¿Á XÍNI̱ÚN ndáa ta̱ kúú ta̱ lée loʼo yóʼo? Ta̱yóʼo kúú ta̱ Jesús. Sa̱kán ka̱kura ini veʼe nu̱ú ñúʼu kití. Ñá María chíka̱a̱ñára nu̱ú xíxáʼanrí. Soo, ¿ndachun ki̱xa̱a̱ ñá María xíʼin ta̱ José yóʼo? Su̱ví nu̱ú káku na̱ va̱lí kúúña, ¿saá?

Su̱ví nu̱ú kákuna kúúña. Soo ta̱ José xíʼin ñá María íyo iin chiñu va̱xivana: ta̱ César Augusto ta̱ xáʼndachíñu ñuu Roma i̱xava̱ʼa iin ley, ña̱ káʼa̱n ndiʼi na̱ yiví ná ku̱ʼu̱nna chí ñuu nu̱ú ka̱kuna ña̱ ndakaʼyína ki̱vi̱na nu̱ú iin libro. Ta̱ José ñuu Belén yóʼova ka̱kura. Soo tá ki̱xa̱a̱ra xíʼin ñá María ñuu yóʼo, kǒo níndaniʼína veʼe nu̱ú ku̱su̱nna. Ña̱kán ki̱xa̱a̱na nu̱ú ñúʼu kití. Ta míí ñu̱ú saá ka̱kuva ta̱ Jesús. Soo ka̱ku va̱ʼavara.

Koto nu̱ú na̱ʼná, yóʼo va̱xi na̱ ndáa kití kotona ta̱ Jesús. Yuku̱va ñúʼuna xíʼin kití sa̱na̱na ñu̱ú saá, tá nda̱ye̱ʼe̱ iin ñuʼu̱ nu̱úna ni̱yi̱ʼvínína. Soo iin ángel kúú ta̱ ni̱xa̱a̱ nu̱úna. Ta ni̱ka̱ʼa̱nra xíʼinna: ʼVa̱ása yi̱ʼvíndó. Íyo iin tu̱ʼun va̱ʼa va̱xii̱ ka̱ʼi̱n xíʼinndó. Ñuu Belén ka̱ku ta̱ naní Jesús, ta̱yóʼo kúú ta̱ saka̱ku na̱ yiví. Ndaniʼíndóra veʼe nu̱ú xíxáʼan tí kití ta súkunra ti̱ko̱to̱ʼ. Iin kama ki̱xa̱a̱ ku̱a̱ʼá na̱ ángel ta ki̱xaʼána ndásakáʼnuna Ndióxi̱. Ndi̱ku̱n saá nda̱kiʼin na̱ ndáa kití ku̱a̱ʼa̱nna nandukúna ta̱ Jesús, ta vitin nda̱niʼívanara.

¿Á xíni̱ún ndachun ndeéní káʼa̱nna xa̱ʼa ta̱ loʼo yóʼo? ¿Á xíni̱ún ndáa ta̱a kúúra? ¿Á ndákaʼún nu̱ú ña̱ historia iin sa̱kuaʼayó xa̱ʼa ta̱ Se̱ʼe nu̱ú Ndióxi̱? Ta̱yóʼo ka̱chíñura xíʼin Jehová ña̱ i̱xava̱ʼana ndiví xíʼin Ñuʼú xíʼin ndiʼika nu̱ú ña̱ʼa. Ta̱yóʼo kúú ta̱ Jesús.

Jehová ke̱ʼéra iin milagro ña̱ va̱ʼa koo se̱ʼe ñá María. Ndi̱ku̱n saá ki̱xaʼá ta̱ Jesús xáʼnura ti̱xinñá nda̱a̱ tá íxaa ndiʼi na̱ va̱lí ña̱ xáʼnuna ti̱xin siʼína. Soo ta̱ loʼo yóʼo Se̱ʼe Ndióxi̱va kúúra. Tándi̱ʼi ka̱kura nu̱ú ñúʼu tí kití ña̱ ñuu Belén. ¿Ndáa xa̱ʼa kúú ña̱ ni̱kusi̱íní-ini na̱ ángel ta ni̱ka̱ʼa̱nna xíʼin na̱ ndáa tí kití ña̱ ka̱ku ta̱ Jesús?