HISTORIA 14
Ndióxi̱ xi̱tondosóra ta̱ Abrahán
KOTO ña̱ kéʼé ta̱ Abrahán, níʼira iin cuchillo sana kúni̱ra kaʼníra se̱ʼera. ¿Á xíni̱ún ndachun? Soo siʼna ná kunda̱a̱-iniyó ndachun va̱ʼa ka̱ku se̱ʼe ta̱ Abrahán xíʼin ñá Sara.
Á ndákaʼún chi Ndióxi̱ ni̱ka̱ʼa̱n xíʼinna ña̱ koo iin se̱ʼena. Soo na̱yóʼo kǒo kívi kooka se̱ʼena chi xa̱chéevana, soo ta̱ Abrahán ka̱ndíxavara ña̱ ni̱ka̱ʼa̱n Ndióxi̱ ña̱ va̱ʼa koo iin se̱ʼena. Ta, ¿ndáaña ke̱ʼé Ndióxi̱?
Tándi̱ʼi ni̱ka̱ʼa̱n Ndióxi̱ xíʼin ta̱ Abrahán ña̱ koo iin se̱ʼera ta ni̱ya̱ʼa iníí ku̱i̱ya̱. Tá xa̱ndíka̱a̱ ta̱ Abrahán 100 ku̱i̱ya̱ra ta ñá Sara 90 ku̱i̱ya̱ñá ta saáví ka̱ku iin se̱ʼena, ta chi̱núuna ki̱vi̱ra ña̱ kunaníra Isaac. Tasaá ni̱xi̱nu nu̱ú tu̱ʼun ña̱ ni̱ka̱ʼa̱n Ndióxi̱ xíʼinra.
Soo tá xa̱chée ta̱ Isaac, Jehová xi̱tondosóra ta̱ Abrahán á ndinuʼu-inira kándíxarara. Ta ka̱nara ta̱ Abrahán ta káchira: “Abrahán”. Ta ta̱yóʼo nda̱kuiinra yu̱ʼu̱ Jehová: “Yóʼo ndíka̱i̱”, káchira. Ta siʼa káchi Ndióxi̱ xíʼinra: ʼKuaʼán xíʼin se̱ʼún ta̱ Isaac yuku̱ nu̱ú ka̱ʼi̱n xíʼún ta kán kaʼníúnraʼ.
Tá xi̱niso̱ʼo ta̱ Abrahán ña̱yóʼo ni̱kusuchí-inira xa̱ʼa se̱ʼera, chi kúʼvi̱ní-inira xínirara. Ndakaʼán ña̱ ni̱ka̱ʼa̱n Ndióxi̱ xíʼin ta̱ Abrahán xa̱ʼa na̱ se̱ʼera chi na̱yóʼo kúú na̱ koo nu̱ú ñuʼú Canaán káchira xíʼinra. ¿Á kivi xa̱a̱ na̱yóʼo koona ñuʼú Canaán ta ná kuvi ta̱ Isaac? Soo ta̱ Abrahán va̱ása níkunda̱a̱-inira ña̱yóʼo, nisaáví ka̱ndíxavara ña̱ ni̱ka̱ʼa̱n Ndióxi̱ xíʼinra.
Tá ni̱xa̱a̱ ta̱ Abrahán xíʼin se̱ʼera yuku̱ kán, ka̱túnra ndaʼa̱ ta̱ Isaac ta chi̱núurara nu̱ú kuvira. Tasaá ta̱vára iin cuchillo ña̱ kaʼníra se̱ʼera. Tá ta̱vára cuchillo yóʼo kama ni̱ka̱ʼa̱n iin ángel xíʼinra: “Abrahán, Abrahán”. Ta̱ Abrahán nda̱kuiinra: “Yóʼo ndíka̱i̱”, káchira.
ʼKǒo kaʼníún se̱ʼúnʼ, káchi ta̱ ángel xíʼinra, chi ña̱yóʼo káchi Ndióxi̱: “Vitin kúnda̱a̱-inii̱ ña̱ ndinuʼu-iniún kándíxaún yi̱ʼi̱, chi va̱ása nísasiún se̱ʼún xa̱ʼa ña̱ ni̱ka̱ʼi̱n xíʼún ña̱ kaʼníúnra”.
Ta̱ Abrahán ndinuʼu-inira ka̱ndíxara Ndióxi̱, chi xíni̱ra ni iin ña̱ʼa va̱ása yo̱ʼviña nu̱ú Ndióxi̱ chi va̱ʼava sandátakura ta̱ Isaac ni ná kuvira. Soo Ndióxi̱ va̱ása níkuni̱ra kaʼní ta̱ Abrahán ta̱ loʼo se̱ʼera chi ta̱ xi̱tondosó kuitívara kúúra. Ña̱kán chi̱ka̱a̱ Ndióxi̱ iin ndikachi tañu yitu̱n ta ni̱ka̱ʼa̱nra xíʼin ta̱ Abrahán ná kaʼníra tíyóʼo nu̱ú ta̱ Isaac.
