UR XI̱NANÍ ñuu nu̱ú ni̱xa̱a̱ na̱ yiví xi̱ndoona tándi̱ʼi ko̱on sa̱vi̱ kini. Ta ña̱yóʼo iin ñuu káʼnu xi̱kuuña ta liviní veʼe ni̱xi̱yo nu̱úña. Ta na̱ yiví xi̱ndoo ñuu yóʼo, ndióxi̱ vatá xi̱ndasakáʼnuna. Ña̱yóʼo kúútu ña̱ xi̱keʼé na̱ xi̱ndoo ñuu Babel. Na̱ yiví na̱ xi̱ndoo ñuu Ur xíʼin ñuu Babel kǒo níxi̱yona táki̱ʼva ni̱xi̱yo ta̱ Noé xíʼin se̱ʼera ta̱ Sem, chi u̱vi̱ saá na̱yóʼo va̱ʼa ka̱chíñuna nu̱ú Jehová.

Tándi̱ʼi ko̱on sa̱vi̱ ta ni̱ya̱ʼa 350 ku̱i̱ya̱ tasaá ni̱xi̱ʼi̱ ta̱ Noé. Ta ni̱ya̱ʼa u̱vi̱ kuití ku̱i̱ya̱ saá ka̱ku ta̱a ta̱ va̱xi nu̱ú na̱ʼná yóʼo. Abrahán xi̱naníra ta ni̱xi̱yora xíʼin na̱ veʼera ñuu Ur. Ndióxi̱ xi̱kuni̱níra ta̱yóʼo.

Ta iin ki̱vi̱ Jehová ni̱ka̱ʼa̱nra xíʼin ta̱ Abrahán: ʼSandákoo ñuu Ur xíʼin na̱ táʼún ta kuaʼán inka ñuu ña̱ taxii̱ koúnʼ. ¿Á xi̱niso̱ʼora ña̱ ni̱ka̱ʼa̱n Ndióxi̱ ta sa̱ndákoora ndiʼi ña̱ʼara ña̱ va̱ʼa ña̱ ni̱xi̱yo ñuu Ur? Xi̱niso̱ʼovara. Chi ta̱yóʼo ndiʼi tiempo ka̱ndíxara Ndióxi̱, ña̱kán ni̱xa̱a̱ra ndu̱ura migo Ndióxi̱.

Tá ki̱tara ñuu Ur, ku̱a̱ʼa̱n sava na̱ veʼera xíʼinra. Ku̱a̱ʼa̱n yivára ta̱ xi̱naní Taré, ku̱a̱ʼa̱n xa̱xi̱nra ta̱ Lot, ku̱a̱ʼa̱n ñá síʼíra ñá xi̱naní Sara xíʼinra. Tá ni̱ya̱ʼa tiempo ni̱xa̱a̱na iin ñuu ña̱ naní Harán, kán ni̱xi̱ʼi̱ ta̱ Taré yivára. Ta ñuuna ña̱ Ur xíkaní ni̱ndo̱oña.

Tasaá ta̱ Abrahán xíʼin na̱ veʼera ke̱ena ñuu Harán ta ni̱xa̱a̱na ñuu ña̱ naní Canaán. Yóʼo kúú nu̱ú ni̱ka̱ʼa̱n Jehová xíʼinra: ʼÑa̱yóʼo kúú ñuʼú ña̱ taxii̱ ndaʼa̱ na̱ se̱ʼúnʼ. Ta̱ Abrahán ni̱ndo̱ora koora ñuu Canaán ta veʼe mánda ni̱xi̱yora.

Ndióxi̱ ta̱xira ku̱a̱ʼáka ña̱ va̱ʼa ndaʼa̱ ta̱ Abrahán, ta̱xira ndikachi, ta̱xira inkaka kití ndaʼa̱ra, ta̱xitura na̱ kachíñu nu̱ú ta̱ Abrahán. Soo ta̱yóʼo xíʼin ñá Sara kǒo se̱ʼena níxi̱yo.

Tá ndíka̱a̱ ta̱ Abrahán 99 ku̱i̱ya̱ra, ni̱ka̱ʼa̱n Jehová xíʼinra: ʼYi̱ʼi̱ káʼa̱n xíʼún, yóʼó kúú ta̱ xa̱a̱ koo yivá ndiʼi na̱ yiví na̱ koo nu̱ú Ñuʼú yóʼoʼ. Soo, ¿á va̱ʼa xa̱a̱ ta̱yóʼo koora yivá ndiʼi na̱ yiví chi kǒo se̱ʼera xíʼin ñá Sara chi xa̱chéevana?