NÁ NDAKAʼÁNYÓ xa̱ʼa ña̱ ku̱u tá kúma̱níka ku̱ʼu̱n ta̱ Esdras chí ñuu Jerusalén. Ta̱ Mardoqueo xíʼin ñá Ester na̱ ñuu Israel kúúna, ta iin chiñu káʼnu kúúmiína ñuu Persia. Ñá Ester reina kúúñá, ta ta̱ Mardoqueo ku̱ʼva kuáchiñá kúú ta̱ xáʼndachíñu xíʼin ta̱ rey. Yó ʼo kunda̱a̱-iniyó xa̱ʼa ña̱yóʼo.

Ñá Ester tá loʼovíñá ni̱xi̱ʼi̱ yiváña. Ta ndaʼa̱ ta̱ Mardoqueo xa̱ʼnu ndáʼviñá. Ta̱ Asuero ta̱ rey ñuu Persia íyo iin veʼe chíñura ña̱ ñuu Susa, ta ta̱ Mardoqueo kúú iin ta̱ káchíñu nu̱úra. Iin ki̱vi̱ ñá Vasti ñá síʼí ta̱ rey yóʼo kǒo níkandíxañá ña̱ ni̱ka̱ʼa̱nra xíʼinñá, ña̱kán ndu̱kúra inka ñá síʼíra. ¿Á xíni̱ún ndáañá nda̱ka̱xinra? Ñá Ester nda̱ka̱xinra.

Koto ta̱a ta̱ kúta̱aní-ini ta̱ va̱xi nu̱ú na̱ʼná yóʼo ta̱ xíkuxítí na̱ yiví yóʼo nu̱ú. Hamán naníra iin ta̱ kúúmií chiñu káʼnuní kúú ta̱yóʼo ñuu Persia, ta kúni̱tura ná kuxítí ta̱ Mardoqueo ta̱ níndúʼu nu̱ú na̱ʼná yóʼo nu̱úra. Soo ta̱ Mardoqueo kǒo xíínra kuxítíra nu̱úra. Saáchi xíni̱ra va̱ása va̱ʼa kuxítíra nu̱ú iin na̱ yiví. Ta̱ Hamán ni̱sa̱a̱níra, ta vitin kuniyó ndáaña kéʼéra.

Ta̱ Hamán ni̱ka̱ʼa̱nra tu̱ʼun vatá xíʼin ta̱ rey Asuero xa̱ʼa na̱ ñuu Israel, ta káchira: ʼSu̱ví na̱ va̱ʼa kúú na̱yóʼo chi kǒo kándíxana ley ña̱ ta̱xiún, xíniñúʼu ndiʼi-xa̱ʼanaʼ. Soo ta̱ rey Asuero kǒo xíni̱ra ñá síʼíra ñá ñuu Israel kúúñá. Ta saá xi̱niso̱ʼovara ña̱ ni̱ka̱ʼa̱n ta̱ Hamán, ta ta̱xira iin ley ña̱ káʼa̱n ndáa ki̱vi̱ kaʼnína ndiʼi na̱ ñuu Israel.

Soo tá na̱kunda̱a̱-ini ta̱ Mardoqueo xa̱ʼa ña̱ ley yóʼo, ni̱ndi̱ʼiní-inira. Tasaá ni̱ka̱ʼa̱nra ná ka̱ʼa̱nna ña̱yóʼo xíʼin ñá Ester: ʼKa̱ʼa̱n xíʼin ta̱ rey ná sakákura miíyóʼ. Ña̱ ley ña̱ íyo ñuu Persia káʼa̱nña, ni iinna kǒo kivi ku̱ʼu̱n nu̱ú ta̱ rey tá kǒo kánarana. Soo ta̱ rey kǒo níkanara ñá Ester ni saáví ku̱a̱ʼa̱nvañá nu̱úra. Tá ni̱xa̱a̱ñá nu̱úra saá ka̱taniira tú varara tú oro nu̱úñá, ña̱yóʼo kúni̱ kachiña ña̱ ná kǒo kaʼnínañá. Ñá Ester ka̱nañá ta̱ rey xíʼin ta̱ Hamán ña̱ kuxuna. Ta yóʼo ni̱ka̱ʼa̱n ta̱ rey xíʼin ñá Ester ndáaña kúni̱ñá taxira ndaʼa̱ñá. Soo ñá Ester ni̱ka̱ʼa̱nñá xíʼinra ná kixi tukuna kuxuna inka ki̱vi̱ saáví ka̱ʼa̱nñá ndáaña kúni̱ñá taxira ndaʼa̱ñá.

Tá ndóona xíxina, saáví ni̱ka̱ʼa̱n ñá Ester xíʼin ta̱ rey: ʼÍyo iin na̱ kúni̱ kaʼní yi̱ʼi̱ xíʼin na̱ ñui̱ʼ. Ni̱sa̱a̱ní ta̱ rey, ta káchira: ʼ¿Ndáana kúni̱ kaʼní ndóʼó?ʼ.

ʼTa̱ Hamán, ta̱yóʼo kúú ta̱ kǒo kúni̱ xíni ndi̱ʼi̱ʼ, káchiñá.

Ta ni̱sa̱a̱ní ta̱ rey. Ni̱ka̱ʼa̱nra ná kaʼnína ta̱ Hamán. Tándi̱ʼi ta̱xi ta̱ rey iin chiñu káʼnu ndaʼa̱ ta̱ Mardoqueo ña̱ kaʼndachíñura. Tasaá ta̱ Mardoqueo ndu̱kúra inka ley ña̱ káʼa̱n ña̱ va̱ʼa kanitáʼan na̱ ñuu Israel xíʼin na̱ sáa̱-ini xíniñaʼá míí ki̱vi̱ ni̱ka̱ʼa̱nna kaʼnínana. Saáchi ta̱ Mardoqueo vitin iin chiñu káʼnuní kúúmiíra, ta ku̱a̱ʼání na̱ yiví chíndeé na̱ ñuu Israel, ta na̱yóʼo ni̱ka̱kuvana nu̱ú na̱ sáa̱-ini xíniñaʼá.