XA̱NI̱YA̱ʼA u̱vi̱ ki̱vi̱, ta vitin xa̱ñu̱ú jueves kúúña. Ta̱ Jesús xíʼin 12 saá na̱ apóstol ki̱xa̱a̱na cuarto káʼnu ña̱ piso u̱vi̱ kuxuna ta ndakaʼánna ña̱ Pascua. Ta̱ Judas Iscariote kúú ta̱ kíta ku̱a̱ʼa̱n ña̱ ka̱ʼa̱nra xíʼin na̱ su̱tu̱ ña̱ tiinna ta̱ Jesús.

Ki̱vi̱ kuni, ni̱xa̱ʼa̱n ta̱ Judas ni̱ka̱ʼa̱nra xíʼin na̱ su̱tu̱, ta káchira: ʼ¿Ndáaña taxindó ndaʼíi̱ ná chindeé táʼi̱n xíʼinndó ña̱ tiinndó ta̱ Jesús?ʼ ʼO̱ko̱ u̱xu̱ xu̱ʼún ña̱ plata taxindi̱ ndaʼúnʼ, káchina xíʼinra. Ta jueves vitin ku̱a̱ʼa̱nra nandukúra na̱yóʼo ña̱ ku̱ʼu̱nna xíʼinra nu̱ú ndíka̱a̱ ta̱ Jesús. ¿Á ña̱ va̱ʼa kúúña kéʼé ta̱yóʼo túviún?

Xa̱ndi̱ʼiva xi̱xina ña̱ Pascua. Soo ta̱ Jesús ki̱xaʼára xíʼin inka ña̱ cena. Ta̱xira si̱táva̱ʼa ndaʼa̱ na̱ apóstol, ta káchira xíʼinna: ʼKuxundó, chi ña̱yóʼo ndákiʼin nu̱ú ku̱ñui̱ ña̱ chaʼvii̱ xa̱ʼandóʼ. Tasaá ta̱xira vino kuaʼá tu̱ún ndaʼa̱na, ta̱ káchira: ʼKoʼondórá saáchi vino yóʼo ndákiʼinrá nu̱ú ni̱íi̱ ña̱ chaʼvii̱ xa̱ʼandóʼ. Ña̱ Biblia káʼa̱nña ña̱ cena yóʼo naníña ʼña̱ cena ta̱ Jesúsʼ.

Na̱ ñuu Israel xi̱keʼéna ña̱ Pascua ña̱ va̱ʼa xi̱ndakaʼánna xa̱ʼa ña̱ ni̱ya̱ʼa ta̱ ángel veʼena tá xi̱ndoona chí ñuu Egipto, chi ta̱yóʼo xa̱ʼníra se̱ʼe nu̱ú na̱ ñuu Egipto. Soo vitin ta̱ Jesús kúni̱ra ná ndakaʼányó xa̱ʼa ña̱yóʼo, ña̱ ni̱xi̱ʼi̱ra xa̱ʼayó. Ña̱kán ndákaʼányó xa̱ʼaña iin yichi̱ nu̱ú ku̱i̱ya̱.

Tándi̱ʼi xi̱xina ña̱ naní ña̱ Cena ta̱ Jesús, saá ni̱ka̱ʼa̱nra xíʼinna ña̱ ndakúní ná koo-inina ña̱ kandíxana Ndióxi̱. Tándi̱ʼi xi̱tana yaa nu̱ú Ndióxi̱ tasaá ke̱ena ku̱a̱ʼa̱nna. Sana xa̱sava ñu̱úva kúúña. ¿Míí ku̱ʼu̱nna vitin?