¿NDÁAÑA kéʼé na̱ yiví yóʼo vitin? Iin si̱ndi̱ki̱ ndásakáʼnuna, ¿ndachun kéʼéna ña̱yóʼo?

Tá ni̱ku̱a̱chi̱ ta̱ Moisés yuku̱ kán, na̱ ñuu Israel ni̱ka̱ʼa̱nna: ʼKǒo kúnda̱a̱-iniyó ndáaña ndo̱ʼo ta̱ Moisés. Va̱ʼaka ná keʼéyó iin ndióxi̱ ña̱ va̱ʼa chindeé miíyó ña̱ keeyó yóʼoʼ.

ʼVa̱ʼavaʼ, káchi ta̱ Aarón ñani ta̱ Moisés xíʼinna. ʼTaxindó ndiʼi ña̱ʼandó ña̱ oro ndaʼíi̱ʼ. Tá ta̱xina ndiʼi ña̱yóʼo ndaʼa̱ ta̱ Aarón, ta̱yóʼo i̱xava̱ʼara iin si̱ndi̱ki̱ tí oro xíʼinña. Ta ki̱xaʼána káʼa̱nna: ʼTíyóʼo kúú ndióxi̱yó tí ta̱vá miíyó ñuu Egiptoʼ. Tasaá xa̱kiinna iin vikó káʼnu ta ki̱xaʼána ndásakáʼnunarí.

Tá xi̱ni Jehová ña̱yóʼo ni̱sa̱a̱níra. Ta ni̱ka̱ʼa̱nra xíʼin ta̱ Moisés: ʼKamaún ta kuaʼán chi su̱ví ña̱ va̱ʼa kéʼé na̱ ñuu Israel. Na̱ndosó-inina xa̱ʼa ley ña̱ ni̱ka̱ʼi̱n xíʼinna chi tí si̱ndi̱ki̱va ndásakáʼnunaʼ.

Ndi̱ku̱n kama ndi̱kó ta̱ Moisés. Tá ki̱xa̱a̱ra, ña̱yóʼo kúú ña̱ xi̱nira. Na̱ yiví yóʼo xítana ta tíxaʼana nu̱ú tí si̱ndi̱ki̱ tí oro. Ta̱ Moisés ni̱sa̱a̱kavíra, ki̱ʼinra u̱vi̱ saá yu̱u̱ nu̱ú va̱xi ley Ndióxi̱ ta sa̱kánaraña, ta ña̱yóʼo cha̱chi válíña. Tasaá ki̱ʼinra tí si̱ndi̱ki̱ yóʼo ta sa̱ndíʼi-xa̱ʼararí.

Su̱ví ña̱ va̱ʼa níkeʼé na̱ ñuu yóʼo. Xa̱ʼa ña̱yóʼo ni̱ka̱ʼa̱n ta̱ Moisés xíʼin sava ta̱a ña̱ ná tavána yuchu̱na ta kaʼnína ndiʼi na̱ yiví na̱ nda̱sakáʼnu si̱ndi̱ki̱. Xa̱ʼa ña̱yóʼo 3,000 kúú na̱ ni̱xi̱ʼi̱. ¿A kǒo náʼa̱ ña̱yóʼo nu̱úyó ña̱ ná kiʼinyó kuenta iinlá Jehová kúú ta̱ ndasakáʼnuyó ta kǒo ndasakáʼnuyó inka ndióxi̱?