KOTO ndeéní káchíñu na̱ ñúʼu yóʼo. Na̱ ñuu Israel íxava̱ʼana nama̱ ña̱ ñuu Jerusalén. Xa̱ni̱ya̱ʼa 152 ku̱i̱ya̱ tá sa̱ndíʼi-xa̱ʼa ta̱ Nabucodonosor ñuu Jerusalén, ta sa̱ndíʼi-xa̱ʼatura nama̱ ta xa̱ʼmira yéʼé ñuu yóʼo. Na̱ ñuu Israel kǒo níkeʼé kamana nama̱ ña̱ ñuu Jerusalén tá ndi̱kóna ñuu yóʼo.

¿Á va̱ása yíʼvina ndóona ñuu yóʼo ña̱ kǒo nama̱ña? Yíʼvivana. Chi na̱ sáa̱-ini xíniñaʼá kiviva ki̱ʼvina kanitáʼanna xíʼinna. Nda̱a̱ vitinví ta̱ Nehemías ta̱ va̱xi nu̱ú na̱ʼná yóʼo, ki̱xaʼára chíndeé táʼanra xíʼinna ña̱ keʼé xa̱á tukuna nama̱ ñuu Jerusalén. ¿Á xíni̱ún ndáa ta̱a kúú ta̱ Nehemías?

Ta̱ Nehemías ta̱ ñuu Israel kúúra ta íyora ñuu ña̱ naní Susa nu̱ú íyo ta̱ Mardoqueo xíʼin ñá Ester. Ta káchíñura veʼe ta̱ rey, sana va̱ʼava ítáʼanra xíʼin ta̱ Mardoqueo xíʼin ñá Ester. Soo Biblia kǒo káʼa̱nña xa̱ʼa ta̱ Nehemías ña̱ ka̱chíñura nu̱ú ta̱ rey Asuero yií ñá Ester. Nu̱ú ta̱ rey Artajerjes ka̱chíñura.

¿Á ndákaʼún xa̱ʼa ta̱ rey Artajerjes? Iin ta̱ rey va̱ʼa xi̱kuu ta̱yóʼo, chi ta̱xira xu̱ʼún ndaʼa̱ ta̱ Esdras ña̱ ku̱ʼu̱n xíʼinra chí ñuu Jerusalén ña̱ ndasaviíra templo Jehová. Soo ta̱ Esdras kǒo níkeʼéra nama̱ ñuu yóʼo. Yóʼo sakuaʼayó ndachun ta̱ Nehemías kéʼé ña̱yóʼo.

Xa̱ni̱ya̱ʼa 13 ku̱i̱ya̱ nani tá ta̱xi ta̱ Artajerjes xu̱ʼún ndaʼa̱ ta̱ Esdras ña̱ keʼéra templo. Ta vitin ta̱ Nehemías kúú ta̱ káchíñu nu̱ú ta̱ rey Artajerjes ta táxira vino xíʼi̱ ta̱yóʼo. Kíʼinra kuenta ña̱ ná kǒo taánna veneno xíʼinrá. Iin chiñu káʼnu kúú ña̱ kúúmiíra nu̱ú ta̱ rey.

Soo iin ki̱vi̱ ta̱ Hananí ñani ta̱ Nehemías xíʼin savaka ta̱a ku̱a̱ʼa̱nna kotona ta̱ Nehemías. Ta nátúʼunna xíʼinra xa̱ʼa tu̱ndóʼo ña̱ ndóʼo na̱ ñuu Israel, ta xíʼin xa̱ʼa nama̱ ña̱ ñuu Jerusalén ña̱ kúma̱níka kuva̱ʼaña. Ta̱ Nehemías kúsuchíní-inira ta káʼa̱nra xíʼin Jehová xa̱ʼa ña̱yóʼo.

