¿Á XÍNI̱ÚN ndáaña kúú ña̱ ndákaya na̱ yiví nu̱ú ñuʼú yóʼo? Tá kúni̱ koo kaxin ña̱ kóoyo xi̱ta̱a̱n saá kúni̱ kooña. Ña̱ yaa kúúña tá íyo yu̱ku̱ válí saá íyoña. Soo su̱ví kaxin kúúña iin ña̱ʼa xíxivana kúúña.

Sa̱kán íyo iin yo̱o̱ ña̱ ke̱e na̱ ñuu Israel ñuu Egipto. Ta vitin ndóona nu̱ú ñuʼú yi̱chí. Kǒo ku̱a̱ʼá ña̱ʼa kuxuna ta káʼa̱n kúáchina: ʼVa̱ʼaka níxaʼní Jehová ndi̱ʼi̱ ña̱ ñuu Egipto. Saáchi kán xi̱xixindi̱ ña̱ kúni̱ miíndi̱ʼ.

Xa̱ʼa ña̱yóʼo ni̱ka̱ʼa̱n Jehová: ʼSakói̱n ña̱ kuxundó chí ndivíʼ. Ta sa̱kóonra ña̱yóʼo. Inka ki̱vi̱ tá ki̱xaʼá xi̱nina ña̱ʼa yaa yóʼo ki̱xaʼána ndáka̱tu̱ʼunna: ʼ¿Ndáa ña̱ʼa kúúña?ʼ

Ta̱ Moisés ni̱ka̱ʼa̱nra xíʼinna: ʼÑa̱yóʼo kúú ña̱ ta̱xi Jehová kuxundóʼ. Ta MANÁ káʼa̱nna xíʼinña. Tá íyo si̱táva̱ʼa válí ña̱ chíka̱a̱na ñu̱ñu̱ nu̱ú saá íyoña.

ʼÑa̱ kuxu kuitíndó ndakayandóʼ, káchi ta̱ Moisés xíʼinna. Tasaá íxaana míí ña̱ xíxivana ndákayana. Ta kána Ñu̱ʼu á ña̱ Ka̱ndii, maná ña̱ kǒo níndakayana ndútavaña.

ʼNi iinndó kǒo ndachiva̱ʼandó maná nda̱a̱ inka ki̱vi̱ʼ, káchi ta̱ Moisés xíʼinna. Soo savana kǒo kándíxana chi ndáchiva̱ʼavanaña. Ta, ¿á xíni̱ún ndáa ña̱ ndóʼo maná yóʼo? Inka ki̱vi̱ iin chútú ti̱kuxí xíʼinña ta kinikaví xáʼa̱nña.

Soo Jehová ni̱ka̱ʼa̱nra ku̱a̱ʼáña ná ndakayana ña̱ ki̱vi̱ i̱ñu̱. Ta ni̱ka̱ʼa̱nra ná ndachiva̱ʼana ña̱ kuxuna ña̱ ki̱vi̱ u̱xa̱ chi kǒoña sakóonra ki̱vi̱ saá. Tá nda̱chiva̱ʼana maná yóʼo ki̱vi̱ u̱xa̱ ni kǒo ti̱kuxí xíʼinña ni va̱ása xáʼa̱n kiniña. Inka milagro kúú ña̱yóʼo.

Ndiʼi ku̱i̱ya̱ ña̱ xi̱ndoo na̱ ñuu Israel nu̱ú ñuʼú yi̱chí, xi̱xixina maná.