¿Á XA̱XÍNIÚN káʼa̱n iin tí burro? ʼKǒo kití káʼa̱nʼ, kachivaún. Biblia káʼa̱nña ña̱ ni̱ka̱ʼa̱n iin tí burro. Ná kotoyó ndachun va̱ʼa ni̱ka̱ʼa̱nrí.

Na̱ ñuu Israel xa̱ku̱numí ndi̱ʼvina ñuu Canaán. Ta̱ Balac, ta̱ rey ñuu Moab, ni̱yi̱ʼvíra na̱ ñuu Israel. Ña̱kán ni̱ka̱ʼa̱nra xíʼin na̱ káchíñu nu̱úra ña̱ ná ku̱ʼu̱nna nandukúna iin ta̱ naní Balaam, ña̱ ku̱ʼu̱nra chika̱a̱ra chiʼña sa̱tá na̱ ñuu Israel. Ta̱ Balac káʼa̱nra taxira ku̱a̱ʼání xu̱ʼún ndaʼa̱ ta̱ Balaam, ña̱kán nda̱ara sa̱tá tí burro sa̱na̱ra ta ku̱a̱ʼa̱nra nu̱ú ta̱ Balac.

Jehová kǒo kúni̱ra ña̱ ná chika̱a̱ ta̱ Balaam chiʼña sa̱tá na̱ ñuura. Ña̱kán chi̱ndaʼára iin ángel xíʼin iin yuchu̱ káni̱ ña̱ ku̱a̱ʼa̱nra ndasira yichi̱ nu̱ú ta̱ Balaam. Ta̱ Balaam va̱ása kívi kunira ta̱ ángel, soo tí burro sa̱na̱ra xi̱nivarí ta̱ ángel. Tí burro yóʼo kǒo níxiinrí kuyatinrí nu̱ú ta̱ ángel, ta ndu̱varí yichi̱. Ta̱ Balaam yóʼo ni̱sa̱a̱níra ta ka̱nira tí burro xíʼin yitu̱n.

Jehová ta̱xira ña̱ va̱ʼa kuniso̱ʼo ta̱ Balaam ña̱ káʼa̱n tí burro. ʼ¿Ndáaña ke̱ʼíi̱ xíʼún ña̱kán kániún yi̱ʼi̱?ʼ, káchi tí burro xíʼinra.

ʼTá káa iin ta̱a sána saá kái̱ nu̱ún, tá níkixi iin yuchu̱ xíʼi̱n yóʼova kaʼníi̱ yóʼoʼ, káchi ta̱ Balaam xíʼinrí.

ʼ¿Á xa̱kéʼíi̱ ña̱yóʼo xíʼún tá ya̱chi̱?ʼ, káchirí xíʼinra.

ʼKǒo ña̱yóʼo kéʼún xíʼi̱nʼ, káchira.

Tasaá Jehová xu̱nára nu̱ú ta̱ Balaam ña̱ va̱ʼa ná kunira níndichi iin ángel xíʼin yuchu̱ ña̱ ndásira yichi̱ nu̱ú ta̱ Balaam. ʼ¿Ndachun kániún tí burro sa̱na̱ún?ʼ, káchi ta̱ ángel xíʼinra. ʼVa̱xii̱ ndasii̱ yichi̱ nu̱ún ña̱ va̱ása ku̱ʼún chika̱ún chiʼña na̱ ñuu Israel. Tá níkuyatin tí burro sa̱na̱ún xíʼún nu̱íi̱ xa̱xaʼnívai̱ yóʼó, soo tí burro kǒo ña̱ kundoʼovíríʼ.

ʼÑa̱ ke̱ʼíi̱ yóʼo su̱ví ña̱ va̱ʼa kúúña, kǒo níxinii̱ níndichiún yichi̱ yóʼoʼ, káchi ta̱ Balaam. Tasaá ta̱xi ta̱ ángel ni̱ya̱ʼa ta̱ Balaam, ta ta̱yóʼo ku̱a̱ʼa̱nra kunira ta̱ Balac. Ni̱xa̱ʼa̱n tá ni̱xa̱ʼa̱nva ta̱ Balaam chi̱ka̱a̱ra chiʼña sa̱tá na̱ ñuu Israel, soo Jehová u̱ni̱ yichi̱ chi̱ka̱a̱ra bendición na̱ ñuura.