TÁ NÁʼA̱ ko̱o̱ ndixa saá náʼa̱ tí ko̱o̱ ni̱su̱ku̱nndu sa̱tá yitu̱n yóʼo. Soo su̱ví ko̱o̱ ndixa kúúrí. Tí ka̱ava kúúrí. Jehová ni̱ka̱ʼa̱nra xíʼin ta̱ Moisés ña̱ ná kanindichira iin yitu̱n ta sa̱tá tú yóʼo sukúnndurarí, ña̱kán va̱ʼa kuninarí ta va̱ása kuvina. Soo tí ko̱o̱ tí ndóo nu̱ú ñuʼú yóʼo su̱ví tí ka̱a kúúrí chi ko̱o̱ ndixava kúúrí. Ta kíʼin kue̱ʼe̱na tá tíinrína á xáxírína. ¿Á xíni̱ún ndachun xáxírí na̱yóʼo?

Saáchi na̱ ñuu Israel ni̱ka̱ʼa̱n ndi̱va̱ʼana xa̱ʼa Jehová xíʼin xa̱ʼa ta̱ Moisés. Ta káchina: ʼ¿Ndachun ta̱váún ndi̱ʼi̱ ñuu Egipto ña̱ kuvindi̱ nu̱ú ñuʼú yi̱chí yóʼo? Ni ña̱ kuxundi̱ ni ti̱kui̱í koʼondi̱ kǒo yóʼo. Ta kǒo kútóokandi̱ kuxundi̱ maná yóʼoʼ.

Soo ña̱ maná yóʼo ña̱ va̱ʼava kúúña. Chi xíʼin milagro ta̱xi Jehová ña̱yóʼo ndaʼa̱na ta saátu ti̱kui̱í xíʼina. Ta na̱yóʼo kǒo nítaxina tixaʼvi ndaʼa̱ Jehová, xa̱ʼa ña̱yóʼo ta̱xira castigo ndaʼa̱na ta chi̱ndaʼára ko̱o̱ tí kue̱ʼe̱ ña̱ tiinri á kaxírí miína. Ta ku̱a̱ʼání na̱yóʼo xa̱xírí á ti̱inrí ta ni̱xi̱ʼi̱na.

Ña̱kán ki̱xina nu̱ú ta̱ Moisés ta ni̱ka̱ʼa̱nna xíʼinra: ʼÍyo ku̱a̱chindi̱ nu̱ú Ndióxi̱, chi ni̱ka̱ʼa̱n ndi̱va̱ʼandi̱ xa̱ʼara xíʼin xa̱ʼa miíún. Ta vitin ka̱ʼa̱n xíʼin Jehová xa̱ʼandi̱ ta ná sákútaʼara tí ko̱o̱ yóʼoʼ.

Tasaá ta̱ Moisés ni̱ka̱ʼa̱nra xíʼin Jehová xa̱ʼana. Jehová ni̱ka̱ʼa̱nra xíʼin ta̱ Moisés ña̱ ná keʼéra iin tí ko̱o̱ ka̱a. Ta ni̱ka̱ʼa̱nra xíʼinra ná sukúnndurarí sa̱tá yitu̱n, ta tíyóʼo ná kotona tá xa̱xí á ti̱in ko̱o̱ tí ndóo nu̱ú ñuʼú yóʼo miína. Ta̱ Moisés ke̱ʼéra ndiʼi ña̱ ni̱ka̱ʼa̱n Jehová xíʼinra. Tá xáxí á tíin ko̱o̱ na̱yóʼo xítona tí ko̱o̱ ta ndúva̱ʼana.

Ta íyo iin ña̱ sákuaʼayó xíʼin ña̱yóʼo. Ndiʼiyó tá íyo na̱ ñuu Israel xa̱xí á ti̱in ko̱o̱ saá íyoyó. Chi kúchéeyó, kíʼin kue̱ʼe̱ miíyó ta xíʼi̱yó. Ndóʼoyó ña̱yóʼo xa̱ʼa ña̱ kǒo níxiniso̱ʼo ta̱ Adán xíʼin ñá Eva ña̱ ni̱ka̱ʼa̱n Jehová xíʼinna chi ndiʼiyó kúú se̱ʼena. Soo Jehová xu̱nára iin yichi̱ nu̱úyó ña̱ va̱ʼa kutakuyó ndiʼi tiempo.

Chi̱ndaʼára se̱ʼera ta̱ Jesús ki̱xira nu̱ú Ñuʼú yóʼo. Ku̱a̱ʼá na̱ yiví xi̱ka̱ʼa̱nna xa̱ʼa ta̱ Jesús ña̱ su̱ví ta̱a va̱ʼa níxikuura, ña̱kán ka̱tikaanara ndaʼa̱ yitu̱n. Soo Jehová ta̱xira se̱ʼera ña̱ va̱ʼa sáka̱kura miíyó. Tá ná kundiku̱nyó ta̱ Jesús kivi kutakuyó ndiʼi tiempo. Soo chí nu̱únínu sakuaʼakayó xa̱ʼara.