TÁ KI̱XAʼÁ ñúʼu na̱ ñuu Israel ndaʼa̱ tu̱ndóʼo, ni̱ka̱ʼa̱nna xíʼin Jehová. Jehová ta̱xira ta̱a na̱ ndakú-ini ña̱ chindeéna na̱ ñuura. Tu̱ʼun Ndióxi̱ káʼa̱nña nanína juez. Ta̱ Josué xi̱kuu juez ta̱ nu̱ú, tándi̱ʼi ku̱a̱ʼáka na̱ juez ni̱xi̱yo, na̱yóʼo xi̱kuuna: ta̱ Otniel, ta̱ Aod xíʼin ta̱ Samgar. Ta u̱vi̱ xi̱kuutu ná si̱ʼíva ná chi̱ndeé ñuu Israel, ta iin ñáyóʼo xi̱naní Débora ta inkañá xi̱naní Jael.

Ñá Débora xi̱kuuñá profeta ta xi̱kuutuñá juez, ta xi̱ka̱ʼa̱n Jehová xíʼinñá xa̱ʼa ña̱ koo chí nu̱únínu, tasaá xi̱ka̱ʼa̱nñá xíʼin na̱ ñuu Israel ña̱ xi̱ka̱ʼa̱n Jehová xíʼinñá. Nina xi̱xa̱ʼa̱nñá xi̱ndu̱ʼuñá xa̱ʼa iin tú ñu̱u̱, ta yóʼo xi̱kixi na̱ yiví nu̱úñá ña̱ xi̱chindeéñá na̱ xi̱ndo̱ʼo ku̱a̱chi.

Tá tiempo saá ta̱ Jabín xi̱kuu ta̱ rey ña̱ ñuu Canaán, ta xi̱kuumiíra 900 carro tú xi̱xika nu̱ú ku̱a̱chi. Ta na̱ soldado na̱ xi̱kachíñu nu̱úra nina na̱ ndakú xi̱kuuna, ña̱kán i̱xandúxana xíʼin ku̱a̱ʼání na̱ ñuu Israel ña̱ ni̱xa̱a̱na ka̱chíñuna nu̱úra. Sísara xi̱naní ta̱ xi̱nu̱ú nu̱ú na̱ soldado ta̱ rey Jabín.

Iin ki̱vi̱ ni̱ka̱ʼa̱n ñá Débora xíʼin ta̱ juez Barac, ta káchiñá: ʼJehová ni̱ka̱ʼa̱n: “Sándátaka 10,000 ta̱a, ta ná ku̱ʼu̱nna xíʼún chí yuku̱ Tabor ta kán chika̱i̱ ta̱ Sísara xa̱a̱ra nu̱ún. Ta yi̱ʼi̱ chindéi̱ yóʼó ña̱ sandiʼi-xa̱ʼún ta̱yóʼo xíʼin na̱ soldado na̱ káchíñu nu̱úra”ʼ.

Ta̱ Barac ni̱ka̱ʼa̱nra xíʼin ñá Débora: ʼKu̱ʼi̱n tá ná ku̱ʼún xíʼi̱nʼ. Ñá Débora ku̱a̱ʼa̱nvañá xíʼin ta̱ Barac, soo káchiñá xíʼinra: ʼKǒo kuchiñún ña̱ sandiʼi-xa̱ʼún ta̱ Sísara, chi Jehová taxi ta̱yóʼo ndaʼa̱ iin ñaʼá, ta ñáyóʼo kúú ñá kaʼní-ñaʼáʼ. Míí ña̱ ni̱ka̱ʼa̱n ñá Débora ña̱kán ku̱u.

Ta̱ Barac nu̱ura chí yuku̱ Tabor ña̱ va̱ʼa niʼí táʼanra xíʼin na̱ soldado ta̱ Sísara. Soo Jehová, iin kama kuití sa̱kóonra sa̱vi̱ iin nda̱a̱ nda̱a̱ nda̱kutúrá ta ni̱kandaa ndiʼi na̱yóʼo xíʼin ti̱kui̱í. Ta̱ Sísara nu̱ura carrora ta xi̱nura ku̱a̱ʼa̱nra.

Tándi̱ʼi, ta̱ Sísara ni̱xa̱a̱ra veʼe ñá Jael. Ta ni̱ka̱ʼa̱nñá xíʼinra ná ki̱ʼvira veʼeñá, ta ta̱xiñá leche xi̱ʼira. Tasaá ni̱ki̱si̱vara. Ta ñá Jael ki̱ʼinñá iin yitu̱n xi̱ín nu̱ú, ta xíʼin túyóʼo ka̱anñá xi̱níra. Tándi̱ʼi ki̱xa̱a̱ ta̱ Barac veʼe ñá Jael ta ni̱na̱ʼa̱ñá ta̱ Sísara ta̱ ni̱xi̱ʼi̱ yóʼo nu̱ú ta̱ Barac. Yóʼo ni̱xi̱nu tu̱ʼun ña̱ ni̱ka̱ʼa̱n ñá Débora.

Tándi̱ʼi xa̱ʼnína ta̱ rey Jabín, ta saáví nda̱kundoo va̱ʼa loʼo na̱ ñuu Israel.