NA̱YÓʼO na̱ ñuu Israel kúúna, soo ndaʼa̱ tu̱ndóʼo ñúʼu u̱vi̱ saána saáchi xíniñúʼu kununa ku̱ʼu̱nna ña̱ va̱ʼa ná kǒo kuvina. Ñaʼá ñá chíndeé táʼan xíʼinna Rahab naníñá, ta íyoñá veʼe ña̱ íyo yatin xíʼin nama̱ ñuu Jericó. Ná kotoyó ndachun ndo̱ʼona ña̱yóʼo.

Na̱ ñuu Israel xa̱kuyatin ko̱sokavana yu̱ta Jordán ta ndi̱ʼvina ñuʼú Canaán. Ta vitin ni̱ka̱ʼa̱n ta̱ Josué xíʼin u̱vi̱ ta̱a ña̱ ná ku̱ʼu̱nna koto se̱ʼéna ñuʼú kán xíʼin ñuu Jericó.

Tá ni̱xa̱a̱ u̱vi̱ ta̱a yóʼo ñuu Jericó, ku̱a̱ʼa̱nna veʼe ñá Rahab. Soo íyo iin na̱ ni̱ka̱ʼa̱n xíʼin ta̱ rey Jericó, ta káchina: ʼÑu̱ú ndi̱veʼé ki̱xi u̱vi̱ ta̱a ta̱ ke̱e ñuu Israel ña̱ xi̱tona ñuʼú yóʼoʼ. Tá xi̱niso̱ʼo ta̱ rey ña̱yóʼo, chi̱ndaʼára sava ta̱a ku̱a̱ʼa̱nna veʼe ñá Rahab, ta káchina xíʼinñá: ʼTavá ta̱a ta̱ ñúʼu veʼúnʼ. Soo ñá Rahab chi̱se̱ʼéñá na̱yóʼo xi̱ní veʼeñá, ta káchiñá: ʼKi̱xina veʼi̱ soo va̱ása xíni̱i̱ míí ñuuna. Tá xa̱ku̱a̱ʼa̱n kútikuiin ke̱ena ku̱a̱ʼa̱nna, tá kúma̱níka ndasina yéʼé ñuu yóʼo, kuaʼánndó sa̱tána chi ni̱ʼívandónaʼ. Tasaá xínu na̱yóʼo ku̱a̱ʼa̱nna nandukúnana.

Tá ke̱e na̱yóʼo ku̱a̱ʼa̱nna saá nda̱añá chi xi̱ní veʼeñá. Ta káchiñá xíʼin na̱ chi̱se̱ʼéñá: ʼXíni̱vai̱, Jehová taxi ñuʼú yóʼo ndaʼa̱ndó saáchi xi̱niso̱ʼondi̱ xa̱ʼandó ña̱ sa̱yíchi̱ Jehová mar Rojo ña̱ va̱ʼa ni̱ya̱ʼandó tá ke̱endó ñuu Egipto. Saátu ña̱ xa̱ʼníndó ta̱ rey Sehón xíʼin ta̱ rey Og. Kúni̱i̱ ña̱ va̱ʼa ná koo inindó xíʼi̱n saáchi va̱ʼa íyo inii̱ xíʼindó, sáka̱kundó yivái̱ xíʼin siʼíi̱, saátu na̱ ku̱ʼvai̱ xíʼin ná ku̱ʼvii̱ʼ.

Sáka̱kuvandi̱ na̱ veʼún soo xíniñúʼu keʼún iin ña̱ʼa, káchina xíʼinñá: ʼKiʼin yoʼo̱ kuaʼá yóʼo ta katikaúnña chí ventanaún, ta ka̱ʼa̱n xíʼin ndiʼi na̱ táʼún ná ndatakana veʼún. Tá ná kixindi̱ sandiʼi-xa̱ʼandi̱ ña̱ ñuu Jericó yóʼo, ta kunindi̱ yoʼo̱ kuaʼá yóʼo ventanaún kǒo kaʼníndi̱ ndóʼó. Tá ndi̱kóna na̱túʼunna xíʼin ta̱ Josué ndiʼi ña̱ ku̱u.