¿Á XÍNI̱ÚN ndáana kúú na̱yóʼo ta ndáaña kéʼéna? Nu̱ú ku̱a̱chi ku̱a̱ʼa̱nna, ta na̱ ku̱a̱ʼa̱n chí nu̱ú na̱ xíta kúúna. Sana ndákanixi̱níún: ʼ¿Ndachun kǒo yuchu̱ níʼi na̱ xíta yóʼo ku̱a̱ʼa̱nna?ʼ Ná kotoyó ndachun kǒoña níʼina.

Ta̱ Jehosafat kúú ta̱ xáʼndachíñu nu̱ú u̱vi̱ ñuu ña̱ ñuu Israel. Tá tiempo ni̱xi̱yo ta̱ rey Acab xíʼin ñá Jezabel na̱ xa̱ʼndachíñu nu̱ú inka na̱ 10 ñuu, tiempo saá ni̱xi̱yo ta̱ Jehosafat. Soo ta̱yóʼo iin ta̱ rey va̱ʼa kúúra ta saátu yivára ta̱ Asá ta̱ va̱ʼa xi̱kuutu ta̱yóʼova. Xa̱ʼa ña̱yóʼo ku̱a̱ʼá ku̱i̱ya̱ va̱ʼaní xi̱ndoo u̱vi̱ saá na̱ ñuu yóʼo.

Ta vitin íyo iin ña̱ ku̱u ta ni̱yi̱ʼvíní na̱ yiví yóʼo. Íyo iin na̱ ni̱ka̱ʼa̱n xíʼin ta̱ Jehosafat: ʼKu̱a̱ʼání na̱ soldado ña̱ ñuu Moab, na̱ ñuu Ammón xíʼin na̱ yuku̱ Seír va̱xi kanitáʼan xíʼúnʼ. Ku̱a̱ʼání na̱ ñuu Israel ndátakana ñuu Jerusalén ña̱ ndúkúna ndée nu̱ú Jehová. Ku̱a̱ʼa̱nna templo ta kán káʼa̱n ta̱ Jehosafat: ʼJehová kǒo xíni̱ndi̱ ndáaña keʼéndi̱. Kǒo kuchiñundi̱ xíʼin na̱ soldado yóʼo chi ku̱a̱ʼání kúúna. Chindeé ndi̱ʼi̱ʼ.

Jehová xi̱niso̱ʼora ña̱ ni̱ka̱ʼa̱n ta̱ Jehosafat xíʼinra ta chi̱ndaʼára iin na̱ ku̱a̱ʼa̱n ka̱ʼa̱n xíʼin na̱ ñuura ta káchina: ʼSu̱ví ndóʼó kanitáʼan xíʼinna chi miíva Ndióxi̱ kanitáʼan xíʼinna. Ndáa koto kuitívandó ta mií Jehová sáka̱ku ndóʼóʼ.

Ta inka ki̱vi̱ ni̱ka̱ʼa̱n ta̱ Jehosafat xíʼin na̱ ñuu: ʼKandíxandó Jehováʼ. Tá ke̱ena ku̱a̱ʼa̱nna, chi̱núura na̱ xíta yóʼo nu̱ú na̱ soldado ta xítana yaa nu̱ú Jehová ku̱a̱ʼa̱nna. ¿Á xíni̱ún ndáaña ku̱u tá ni̱kuyatinna nu̱ú kanitáʼanna? Jehová sa̱kanitáʼanra na̱ contra yóʼo xíʼin táʼan miína. Tá ni̱xa̱a̱ na̱ ñuu Israel, xa̱ni̱xi̱ʼi̱ ndiʼiva na̱ soldado yóʼo.

Va̱ʼaní i̱xaa ta̱ Jehosafat ña̱ ka̱ndíxara Ndióxi̱. Tá saá ná kándíxa miíyó Ndióxi̱ va̱ʼaní kooyó.