¿Á XÍNI̱ÚN ndachun káʼa̱n ta̱yóʼo xíʼin Jehová? ¿Ndachun chi̱ndoora carta nu̱ú altar? Ezequías naníra. Ta̱yóʼo kúú rey nu̱ú u̱vi̱ ñuu ña̱ ñuu Israel. Ta ku̱a̱ʼání tu̱ndóʼo ndóʼora. ¿Ndachun ndóʼora tu̱ndóʼo yóʼo?

Saáchi na̱ soldado na̱ ñuu Asiria xa̱sa̱ndíʼi-xa̱ʼana na̱ 10 ñuu ña̱ ñuu Israel. Jehová ta̱xira ndo̱ʼona ña̱yóʼo xa̱ʼa ña̱ ku̱a̱ʼání ña̱ kini xi̱keʼéna. Ta vitin va̱xi na̱ soldado yóʼo kanitáʼanna xíʼin na̱ inka u̱vi̱ ñuu.

Ta̱ rey Asiria chi̱ndaʼára iin carta ku̱a̱ʼa̱n nu̱ú ta̱ rey Ezequías. Ta ña̱yóʼo kúú ña̱ chi̱ndoora nu̱ú altar Ndióxi̱. Carta yóʼo kúsi̱kindaaña Jehová ta káʼa̱nña xíʼin ta̱ rey Ezequías va̱ʼaka ná ndataxira miíra ndaʼa̱na. Xa̱ʼa ña̱yóʼo káʼa̱n ta̱ Ezequías xíʼin Jehová: ʼJehová sáka̱ku miíndi̱ nu̱ú ta̱ rey ñuu Asiria. Tasaá ndiʼi na̱ ñuu ña̱ iníísaá ñuyǐví kunda̱a̱-ini iinlá miíún kúú Ndióxi̱ʼ. ¿Á xi̱niso̱ʼo Jehová ña̱ ni̱ka̱ʼa̱nra xíʼinra?

Ta̱ Ezequías iin rey va̱ʼa kúú ta̱yóʼo. Va̱ása níxi̱yora táki̱ʼva ni̱xi̱yo na̱ rey na̱ xi̱xaʼndachíñu nu̱ú inka na̱ 10 ñuu ña̱ ñuu Israel, ta kǒo níxi̱yora táki̱ʼva ni̱xi̱yo yivára ta̱ rey Acaz. Chi ta̱yóʼo xi̱niso̱ʼo ndiʼira ley Jehová. Tasaá, tándi̱ʼi ni̱ka̱ʼa̱nra xíʼin Jehová, ta̱ profeta Isaías chi̱ndaʼára tu̱ʼun Jehová ku̱a̱ʼa̱n nu̱ú ta̱ Ezequías, ta káchiña: ʼTa̱ rey ñuu Asiria ni kǒo ki̱ʼvira ñuu Jerusalén. Ni iin na̱ soldado kǒo kuyatinna. Ta ni iin ña̱ʼa kǒo keʼéna xíʼin na̱ ñuu Israelʼ.

Koto nu̱ú na̱ʼná yóʼo. ¿Á xíni̱ún ndáana kúú na̱ soldado na̱ ni̱xi̱ʼi̱ yóʼo? Na̱ ñuu Asiria kúúna. Jehová chi̱ndaʼára iin ta̱ ángel, ta iin ñu̱ú ta̱ ángel yóʼo xa̱ʼníra 185,000 soldado na̱ ñuu Asiria. Ña̱kán xi̱nu ta̱ rey Asiria ku̱a̱ʼa̱nra.

Ta na̱ u̱vi̱ ñuu yóʼo ni̱ka̱kuvana, ta va̱ʼa xi̱ndoona loʼo tiempo. Soo tá ni̱xi̱ʼi̱ ta̱ Ezequías, ta̱ Manasés se̱ʼera nda̱kiʼin kúú rey. Ta̱ Manasés yóʼo xíʼin ta̱ Amón se̱ʼera su̱ví rey va̱ʼa níxikuuna. Xa̱ʼa ña̱yóʼo nina ña̱ kini ni̱xi̱yo ñuuna. Ta na̱ káchíñu nu̱ú ta̱ Amón xa̱ʼnínara, ta vitin se̱ʼera ta̱ Josías ki̱xaʼá kúú rey nu̱ú u̱vi̱ na̱ ñuu.