¿Á XÍNI̱ÚN ndáa veʼe kúú ña̱yóʼo? Ña̱yóʼo kúú veʼe nu̱ú ndásakáʼnuna Jehová. Veʼe yóʼo naníña tabernáculo. Tándi̱ʼi ke̱ena ñuu Egipto saá i̱xava̱ʼanaña ta ti̱xin iin ku̱i̱ya̱ ni̱xi̱nuña. ¿Á xíni̱ún ndáana ni̱ka̱ʼa̱n ña̱ keʼénaña?

Jehová kúú ta̱ ni̱ka̱ʼa̱n. Soo tá ndíka̱a̱ ta̱ Moisés ña̱ yuku̱ Sinaí, kán ni̱ka̱ʼa̱n Jehová xíʼinra ndáa ki̱ʼva kooña. Ni̱ka̱ʼa̱nra xíʼinra ña̱ ná kǒo keʼé kútunaña, ña̱kán va̱ʼa kaninaña. Ta ndáaka nu̱ú ku̱ʼu̱nna kivi ku̱ʼu̱nña xíʼinna ña̱kán va̱ʼa ndasava̱ʼa tukunaña. Na̱ ñuu Israel ndáaka nu̱ú xi̱xikana saá xi̱xikaña xíʼinna.

Koto caja loʼo ña̱ ndíka̱a̱ ini cuarto loʼo yóʼo. Caja yóʼo kúni̱ kachiña caja ña̱ trato ña̱ chi̱ka̱a̱ Ndióxi̱ xíʼinna á nanítuña arca ña̱ pacto. U̱vi̱ kúú na̱ ángel na̱ naní querubín na̱ na̱kuva̱ʼa xíʼin oro, ta iinna iin iin xiyo tú caja loʼo yóʼo. Ndióxi̱ ka̱ʼyí tukura U̱xu̱ Ley nu̱ú u̱vi̱ yu̱u̱, chi yu̱u̱ ña̱ nu̱ú ta̱ Moisés sa̱ndíʼi-xa̱ʼaña. Ta ña̱yóʼo nda̱chiva̱ʼanaña ini caja ña̱ trato. Ta saátu nda̱chiva̱ʼana iin ki̱si ña̱ maná ini ña̱yóʼo. ¿Á ndákaʼún ndáaña kúú maná?

Jehová nda̱ka̱xinra ta̱ Aarón ñani ta̱ Moisés ña̱ kuura iin su̱tu̱ káʼnu. Ta̱yóʼo kúú ta̱ níʼi yichi̱ nu̱ú na̱ ñuu Israel. Ta na̱ se̱ʼe ta̱ Aarón su̱tu̱ kúútu na̱yóʼova.

Ta vitin koto inka cuarto káʼnu, u̱vi̱ cuarto káʼa̱n ña̱yóʼo. Koto caja loʼo nu̱ú kána yi̱ʼma̱. Ña̱yóʼo kúú altar nu̱ú xi̱xaʼmi na̱ su̱tu̱ ña̱ʼa ña̱ xi̱chiʼmana. Kototu ña̱ candelabro, kúúmiíña u̱xa̱ lámpara. Ta vitin kotoún tú mesa nu̱ú túyóʼo ndósó 12 si̱táva̱ʼa.

Chi yéʼé veʼe yóʼo íyo iin ña̱ʼa nu̱ú táánna ti̱kui̱í. Yóʼo kúú nu̱ú ndákata na̱ su̱tu̱ ndaʼa̱na á xa̱ʼana. Ta yóʼo níndichitu ña̱ altar káʼnu nu̱ú xi̱xaʼmina kití tí xi̱taxina ndaʼa̱ Jehová. Míí ma̱ʼñú ñuu nu̱ú xi̱ndoo na̱ ñuu Israel xi̱ndichi veʼe mánda nu̱ú xi̱ndasakáʼnuna Jehová.