TUKU kúni̱ ta̱ Saúl kaʼníra ta̱ David. Ña̱kán ku̱a̱ʼa̱n 3,000 na̱ soldado míí na̱ xíni̱ va̱ʼa xíʼinra ña̱ nandukúna ta̱ David. Soo tá na̱kunda̱a̱-ini ta̱ David xa̱ʼa ña̱yóʼo, chi̱ndaʼára savana ku̱a̱ʼa̱nna koto se̱ʼéna míí ndíka̱a̱ ta̱ Saúl ñu̱ú saá. Tándi̱ʼi ni̱nda̱ka̱tu̱ʼunra u̱vi̱ na̱ xíka xíʼinra: ʼ¿Ndáandó kúni̱ ku̱ʼu̱n xíʼi̱n nu̱ú ndíka̱a̱ ta̱ Saúl?ʼ

ʼYi̱ʼi̱ ku̱ʼu̱n xíʼúnʼ, káchi ta̱ Abisai. Se̱ʼe ñá Seruya kúú ta̱yóʼo ñá ku̱ʼva ta̱ David. Ta̱ Saúl xíʼin na̱ ítáʼan xíʼinra kísi̱vana, ta ta̱ David xíʼin ta̱ Abisai ni̱ki̱ʼvi se̱ʼéna nu̱ú kísi̱ na̱yóʼo. Nda̱kiʼinna yitu̱n ka̱a ta̱ Saúl xíʼin ki̱si ña̱ xíʼira ti̱kui̱í ku̱a̱ʼa̱n xíʼinna. Ni iinna kǒo níxini tá ni̱ki̱ʼvina chi ndiʼina kísi̱.

Koto ta̱ David xíʼin ta̱ Abisai. Kǒo ña̱ʼa níndóʼona, ta ndítana nu̱ú xi̱kí. Ta̱ David kánara ta̱ Abner ta̱ xáʼndachíñu nu̱ú na̱ soldado ta̱ Saúl. ʼ¿Ndachun va̱ása ndáún ta̱ rey? Koto yóʼo níʼíi̱ yitu̱n ka̱ara xíʼin ki̱si ña̱ xíʼira ti̱kui̱íʼ, káchira xíʼinra.

Ta̱ Saúl tá nda̱káxi-inira. Nda̱kuʼun so̱ʼora ta̱chí ta̱ David, ta ni̱nda̱ka̱tu̱ʼunrara: ʼ¿Á ta̱ David kúú yóʼó?ʼ, káchira. Koto nu̱ú na̱ʼná yóʼo va̱xi ta̱ Saúl xíʼin ta̱ Abner.

ʼSuvivai̱ táta reyʼ, káchi ta̱ David xíʼinra. Tasaá ni̱nda̱ka̱tu̱ʼunra ta̱ Saúl: ʼ¿Ndachun kúni̱ún kaʼníún yi̱ʼi̱? ¿Ndáaña i̱xai̱ xíʼún? Yóʼo níʼíi̱ yitu̱n ka̱ún, táta rey. Ná kixi iinna nandukúnañaʼ.

ʼVa̱ása va̱ʼa ña̱ níkeʼi̱, ta̱ sána kúi̱ʼ, káchi ta̱ Saúl. Tasaá nda̱kiʼin ta̱ David ku̱a̱ʼa̱nra, ta̱ Saúl ndi̱kóra veʼevara. Soo ta̱ David káʼvixi̱níra: ʼIin ki̱vi̱ kaʼníva ta̱ Saúl yi̱ʼi̱. Va̱ʼaka ná ku̱ʼi̱n ñuu na̱ Filisteoʼ. Tasaá i̱xaara. Sa̱ndáʼvira na̱ ñuu Filisteo ña̱ ná kandíxana ña̱ va̱ʼa ítáʼanra xíʼinna.

Ni̱ya̱ʼa loʼo tiempo na̱ ñuu Filisteo ku̱a̱ʼa̱nna kanitáʼanna xíʼin na̱ ñuu Israel. Ta nu̱ú ka̱nitáʼanna kán ni̱xi̱ʼi̱va ta̱ Saúl xíʼin ta̱ Jonatán. Ña̱kán ni̱kusuchíkaví-ini ta̱ David ta ta̱ara iin yaa liviní ta xi̱taraña, ta káchiña: ʼKúsuchíkaví-inii̱ xa̱ʼún, ñani, Jonatán. Kúni̱kaví xínii̱ yóʼóʼ.

Tándi̱ʼi ku̱u ña̱yóʼo ta̱ David ndi̱kóra chí ñuu Hebrón, ña̱ ñuu Israel. Ta̱ Isbóset, se̱ʼe ta̱ Saúl, ku̱a̱ʼá na̱ yiví kúni̱na ña̱ kuu ta̱yóʼo rey ta kánitáʼanna xíʼin na̱ yiví na̱ kúni̱ ña̱ kuu ta̱ David rey. Soo ni̱kuchiñuva na̱ ndíku̱n sa̱tá ta̱ David. Tasaá ta̱ David 30 ku̱i̱ya̱ra tá ni̱xa̱a̱ra ndu̱ura rey. U̱xa̱ ku̱i̱ya̱ sava xa̱ʼndachíñura ñuu Hebrón. Na̱ se̱ʼera na̱ ka̱ku kán xi̱kuu: ta̱ Amnón, ta̱ Absalón xíʼin ta̱ Adonías.

Tá ni̱ya̱ʼa tiempo, ta̱ David xíʼin na̱ ítáʼan xíʼinra ni̱kuchiñuna ka̱nitáʼanna xíʼin na̱ ñuu Jerusalén. Inka se̱ʼe ñá Seruya kúú ta̱ Joab, ta̱yóʼo kúú ta̱ xi̱niʼi yichi̱ nu̱ú na̱ soldado. Xa̱ʼa ña̱yóʼo ta̱ David ta̱xira chiñu ndaʼa̱ ta̱ Joab ña̱ kaʼndara chiñu nu̱ú na̱ soldado. Ta vitin ta̱ David ki̱xaʼára xáʼndachíñura ñuu Jerusalén.