¿Á XÍNI̱ÚN ndáañá kúú ñá ñaʼá livi va̱xi nu̱ú ta̱ David? Abigail naníñá. Ta ñáyóʼo va̱ʼaní ndákanixi̱níñá chi kǒo nítaxiñá ña̱ keʼé ta̱ David ña̱ va̱ása va̱ʼa. Ta vitin ná kotoyó ndáaña ndóʼo ta̱ David tasaá sakuaʼayó ndáaña kǒo nítaxiñá keʼéra.

Tándi̱ʼi xi̱nu ta̱ David nu̱ú ta̱ Saúl, chi̱se̱ʼéra miíra ini kavá. Na̱ ñanira xíʼin na̱ veʼera va̱xina nu̱ú ndíka̱a̱ra. Ki̱ʼva 400 ta̱a va̱xi nu̱úra, ta̱ David ni̱xa̱a̱ra ku̱ura iin ta̱ níʼi yichi̱ nu̱úna. Ta ni̱xa̱ʼa̱nra nu̱ú ta̱ rey ñuu Moab ta ni̱ka̱ʼa̱nra xíʼinra: ʼNdúkúi̱ iin ña̱ ma̱ní nu̱ún, taxiún ná koo na̱ veʼi̱ ñuún nda̱a̱ ná ya̱ʼa loʼo ña̱ ndóʼi̱ʼ. Tándi̱ʼi, ku̱a̱ʼa̱nvara xíʼin na̱ xíka xíʼinra chí yuku̱ ña̱ chi̱se̱ʼéna miína.

Ni̱ya̱ʼa tiempo, ta̱ David ni̱xa̱a̱ra xi̱nira ñá Abigail. Nabal naní yiíñá, iin ta̱ ku̱i̱ká kúúra, ku̱a̱ʼání ñuʼú kúúmiíra. Ndikachi sa̱na̱ra 3,000 kúúrí ta 1,000 kúú ti̱xúʼu sa̱na̱ra. Ta̱ Nabal su̱ví ta̱a va̱ʼa kúúra. Soo ñá síʼíra ñá Abigail liviníñá ta va̱ʼaní iniñá. Iin ki̱vi̱ nda̱a̱ sa̱kákuñá na̱ veʼeñá. Ná kotoyó ndáaña ke̱ʼéñá.

Ta̱ David xíʼin na̱ xíka xíʼinra viíní ni̱xi̱yo inina xíʼin ta̱ Nabal. Chi̱ndeé táʼanna xíʼinra ña̱ xi̱ndaana ndikachi sa̱na̱ra. Iin ki̱vi̱ ta̱ David chi̱ndaʼára na̱ xíka xíʼinra ku̱a̱ʼa̱nna ndukúna iin ña̱ ma̱ní nu̱ú ta̱ Nabal. Ni̱xa̱a̱na nu̱ú ndíka̱a̱ra xíʼin na̱ káchíñu nu̱úra xáʼndana yixí ndikachi sa̱na̱ra. Ta̱ Nabal ke̱ʼéra iin vikó ta íyokaví ña̱ʼa kuxuna. Ta na̱yóʼo ni̱ka̱ʼa̱nna xíʼinra: ʼVa̱ʼaní ta̱a xi̱kuundi̱ xíʼún, chi̱ndeéndi̱ yóʼó ña̱ xi̱ndaandi̱ ndikachi sa̱na̱ún, ta nda̱a̱ ni iinrí kǒo ní íxakuíʼnandi̱. Ta vitin ndúkúndi̱ ña̱ ma̱ní nu̱ún, taxi loʼo ña̱ʼa kuxundi̱ʼ.

ʼVa̱ása taxii̱ ña̱ kuxu táʼan ndóʼó na̱ kǒo xíni̱i̱ʼ, káchi ta̱ Nabal. Va̱ása níka̱ʼa̱n viíra xíʼin na̱yóʼo ta ni̱ka̱ʼa̱n kinira xa̱ʼa ta̱ David. Tá ndi̱kóna na̱túʼunna ña̱yóʼo xíʼin ta̱ David, ta ta̱yóʼo ni̱sa̱a̱níra. ʼNdakiʼinndó yuchu̱ndó ná ku̱ʼu̱nña xíʼinyóʼ, káchira xíʼinna. Ta ke̱ena ku̱a̱ʼa̱nna kaʼnína ta̱ Nabal xíʼin na̱ káchíñu nu̱úra.

Iin ta̱ káchíñu nu̱ú ta̱ Nabal, tá xi̱niso̱ʼora ndiʼi ña̱ ni̱ka̱ʼa̱n kini ta̱ Nabal xa̱ʼa ta̱ David, ta na̱túʼunra xíʼin ñá Abigail ndiʼi ña̱ ni̱ka̱ʼa̱n ta̱ Nabal. Ñá Abigail kama i̱xandúviñá ña̱ʼa, ta sa̱kuísoñá tí burro xíʼin ña̱yóʼo ta ki̱tañá ku̱a̱ʼa̱nñá. Tá nda̱kutáʼanñá xíʼin ta̱ David, nu̱uñá sa̱tá tí burro, ta xi̱kuxítíñá nu̱ú ta̱ David ta ni̱ka̱ʼa̱nñá xíʼinra: ʼTáta, ndúkúi̱ ña̱ ma̱ní nu̱ún, va̱ása kuniso̱ʼún ña̱ ni̱ka̱ʼa̱n yiíi̱ xa̱ʼún. Ta̱ sánava kúúra, su̱ví ña̱ va̱ʼa níka̱ʼa̱nra. Ña̱ʼa yóʼo kúúña ki̱xa̱a̱ xíʼi̱n táxii̱ ndaʼún, ndakiʼinña. Ta koún ña̱ káʼnu-ini xa̱ʼandi̱, xa̱ʼa ndiʼi ña̱ ni̱ka̱ʼa̱n yiíi̱ xa̱ʼúnʼ.

ʼVa̱ʼaní ndákanixi̱níún. Tixaʼvi yóʼó va̱ása kaʼníi̱ ta̱ Nabal xa̱ʼa ña̱ ni̱ka̱ʼa̱n ndi̱va̱ʼara xa̱ʼíi̱. Vitin ndikó chí veʼún, chi kǒoka ku̱a̱chi kooʼ, káchi ta̱ David xíʼinñá. Tándi̱ʼi, ni̱xi̱ʼi̱va ta̱ Nabal, ta ñá Abigail ni̱xa̱a̱ñá xi̱kuuñá ñá síʼí ta̱ David.