NA̱ ÑUU Filisteo va̱xi tukuna kanitáʼanna xíʼin na̱ ñuu Israel. U̱ni̱ na̱ ñani ta̱ David na̱ chée nu̱úra ku̱a̱ʼa̱nna nu̱ú ku̱a̱chi xíʼin ta̱ Saúl. Iin ki̱vi̱ ni̱ka̱ʼa̱n ta̱ Jesé xíʼin ta̱ David: ʼKuaʼán kotoún á ñúʼu va̱ʼa na̱ ñaniún, ta kuniʼún si̱táva̱ʼa xíʼin ña̱ʼa kuxunaʼ.

Tá ni̱xa̱a̱ ta̱ David nu̱ú ndóona, xínura ku̱a̱ʼa̱nra nándukúra na̱ ñanira nu̱ú ku̱a̱ʼa̱nna kanitáʼanna. Ta̱ Goliat ta̱ ñuu Filisteo va̱xira kúsi̱kindaara na̱ ñuu Israel. Xa̱ku̱a̱ʼa̱n 40 ki̱vi̱, xi̱ta̱a̱n xíʼin xi̱kua íxaara saá. Ta kánarana: ʼNdaka̱xinndó iin na̱ kanitáʼan xíʼi̱n. Tá ná kuchiñuna kaʼnína yi̱ʼi̱, ndi̱ʼi̱ xa̱a̱ndi̱ kuundi̱ na̱ kachíñu nu̱úndó. Soo tá ná kuchiñui̱ kaʼnína, ta ndóʼó kuundó na̱ kachíñu nu̱úndi̱. Xíni̱ va̱ʼi̱ ña̱ kǒo kuchiñundó ndaniʼíndó iin na̱ kaʼní yi̱ʼi̱ʼ.

Ta̱ David ni̱nda̱ka̱tu̱ʼunra sava na̱ soldado: ʼ¿Ndáaña taxina ndaʼa̱ ta̱ kaʼní ta̱ Filisteo yóʼo tasaá va̱ʼa ka̱ku na̱ ñuu Israel nu̱ú tu̱ndóʼo?ʼ

Ta nda̱kuiin iin ta̱ soldado káchira: ʼTa̱ Saúl ku̱a̱ʼání ña̱ ku̱i̱ká taxira ndaʼa̱ra, tasaá taxitura ñá loʼo se̱ʼera tindaʼa̱ñá xíʼin ta̱yóʼoʼ.

Ndiʼi na̱ ñuu Israel yíʼvina xínina ta̱ Goliat chi súkunníra ta káʼnuníra. Táki̱ʼva 3 metro súkunra, ta íyo iin soldado ta̱ ndíso escudora.

Sava na̱ soldado ni̱ka̱ʼa̱nna xíʼin ta̱ Saúl xa̱ʼa ta̱ David chi kúni̱ra kanitáʼanra xíʼin ta̱ Goliat. Soo ta̱ Saúl káchira xíʼin ta̱ David: ʼIin ta̱ loʼova kúún, kǒo kuchiñún kaʼníúnra, chi xi̱naʼáví kúúra soldadoʼ. Ta̱ David ni̱ka̱ʼa̱nra: ʼYi̱ʼi̱ xa̱ʼní iin tí oso xíʼin iin tí león tá ti̱inrí ndikachi sana yivái̱. Ta vitin ta̱ ñuu Filisteo yóʼo táki̱ʼva i̱xai̱ xíʼin tí kán saá kootu ta̱yóʼova. Míí Jehová taxi ta̱yóʼo ndaʼíi̱ʼ. Ta̱ Saúl ni̱ka̱ʼa̱nra xíʼin ta̱ David: ʼKuaʼán kaʼníúnra, ta Jehová ná chindeé yóʼóʼ.

Ta̱ David ni̱xa̱ʼa̱nra nu̱ú ku̱a̱ʼa̱n yu̱ta ta ki̱ʼinra u̱ʼu̱n yu̱u̱ ta ta̱ánraña ini lékara. Tasaá nda̱ndikóra xíʼin honda ña̱ kanitáʼanra xíʼin ta̱ Goliat. Ta̱ Goliat tá xi̱nira ta̱ David iin xáku̱ yu̱ʼu̱ra ña̱ kaʼníra ta̱ loʼo yóʼo.

ʼNaʼa yóʼo, ta taxii̱ yóʼó kaxí kitíʼ, káchi ta̱ Goliat xíʼin ta̱ David. Soo ta̱ David káchira: ʼYóʼó va̱xiún nu̱íi̱ ta níʼún iin yuchu̱ xíʼin yitu̱n ka̱a. Soo yi̱ʼi̱ ku̱xa̱i̱ nu̱ún xíʼin ki̱vi̱ Jehová ña̱ kanitáʼi̱n xíʼún. Ta vitin Jehová taxira yóʼó ndaʼíi̱ ta yi̱ʼi̱ kaʼníi̱ yóʼóʼ.

Ta vitin ta̱ David xínura ku̱a̱ʼa̱nra nu̱ú ta̱ Goliat. Ta̱vára yu̱u̱ ini lékara, ta chi̱ka̱a̱raña ini honda, ta sa̱kánaraña xíʼin ndiʼi ndéera ña̱ kaniña ta̱ Goliat. Ta yu̱u̱ yóʼo ka̱niña míí xi̱ní ta̱ Goliat ta ni̱xi̱ʼi̱vara. Tá xi̱ni na̱ ñuu Filisteo ndu̱va ta̱ Goliat, xi̱nuna ku̱a̱ʼa̱nna. Ta na̱ ñuu Israel ta̱xínndíku̱nna sa̱tá na̱yóʼo ta na̱kuchiñuna xíʼinna.