KOTO ña̱ʼa ña̱ sánduxu̱n ta̱a yóʼo ini veʼera. Sánduxu̱nra iin ti̱ko̱to̱ livi xíʼin ka̱a ña̱ oro, ña̱ plata. Ñuu Jericó ki̱ʼinraña. Soo, ¿á ndákaʼún ndáaña ni̱ka̱ʼa̱n Jehová xíʼinna keʼéna xíʼin ña̱ʼa ña̱ ñuu Jericó?

Ni̱ka̱ʼa̱nra xíʼinna ña̱ sandiʼi-xa̱ʼanaña, ta ña̱ oro xíʼin ña̱ plata kúú ña̱ kuniñúʼuna tabernáculo Jehová. Ta na̱ yiví yóʼo kǒo níxiniso̱ʼona ña̱ ni̱ka̱ʼa̱n Jehová. I̱xakuíʼnana ña̱ʼa Ndióxi̱. Ta̱ i̱xakuíʼna ña̱yóʼo kúú ta̱ Acán, ta na̱ ñúʼu xíʼinra kúú na̱ veʼera. Ná kotoyó ndáaña ku̱u.

Tándi̱ʼi i̱xakuíʼna ta̱ Acán ña̱yóʼo, ta̱ Josué chi̱ndaʼára sava na̱ ku̱a̱ʼa̱n kanitáʼan xíʼin na̱ ñuu Hai. Soo na̱yóʼo kǒo níkuchiñuna kanitáʼanna xíʼinna, ta savana ni̱xi̱ʼi̱vana ta savakana xi̱nuvana nu̱ú na̱ ñuu Hai. Ta̱ Josué ni̱kusuchíkaví-inira, ta ni̱ka̱ʼa̱nra xíʼin Jehová: ʼ¿Ndachun ta̱xiún ndo̱ʼondi̱ ña̱yóʼo?ʼ

Jehová nda̱kuiinra: ʼKoto, chi na̱ ñuu Israel su̱ví ña̱ va̱ʼa níkeʼéna. Ki̱ʼinna ña̱ʼa ña̱ ni̱ka̱ʼi̱n xíʼinna ña̱ sandiʼi-xa̱ʼana á ña̱ʼa ña̱ kuniñúʼuna tabernáculo. I̱xakuíʼnana iin ti̱ko̱to̱ livi ta chi̱se̱ʼé yu̱ʼu̱na xa̱ʼaña. Sandiʼi-xa̱ʼandó ti̱ko̱to̱ ta sandiʼi-xa̱ʼandó na̱ i̱xakuíʼnaña, saáví chika̱i̱ bendición ndóʼóʼ. Jehová ni̱ka̱ʼa̱nra ña̱ na̱ʼa̱ra ta̱ kui̱ʼná yóʼo nu̱ú ta̱ Josué.

Ta̱ Josué sa̱ndátaka ndiʼira na̱ ñuu, ta mií Jehová tavá ta̱ kui̱ʼná yóʼo, ta̱ Acán kúúra. Ta ta̱ Acán káchira: ʼÍyova ku̱a̱chii̱, chi xi̱nii̱ iin ti̱ko̱to̱ livi xíʼin ña̱ oro xíʼin ña̱ plata ta ña̱yóʼo ndeéní ni̱kutói̱ña ta ki̱ʼinña ku̱a̱ʼa̱n xíʼi̱n chí veʼi̱. Ndiʼi ña̱yóʼo kivi ndaniʼíndóña veʼi̱ chi kán sa̱ndúxu̱i̱nñaʼ.

Soo tá nda̱niʼínaña saá níʼinaña ki̱xa̱a̱na nu̱ú ta̱ Josué, ta ta̱yóʼo ni̱ka̱ʼa̱nra xíʼin ta̱ Acán: ʼ¿Ndachun chi̱ka̱ún tu̱ndóʼo nu̱úyó? Ta vitin Jehová chika̱a̱ra yóʼó ndaʼa̱ tu̱ndóʼoʼ. Ndiʼi na̱ yiví ku̱unna yu̱u̱ ta̱ Acán xíʼin na̱ veʼera, saá ni̱xi̱ʼi̱na. ¿Ndáaña sákuaʼayó xíʼin ña̱yóʼo? ¿Á va̱ʼa kiʼinyó ña̱ʼa inkana?

Tándi̱ʼi, na̱ ñuu Israel ke̱e tukuna ku̱a̱ʼa̱nna kanitáʼanna xíʼin na̱ ñuu Hai. Ta vitin Jehová chi̱ndeévarana, ta na̱kuchiñuvana ka̱nitáʼanna xíʼin na̱yóʼo.