (2 Timoteo 3:1). Koto ndáaña ni̱ka̱ʼa̱n ña̱ Biblia kuu tiempo vitin.
Kaʼvindó Mateo 24:6, 7 ta ka̱ʼa̱nndó xa̱ʼa̱ ña̱yóʼo:
-
¿Ndáaña ndáyáʼviní ni̱ka̱ʼa̱n ña̱ Biblia kuu ki̱vi̱ nu̱ú ndíʼi vitin?
Kaʼvindó 2 Timoteo 3:1-5 ta ka̱ʼa̱nndó xa̱ʼa̱ ña̱yóʼo:
-
Nda̱a̱ táki̱ʼva ni̱ka̱ʼa̱n ña̱ Biblia, ¿ndáaña keʼé ku̱a̱ʼání na̱ yiví ki̱vi̱ nu̱ú ndíʼi vitin?
-
¿Ndáaña káʼa̱n texto yóʼo xa̱a̱ xíniún kéʼéna?
ÑA̱ KÁʼA̱N SAVA NA̱ YIVÍ: “Nina cuentova kúú ña̱ va̱xi nu̱ú Biblia”.
-
¿Ndáaña kúú ña̱ náʼa̱ ña̱ kivi kandíxaún ña̱ káʼa̱n Biblia?
ÑA̱ XA̱A̱ SA̱KUAʼAYÓ
Ña̱ ciencia, ña̱ historia xíʼin ña̱ profecía náʼa̱ña ña̱ kiviva kandíxayó ña̱ káʼa̱n ña̱ Biblia.
Ná ndakaʼányó xa̱ʼa̱ ña̱yóʼo
-
¿Á ndixa ku̱u ña̱ káʼa̱n ña̱ Biblia xa̱ʼa̱ á cuentova kúúña?
-
¿Ndáa ki̱ʼva káʼa̱n ña̱ ciencia xa̱ʼa̱ ña̱ káʼa̱n ña̱ Biblia?
-
¿Á kándíxaún ña̱ káʼa̱n ña̱ Biblia xa̱ʼa̱ ña̱ koo chí nu̱únínu? ¿Nda̱chun ndákanixi̱níún saá?
NANDUKÚKA XA̱ʼA̱ÑA
Nda̱a̱ táki̱ʼva káʼa̱n ña̱ ciencia, ¿á káxi íyo ña̱ va̱xi nu̱ú Biblia?
“¿Á kítáʼan ña̱ káʼa̱n ña̱ Biblia xíʼin ña̱ káʼa̱n ña̱ ciencia?” (Artículo ña̱ va̱xi nu̱ú jw.org)
¿Ndáaña náʼa̱ ña̱ xa̱a̱ ndóoyó “ki̱vi̱ nu̱ú ndíʼi”?
“I̱ñu̱ profecía ña̱ xa̱a̱ xínu tiempo vitin” (La Atalaya, 1 tí mayo ku̱i̱ya̱ 2011)
Kivi kunda̱a̱-iniún ndáa ki̱ʼva ni̱xi̱nu profecía ña̱ káʼa̱n xa̱ʼa̱ ña̱ Imperio griego.
Koto ndáa ki̱ʼva na̱sama profecía ña̱ va̱xi nu̱ú Biblia ña̱ xi̱ndakanixi̱ní iin ta̱ ta̱a xa̱ʼa̱ Biblia.
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
