HISTORIA 54
Iin ta̱a ta̱ ndakú va̱ʼaka
¿ÁXÍNI̱ÚN nda̱saa xi̱naní iin ta̱a ta̱ ndakúní ni̱xi̱yo ña̱ tiempo xi̱naʼá? Sansón xi̱naníra ta iin juez xi̱kuura. Soo Jehová ta̱xi ndée ndaʼa̱ ta̱ Sansón. Tá kúma̱níka kaku ta̱yóʼo, Jehová ni̱ka̱ʼa̱nra xíʼin siʼíra: ʼXa̱ni̱nu̱mí koo iin se̱ʼún. Ta ta̱yóʼo kúú ta̱ saka̱ku na̱ ñuu Israel nu̱ú na̱ ñuu Filisteoʼ.
Na̱ ñuu Filisteo na̱ ndóo ñuu Canaán su̱ví na̱ yiví va̱ʼa kúúna. Íyo ku̱a̱ʼání na̱ xíka nu̱ú ku̱a̱chi nu̱úna, ta kúndiva̱ʼana xíʼin na̱ ñuu Israel. Iin yichi̱ ki̱ta ta̱ Sansón ku̱a̱ʼa̱nra nu̱ú ndóo na̱ ñuu Filisteo, kán ki̱ta iin tí león ta ndáʼyi̱rí nu̱úra ta kúni̱rí kaxírí ta̱yóʼo. Soo ta̱yóʼo xíʼin ndaʼa̱ kuitívara xa̱ʼnírarí. Ta ku̱a̱ʼánítu na̱ ñuu Filisteo xa̱ʼníra.
Tándi̱ʼi ta̱ Sansón ni̱kutóora xínira iin ñaʼá ñá naní Dalila. Na̱ chíñu ñuu Filisteo ni̱ka̱ʼa̱nna xíʼin ñá Dalila ña̱ iin tá iinna taxina 1,100 xu̱ʼún ña̱ plata ndaʼa̱ñá, tá ná ka̱ʼa̱nñá xíʼinna ndáaña kúú ña̱ táxi ndée ndaʼa̱ ta̱ Sansón. Ñá Dalila kútóoníñá xu̱ʼún. Su̱ví ña̱ nda̱a̱ kúni̱ñá ta̱ Sansón ta ni va̱ása kúni̱ñá na̱ ñuu Ndióxi̱. Chi ñáyóʼo ndákundeékañá ndáka̱tu̱ʼunñá ta̱ Sansón míí chí va̱xi ndée ña̱ kúúmiíra xa̱ʼa ña̱ ndakúníra.
Ñá Dalila na̱kuchiñuvañá sa̱ndáʼviñá ta̱ Sansón ta ni̱ka̱ʼa̱nra ndáa ña̱ʼa kúú ña̱ táxi ndéera. ʼNda̱a̱ nani ka̱kui̱ kǒo xáʼndana yixí xi̱níi̱. Ki̱vi̱ saáví nda̱kaxin Ndióxi̱ yi̱ʼi̱ ña̱ kachíñui̱ nu̱úra. Tá ná kaʼndana yixí xi̱níi̱, saá kǒoka ndeíi̱ kooʼ, káchira xíʼinñá.
Tá na̱kunda̱a̱-ini ñá Dalila ña̱yóʼo, sa̱kúsu̱nñá ta̱ Sansón nu̱ú si̱ʼinñá. Tasaá sa̱kiʼviñá iin ta̱a veʼeñá ta xa̱ʼndara yixí xi̱ní ta̱ Sansón. Tá ndu̱kaxi-ini ta̱ Sansón, kǒoka ndéera. Na̱ ñuu Filisteo ti̱innara ta ku̱a̱ʼa̱nvara xíʼinna, ta ta̱vána u̱vi̱ saá nduchú nu̱úra ta chi̱ka̱a̱nara veʼeka̱a.
Iin ki̱vi̱ na̱ ñuu Filisteo ke̱ʼéna iin vikó káʼnu ña̱ ndásakáʼnuna ndióxi̱ ña̱ naní Dagón, ta ta̱vána ta̱ Sansón veʼeka̱a ña̱ kusi̱kindaanara. Ta ña̱ yixí xi̱ní ta̱ Sansón xa̱ʼnu tukuña. Ta ni̱ka̱ʼa̱nra xíʼin ta̱ loʼo ta̱ tíin ndaʼa̱ra ku̱a̱ʼa̱nra: ʼSañá ndaʼíi̱ ná tii̱n nama̱ ña̱ ndíso veʼe káʼnu yóʼoʼ. Tasaá ni̱ka̱ʼa̱nra xíʼin Jehová ta ndu̱kúra ndée nu̱úra, tá ti̱inra nama̱ yóʼo, ta ni̱nda̱ʼyi̱ kóʼóra, ta káchira: ʼTaxi ná kuvii̱ xíʼin na̱ ñuu Filisteo yóʼoʼ. Ta 3,000 kúú na̱ ñúʼu vikó yóʼo, tá ti̱inra nama̱ yóʼo ndu̱vaña sa̱tána, ta ni̱xi̱ʼi̱ ndiʼina.