Iin ki̱vi̱ ta̱ rey xi̱nira ña̱ kúsuchí-ini ta̱ Nehemías ta ni̱nda̱ka̱tu̱ʼunrara: ʼ¿Ndachun kúsuchí-iniún?ʼ Ta̱ Nehemías ni̱ka̱ʼa̱nra xíʼinra xa̱ʼa ña̱ va̱ása va̱ʼa káa ñuu Jerusalén xíʼin xa̱ʼa ña̱ kúma̱níka keʼéna nama̱ ñuu kán. ʼ¿Ndáaña kúni̱ún?ʼ, káchi ta̱ rey xíʼinra.

ʼTaxi ná ku̱ʼi̱n ñuu Jerusalén ña̱kán va̱ʼa keʼíi̱ nama̱ ñuu kánʼ, káchi ta̱ Nehemías. Ta̱ Artajerjes va̱ʼaní ta̱a kúúra. Ta̱xivara ña̱ ku̱ʼu̱n ta̱ Nehemías, ta chi̱ndeé táʼanra xíʼinra ña̱ ndu̱kúna yitu̱n ña̱ kuniñúʼuna xíʼin nama̱ yóʼo. Ta sa̱kán loʼo tiempo ni̱xa̱a̱ ta̱ Nehemías ñuu Jerusalén ki̱xaʼára káʼa̱nra xíʼinna ña̱ kúni̱ra keʼéra. Ta ni̱kusi̱íva-inina ña̱ ni̱ka̱ʼa̱nra xíʼinna ta ki̱xaʼána káʼa̱nna: ʼVitin kixaʼáyó kachíñuyóʼ.

Tá xi̱ni na̱ sáa̱-ini xíni na̱ ñuu Israel ña̱ ki̱xaʼána keʼéna nama̱ yóʼo, káchina: ʼKu̱ʼu̱nyó ñuuna ta kaʼníyóna kǒo taxiyó kachíñunaʼ. Tá na̱kunda̱a̱-ini ta̱ Nehemías ña̱yóʼo ta̱xira yuchu̱ xíʼin ka̱a xi̱ín nu̱ú ndaʼa̱ na̱ káchíñu yóʼo, ta káchira xíʼinna: ʼKǒo yi̱ʼvíndó. Kanitáʼanndó xa̱ʼa na̱ ñanindó, xa̱ʼa se̱ʼendó, xa̱ʼa ñá síʼíndó, xíʼin xa̱ʼa veʼendóʼ, káchira xíʼinna.

Na̱ ñuu Israel kǒo yíʼvina. Ñu̱ú xíʼin káʼñu níʼi tu̱ʼvana yuchu̱na ta ndákundeéna káchíñuna. Ña̱kán 52 kuití loʼo ki̱vi̱ sa̱xínuna nama̱ ñuuna. Ta vitin va̱ása yíʼvikana. Ta̱ Nehemías xíʼin ta̱ Esdras sánáʼa̱na na̱ ñuu Israel ley Ndióxi̱, ta si̱íva ndóona vitin.

Soo kǒo ndóona táki̱ʼva xi̱ndoona tá ya̱chi̱, tá kúma̱níka ku̱ʼu̱nna xíʼin na̱ ñuu Babilonia. Ta̱ rey ñuu Persia kúú ta̱ xáʼndachíñu nu̱úna vitin ta xíniñúʼu keʼéna ña̱ káʼa̱n ta̱yóʼo. Soo Jehová ni̱ka̱ʼa̱nra chindaʼára iin rey, ta ta̱yóʼo chindeérana ña̱ kundoo va̱ʼana. ¿Ndáa ta̱ kúú ta̱yóʼo? ¿Ndáaña keʼéra ña̱ va̱ʼa chindeérana ña̱ kundoo va̱ʼana? Ni̱ya̱ʼa 450 ku̱i̱ya̱ saákaví na̱kunda̱a̱ va̱ʼa inina xa̱ʼa ña̱yóʼo. Tasaá ka̱ku iin ta̱ loʼo. Chí nu̱únínu sakuaʼakayó xa̱ʼa ta̱yóʼo.