TÁ NI̱YA̱ʼA loʼo tiempo tá sa̱ndáʼa ta̱ Jesús u̱vi̱ na̱ kǒo túvi nu̱ú, saá ku̱a̱ʼa̱nra iin ñuu loʼo ña̱ ndíka̱a̱ yatin xíʼin ñuu Jerusalén. Saá ni̱ka̱ʼa̱nra xíʼin u̱vi̱ na̱ discípulora: ʼKuaʼánndó ta ki̱ʼvindó ñuu loʼo káa ta kunindó iin burro loʼo. Ndaxinndórí ta ná kixirí xíʼinndóʼ.

Tá ki̱xa̱a̱ tí burro xíʼinna, ta̱ Jesús nda̱ara sa̱tárí. Tasaá ku̱a̱ʼa̱nra chí ñuu Jerusalén, chi xa̱yatinva ndíka̱a̱ña. Tá na̱kuyatinra ñuu yóʼo, iin tiʼvi chée na̱ yiví ke̱e nda̱kiʼin-ñaʼá. Ku̱a̱ʼá na̱ yiví yóʼo chi̱ndoona ti̱ko̱to̱na ta savatuna chi̱ndoona ndaʼa̱ tú ñu̱u̱ nu̱ú ya̱ʼara, ta káchina: ʼNdióxi̱ ná chika̱a̱ra bendición ta rey ta̱ nda̱ka̱xinraʼ.

Tá tiempo xi̱naʼá, na̱ ndúu rey ña̱ ñuu Israel ndáana sa̱tá tí burro loʼo ta ku̱a̱ʼa̱nna ñuu Jerusalén ña̱ va̱ʼa ná kuni na̱ yivína. Ta ña̱yóʼo kúú ña̱ íxaa ta̱ Jesús vitin. Na̱ yiví yóʼo kúni̱na ná koora rey nu̱úna. Soo su̱ví ndiʼi na̱ yiví kúni̱ ña̱ koora rey. Kúnda̱a̱-iniyó ña̱ kǒo kúni̱na xíninara xa̱ʼa ña̱ ku̱u tá ku̱a̱ʼa̱nra chí templo.

Ta̱ Jesús sa̱ndáʼara na̱ yiví na̱ kúʼvi̱ ini templo, na̱ kǒo túvi nu̱ú, na̱ ndu̱chiʼña. Tá xi̱ni na̱ va̱lí ña̱yóʼo, ki̱xaʼána káʼa̱n va̱ʼana xa̱ʼa ta̱ Jesús. Xa̱ʼa ña̱yóʼo ni̱sa̱a̱ní na̱ su̱tu̱ na̱ ñúʼu kán, ta káchina xíʼin ta̱ Jesús: ʼ¿Á xíniso̱ʼún ña̱ káʼa̱n na̱ va̱lí yóʼo?ʼ

ʼXíniso̱ʼvai̱ʼ, káchi ta̱ Jesús. ʼ¿Á kǒo níkaʼvindó Tu̱ʼun Ndióxi̱ nu̱ú káchiña: “Xíʼin yu̱ʼu̱ na̱ va̱lí ka̱ʼa̱nna xa̱ʼa ta̱ nda̱ka̱xin Ndióxi̱?”ʼ Ta na̱ va̱lí káʼa̱nkavana xa̱ʼa ta̱ rey ta̱ nda̱ka̱xin Ndióxi̱.

¿Á su̱ví ña̱ nda̱a̱ kúú ña̱ kúni̱yó kooyó táki̱ʼva ni̱xi̱yo na̱ va̱lí yóʼo? Sana ka̱ʼa̱n savana xíʼinyó ña̱ sandákooyó ka̱ʼa̱nyó xa̱ʼa Ndióxi̱. Soo miíyó kǒo sándákooyó ña̱ ka̱ʼa̱nyó xa̱ʼa ña̱ va̱ʼa ña̱ keʼé ta̱ Jesús xa̱ʼayó chí nu̱únínu.

Tá ki̱xi ta̱ Jesús nu̱ú Ñuʼú yóʼo su̱ví tiempo ña̱ kaʼndachíñura kúúña. ¿Ama kaʼndachíñura? Na̱ discípulo xi̱kuni̱na kunda̱a̱-inina xa̱ʼaña. Ná sakuaʼayó xa̱ʼa ña̱yóʼo vitin.