TA̱ José kǒo níkundeéka-inira. Ta ni̱ka̱ʼa̱nra xíʼin na̱ káchíñu nu̱úra ña̱ ná keena veʼe. Soo tá ni̱ndo̱o mitúʼunra xíʼin na̱ ñanira ki̱xaʼára xákura. Iin ku̱a̱ʼa̱n-ini na̱ ñanira, chi kǒo kúnda̱a̱-inina ndachun xákura. Saá ni̱ka̱ʼa̱nra xíʼinna, ta káchira: “Yi̱ʼi̱ kúú ta̱ José. ¿Á tákuka yivái̱?”

Soo na̱ ñanira iin ku̱a̱ʼa̱n-inina ta ni va̱ása kívi ka̱ʼa̱nkana, chi ni̱yi̱ʼvína. Soo ta̱ José káchira xíʼinna: ʼNaʼandó nu̱íi̱ʼ. Soo tá ni̱xa̱a̱ yatinna nu̱úra, káchira xíʼinna. “Yi̱ʼi̱ kúú ñanindó ta̱ José ta̱ ni̱xi̱kóndó ñuu Egipto”.

Ta̱ José viíní káʼa̱nra xíʼinna: ʼKǒo chika̱a̱ ku̱a̱chindó miíndó ña̱ ni̱xi̱kóndó yi̱ʼi̱ yóʼo. Chi Ndióxi̱ kúú ta̱ chi̱ndaʼá yi̱ʼi̱ ña̱ va̱ʼa chindéi̱ na̱ yiví. Ta̱ Faraón ta̱xi chiñu káʼnu ndaʼíi̱ ñuu yóʼo. Kuaʼánndó nu̱ú yivái̱ ta natúʼun ndiʼindó ña̱yóʼo xíʼinra ta ka̱ʼa̱nndó xíʼinra ná kixira koora yóʼoʼ.

Ta̱ José nu̱mira ndiʼi ñanira. Tá na̱kunda̱a̱-ini ta̱ Faraón ña̱ ki̱xa̱a̱ na̱ ñani ta̱ José, káchira xíʼinra: ʼNá ku̱ʼu̱n carreta tú káñúu kuáyi̱ xíʼinna ta ná kixi yiváún xíʼin na̱ veʼún ñuu yóʼo. Ta yi̱ʼi̱ ndukúi̱ iin ñuʼú va̱ʼa taxii̱ ndaʼa̱naʼ.

Ta na̱yóʼo ni̱xa̱ʼa̱nna nda̱kiʼinna yivána táki̱ʼva xítoún yóʼo. Ta̱ José chi̱ndeéra yivára tá ki̱xa̱a̱ra ñuu Egipto xíʼin ndiʼi na̱ veʼera.

Ta ku̱a̱ʼání ndu̱u na̱ veʼe ta̱ Jacob. Se̱ʼera xíʼin se̱ʼeñánira na̱ ni̱xa̱a̱ ñuu Egipto xi̱kuuna 70 ta su̱ví na̱yóʼo kuití níkixa̱a̱, chi ki̱xa̱a̱tu ñá síʼívana, sana ki̱xa̱a̱ na̱ káchíñutu nu̱úvana. Ndiʼi na̱yóʼo ni̱xa̱a̱na xi̱kundoona ñuu Egipto. Ndióxi̱ na̱samara ki̱vi̱ ta̱ Jacob ta nda̱kunaníra Israel, ña̱kán na̱yóʼo nda̱kunanína na̱ ñuu Israel. Chí nu̱ú loʼoka sakuaʼayó xa̱ʼa na̱yóʼo.