TÁ NÁ kuviún, ¿á kusi̱í-ini siʼún tá ná ndatakún? Kusi̱íníva-iniñá. Soo, ¿á kivi ndataku na̱ ni̱xi̱ʼi̱? ¿Á xa̱ndátaku sava na̱ ni̱xi̱ʼi̱?

Koto nu̱ú na̱ʼná yóʼo va̱xi iin ta̱a, iin ñaʼá xíʼin iin ta̱ loʼo. Ta̱a yóʼo kúú ta̱ profeta Elías. Ñáyóʼo ñá ñuu Sarepta kúúñá, ta yiíñá ni̱xi̱ʼi̱vara, ta se̱ʼeñá kúú ta̱ loʼo yóʼo. Iin ki̱vi̱ ki̱ʼin kue̱ʼe̱ ta̱ loʼo se̱ʼeñá, ndeékaví ndo̱ʼora, ta ni̱xi̱ʼi̱vara. Tasaá ni̱ka̱ʼa̱n ta̱ Elías xíʼinñá: ʼTaxi se̱ʼún ndaʼíi̱ʼ.

Ta̱ Elías nda̱kiʼinrara ku̱a̱ʼa̱n xíʼinra ta chi̱núurara nu̱ú xi̱to. Tasaá ni̱ka̱ʼa̱nra xíʼin Jehová: ʼJehová, sándátaku ta̱ loʼo yóʼoʼ. Tasaá ki̱xaʼá ndákiʼinra ta̱chíra. Tándi̱ʼi nu̱u ta̱ Elías ta ni̱ka̱ʼa̱nra xíʼin siʼí ta̱ loʼo yóʼo. ʼKoto tákuva se̱ʼúnʼ. Ta ñáyóʼo ni̱kusi̱íkaví-iniñá.

Eliseo naní inka profeta Jehová. Ta̱yóʼo chíndeé táʼan xíʼin ta̱ Elías. Soo tá ni̱ya̱ʼa tiempo, Jehová ta̱xitura ndée ndaʼa̱ ta̱ Eliseo ña̱ va̱ʼa keʼéra milagro. Iin ki̱vi̱ ke̱era ku̱a̱ʼa̱nra ñuu Sunem, ta kán íyo iin ñaʼá ñá va̱ʼaní-ini xíʼinra. Tándi̱ʼi ka̱ku iin se̱ʼeñá.

Iin xi̱ta̱a̱n, tá xa̱chée ta̱ loʼo yóʼo, ke̱era ku̱a̱ʼa̱nra yuku̱ nu̱ú káchíñu yivára. Ta iin kama ni̱nda̱ʼyi̱ kóʼóra: ʼXi̱níi̱ kúʼvi̱ʼ, káchira. Ta nda̱kiʼinnara ku̱a̱ʼa̱n xíʼinna chí veʼe, ta ni̱xi̱ʼi̱vara. Kúsuchíkaví-ini siʼíra xa̱ʼara. Ta ndi̱ku̱n ke̱eñá ku̱a̱ʼa̱nñá nandukúñá ta̱ Eliseo.

Tá ki̱xa̱a̱ ta̱ Eliseo, ni̱ki̱ʼvira nu̱ú sa̱kuaana ta̱ loʼo ni̱xi̱ʼi̱ yóʼo. Ta ni̱ka̱ʼa̱nra xíʼin Jehová, ta sa̱kuaara miíra nu̱ú-ini ta̱ loʼo yóʼo. Ta iin kama kuití ku̱a̱ʼa̱n ndúniʼní ta̱ loʼo yóʼo, ta u̱xa̱ yichi̱ ni̱ka̱xinra. Ni̱kusi̱íkaví-ini siʼíra tá ni̱ki̱ʼviñá ta xi̱niñá tákura.

Ku̱a̱ʼání na̱ yiví xa̱ni̱xi̱ʼi̱. Ña̱kán kúsuchíní-ini na̱ veʼena ta saátu na̱ migona xa̱ʼana. Miíyó kǒo kúchiñuyó sándátakuyó na̱ xa̱ni̱xi̱ʼi̱. Soo Jehová va̱ʼava sandátakurana. Chí nu̱únínu loʼoka sakuaʼayó ndáaña keʼéra ña̱ va̱ʼa sandátakura ku̱a̱ʼání na̱ yiví na̱ xa̱ni̱xi̱ʼi̱.