TÁ NÁ kixi iinna nu̱ún ta na̱yóʼo xáa̱ xi̱nína nda̱a̱ xi̱ní veʼún, ¿ndáaña ndakanixi̱níún? Kúúna iin na̱ yiví súkun nu̱ú ndiʼina. Tá ya̱chi̱ ni̱xi̱yo na̱ yiví súkunní nu̱ú Ñuʼú yóʼo. Tu̱ʼun Ndióxi̱ káʼa̱nña xíʼinyó yivá na̱yóʼo xi̱kuu na̱ ángel ni̱xi̱yo chí ndiví. Ta, ¿ndachun va̱ʼa ni̱xi̱yo se̱ʼena nu̱ú Ñuʼú yóʼo?

Ndakaʼán chi ta̱ Ndi̱va̱ʼa kúú ta̱ xi̱chika̱a̱ xi̱ní na̱ yiví ña̱ ná keʼéna ña̱ va̱ása va̱ʼa. Nda̱a̱ xi̱kuni̱ra ná keʼé na̱ ángel se̱ʼe Ndióxi̱ ña̱ kini, ni̱ya̱ʼa tiempo ta sava na̱ ángel xi̱niso̱ʼona ña̱ ni̱ka̱ʼa̱n ta̱ Ndi̱va̱ʼa yóʼo, sa̱ndákoona chiñu Ndióxi̱ ña̱ xi̱keʼéna chí ndiví. Ki̱xina nu̱ú Ñuʼú ta ndu̱una na̱ yiví. ¿Á xíni̱ún ndachun ki̱xina?

Tu̱ʼun Ndióxi̱ káʼa̱nña xíʼinyó ki̱xina nu̱ú Ñuʼú chi xi̱nina ná si̱ʼí livi ta xi̱kuni̱na koona xíʼinná. Xa̱ʼa ña̱kán ki̱xina ta ti̱ndaʼa̱na xíʼinná. Tu̱ʼun Ndióxi̱ káʼa̱nña xíʼinyó va̱ása va̱ʼa ña̱ ke̱ʼéna, chi Ndióxi̱ i̱xava̱ʼara na̱ ángel ña̱ kundoona chí ndiví.

Tá ka̱ku se̱ʼe na̱ ángel xíʼin ñá síʼína tá válína kǒo síín níxina̱ʼa̱na. Soo xáʼnu ta xáʼnukana ku̱a̱ʼa̱nna ta ndúndakúkana ku̱a̱ʼa̱nna ta nda̱a̱ ni̱xa̱a̱na ndu̱una na̱ yiví súkun á na̱ náʼnu.

Na̱ se̱ʼe na̱ ángel yóʼo va̱ása va̱ʼa níxi̱yo-inina xíʼin na̱ yiví. Xa̱ʼa ña̱ ndakúna ku̱ndiva̱ʼana xíʼin na̱ yiví. Ta i̱xanduxana xíʼin na̱ yiví ña̱ keʼéna ña̱ kini táʼan ña̱ xi̱keʼé miína.

Tá ni̱ya̱ʼa ki̱vi̱ ña̱ ni̱xi̱ʼi̱ ta̱ Enoc, saá ni̱xi̱yo inka ta̱a va̱ʼa nu̱ú Ñuʼú yóʼo ta xi̱naníra Noé. Ta̱yóʼo ndiʼi tiempo xi̱keʼéra ña̱ xi̱kuni̱ Ndióxi̱.

Ndióxi̱ ni̱ka̱ʼa̱nra xíʼin ta̱ Noé ña̱ kixa̱a̱ iin ki̱vi̱ sandiʼi-xa̱ʼara ndiʼi na̱ yiví na̱ kǒo kéʼé ña̱ va̱ʼa. Soo Ndióxi̱ sa̱kákura ta̱ Noé xíʼin na̱ veʼera ta saátu ku̱a̱ʼá nu̱ú kití sa̱kákura. Ná kotoyó ndáaña ke̱ʼéra.