KOTO na̱ yiví xáku̱ndaana ta̱ táta loʼo yóʼo. ¿Á xíni̱ún ndáa ta̱ kúúra? Jeremías naníra, ta profeta kúúra nu̱ú Jehová.

Sa̱kán loʼo tiempo ni̱ya̱ʼa tá ki̱xaʼá ta̱ Josías sándiʼi-xa̱ʼara ndióxi̱ vatá, Jehová ni̱ka̱ʼa̱nra xíʼin ta̱ Jeremías ña̱ kuura profeta. Soo, ta̱ Jeremías kǒo kándíxa-inira ña̱ kuura profeta chi nu̱ú miíra iin ta̱ loʼova kúúra. Soo Jehová ni̱ka̱ʼa̱nra chindeérara.

Ta̱ Jeremías káʼa̱nra xíʼin na̱ ñuu Israel ña̱ ná sandákoona ña̱ kini kéʼéna, ta káchira: ʼNa̱ yiví na̱ kǒo kúú ñuu Israel, ndióxi̱ vatáva ndásakáʼnunaʼ. Soo ku̱a̱ʼání na̱ ñuu Israel kǒo kúni̱na ndasakáʼnuna Ndióxi̱ míí ta̱ nda̱a̱, chi kúni̱na ndasakáʼnuna ndióxi̱ vatáva. Tá ni̱ka̱ʼa̱n ta̱ Jeremías xíʼinna ña̱ kixi iin castigo nu̱úna xa̱ʼa ña̱ kéʼéna ña̱ kini, na̱ ni̱xa̱ku̱va kúúna.

Tá ni̱ya̱ʼa tiempo, ni̱xi̱ʼi̱va ta̱ Josías. Ni̱ya̱ʼa u̱ni̱ yo̱o̱, ta̱ Joaquín se̱ʼera ndu̱u rey. Soo ta̱ Jeremías káʼa̱nkara xíʼin na̱ ñuu: ʼÑa̱ ñuu Jerusalén ndiʼi-xa̱ʼavaña tá kǒo xíínndó sandákoondó ña̱ kini kéʼéndóʼ. Na̱ su̱tu̱ kúni̱na kaʼnína ta̱ Jeremías, ta káchina: ʼTa̱ Jeremías xíniñúʼu kuvira, saáchi su̱ví tu̱ʼun va̱ʼa káʼa̱nra xa̱ʼa ñuuyóʼ.

¿Ndáaña keʼé ta̱ Jeremías vitin? Ta̱yóʼo va̱ása níyi̱ʼvíra, ta ni̱ka̱ʼa̱nra xíʼin ndiʼina: ʼJehová chi̱ndaʼá yi̱ʼi̱ ña̱ ka̱ʼi̱n ña̱yóʼo xíʼinndó. Tá kǒo xíínndó sándákoondó ña̱ kéʼéndó, Jehová sandiʼi-xa̱ʼara ñuu Jerusalén. Soo iin ña̱ʼa káʼi̱n xíʼinndó, tá ná kaʼníndó yi̱ʼi̱, kaʼníndó iin ta̱a ta̱ kǒo ku̱a̱chivaʼ.

Na̱ chíñu ñuu Israel kǒo níxáʼnína ta̱ Jeremías, soo na̱yóʼo kǒo sándákoona ña̱ kéʼéna. Tándi̱ʼi ni̱xa̱a̱ ta̱ Nabucodonosor ta̱ kúú rey ñuu Babilonia, ta ka̱nitáʼanra xíʼin na̱ ñuu Jerusalén. Ta nda̱a̱ vitinví nda̱kiʼin ta̱ Nabucodonosor na̱ ñuu Israel ña̱ ku̱a̱ʼa̱nna kachíñuna nu̱úra. Ku̱a̱ʼání na̱ ku̱a̱ʼa̱n xíʼinra chí ñuu Babilonia. ¿Á kusi̱í-iniún tá ná ndo̱ʼún táʼan ña̱yóʼo?