TA̱ Lot xíʼin na̱ veʼera iin ni̱xi̱yona xíʼin ta̱ Abrahán ña̱ ñuu Canaán. Iin ki̱vi̱ ta̱ Abrahán ni̱ka̱ʼa̱nra xíʼin ta̱ Lot: ʼYóʼo kǒo nánikaa ñuʼú kundoo kití sa̱na̱yó. Vitin taʼví-táʼanvayó. Tá yóʼó ku̱ʼu̱n iin xiyo, ta yi̱ʼi̱ ku̱ʼi̱n inka xiyoʼ.

Ta̱ Lot xi̱tora ñuʼú ña̱ íyo yatin xíʼin yu̱ta Jordán. Chi íyo ku̱a̱ʼání ti̱kui̱í xíʼin ku̱ʼu̱ ña̱ kuxu kití sa̱na̱ra. Ña̱kán, ku̱a̱ʼa̱nra ñuu yóʼo xíʼin na̱ veʼera xíʼin kití sa̱na̱ra. Ta saáví i̱xava̱ʼana veʼena ñuu Sodoma.

Na̱ yiví na̱ ni̱xi̱yo ñuu Sodoma ku̱a̱ʼání ña̱ kini xi̱keʼéna. Ta̱ Lot iin ta̱a va̱ʼa xi̱kuura. Ña̱kán va̱ása níkutóora ña̱yóʼo ni Ndióxi̱ kǒo níkutóoña. Ña̱kán, Ndióxi̱ chi̱ndaʼára u̱vi̱ na̱ ángel ña̱ ku̱ʼu̱nna ka̱ʼa̱nna xíʼin ta̱ Lot. Saáchi Ndióxi̱ sandiʼi-xa̱ʼara ñuu Sodoma ta saátu ña̱ ndíka̱a̱ yatin xíʼinña ña̱ naní Gomorra, chi na̱ yiví kán nina ña̱ kini xi̱keʼéna.

Na̱ ángel ni̱ka̱ʼa̱nna xíʼin ta̱ Lot: ʼKamandó keendó ñuu yóʼoʼ. Soo ni̱kuachi̱va ta̱ Lot xíʼin na̱ veʼera. Tasaá, ti̱in na̱ ángel ndaʼa̱na ta ta̱vánana ñuu kán. Tasaá iin ángel yóʼo ni̱ka̱ʼa̱n xíʼinna: ʼKunundó kuaʼánndó ta kǒo kotondó chí sa̱tá. Kuaʼánndó chí yuku̱ ña̱ va̱ʼa ka̱kundóʼ.

Ta̱ Lot xíʼin ná se̱ʼera xi̱niso̱ʼona ta ke̱ena ku̱a̱ʼa̱nna. Sa̱ndákoona ñuu Sodoma. Ta ni loʼo kǒo níxindatuna, ta ni kǒo níxitona chí sa̱tá. Soo ñá síʼí ta̱ Lot kǒo níxiniso̱ʼoñá. Tá xa̱ku̱xíka loʼona ku̱a̱ʼa̱nna, saá xi̱kundichiñá ta xi̱toñá chí sa̱tá. Tasaá ndu̱uñá iin yu̱u̱ ña̱ ñi̱i̱n téʼe, koto nu̱ú na̱ʼná yóʼo va̱xiñá.

Xíʼin ña̱yóʼo sákuaʼayó iin ña̱ʼa: Ndióxi̱ sáka̱kura na̱ xíniso̱ʼo ña̱ káʼa̱nra, soo na̱ kǒo xíniso̱ʼo xíʼi̱vana.