TÁNDI̱ʼI ke̱e ta̱ Pedro xíʼin ta̱ Juan ku̱a̱ʼa̱nna tá ni̱xa̱ʼa̱nna xi̱tona ya̱vi̱ nu̱ú ni̱ndu̱xu̱n ta̱ Jesús, ni̱ndo̱o mitúʼun ñá María. Ki̱xaʼáñá xákuñá. Tasaá xi̱toñá ini ya̱vi̱ ta xi̱niñá u̱vi̱ na̱ ángel. Ta na̱yóʼo ni̱nda̱ka̱tu̱ʼunnañá: ʼ¿Ndachun xákún?ʼ, káchina xíʼinñá.

ʼSaáchi kǒo xíni̱i̱ ndáana nda̱kiʼin ta̱ Jesús ku̱a̱ʼa̱n xíʼinnaʼ, káchiñá xíʼinna. Tasaá xi̱kóko̱oñá ta xi̱niñá iin ta̱a. Ta̱yóʼo ni̱nda̱ka̱tu̱ʼunrañá: ʼ¿Ndáana nándukún?ʼ, káchira xíʼinñá.

Soo ña̱ túvi miíñá iin ta̱ káchíñu kánva kúúra, ta nda̱kanixi̱níñá á sana ta̱yóʼova nda̱kiʼin ta̱ Jesús kuaʼán xíʼinra, ta káchiñá xíʼinra: ʼTá yóʼó nda̱kiʼin-ñaʼá, ka̱ʼa̱n xíʼi̱n míí chi̱ka̱únraʼ. Soo ta̱ Jesús kúú míí ta̱ káʼa̱nñá xíʼinva. Soo kǒo níndakuniñára. Tá ni̱ka̱ʼa̱nra ki̱vi̱ñá, saá nda̱kuniñára ña̱ kúúra ta̱ Jesús. Saá xínuñá ku̱a̱ʼa̱nñá ka̱ʼa̱nñá xíʼin na̱ discípulo: ʼXi̱nii̱ ta̱ Jesúsʼ.

Ta míí ki̱vi̱ saá ke̱e u̱vi̱ na̱ discípulo ku̱a̱ʼa̱nna chí ñuu Emaús, ta kúsuchíkaví-inina xa̱ʼa ña̱ ni̱xi̱ʼi̱ ta̱ Jesús. Ta yichi̱ kán iin ta̱a nda̱kutáʼan xíʼinna. Soo tá xíkana ku̱a̱ʼa̱nna ta̱ nda̱kutáʼan xíʼinna yóʼo, ku̱a̱ʼákaví ña̱ʼa ña̱ káʼa̱n Biblia nátúʼunra xa̱ʼa xíʼinna, ta nda̱a̱ kúsi̱íkaví-inina xíʼinña. Tándi̱ʼi, xi̱kundoona kuxuna, ta̱a yóʼo ni̱ka̱ʼa̱nra xíʼin Ndióxi̱ ta ta̱ʼvíra si̱táva̱ʼa, saáví nda̱kuninara, ña̱ kúúra ta̱ Jesús. Tasaá nda̱ñuʼúra nu̱úna, ta nda̱kiʼinna ku̱a̱ʼa̱nna chí ñuu Jerusalén ña̱ natúʼunna xíʼin na̱ apóstol.

Ta ki̱tatura nu̱ú ta̱ Pedro. Tá na̱kunda̱a̱-ini savana xa̱ʼa ña̱yóʼo ni̱kusi̱íkaví-inina. Ta u̱vi̱ na̱ discípulo na̱ ku̱a̱ʼa̱n chí ñuu Jerusalén tá ni̱xa̱a̱na nda̱niʼína na̱ apóstol. Tasaá ki̱xaʼána káʼa̱nna xíʼinna ña̱ xi̱nina ta̱ Jesús yichi̱. Tá káʼa̱nkana ña̱yóʼo, ¿á xíni̱ún ndáaña ku̱u?

Koto nu̱ú na̱ʼná. Yóʼo ki̱ta ta̱ Jesús nu̱úna, ta veʼe ndási kútuvaña. Ni̱kusi̱íkaví-ini na̱ discípulo ki̱vi̱ saá. ¿Á xíni̱ún nda̱saa yichi̱ xa̱ki̱ta ta̱ Jesús nu̱úna? Xa̱ku̱a̱ʼa̱n u̱ʼu̱n yichi̱ kúúña vitin.

Ta̱ apóstol Tomás kǒora ndíka̱a̱ xíʼinna tá xi̱nina ta̱ Jesús. Ña̱kán ni̱ka̱ʼa̱nna xíʼinra: ʼXi̱nindi̱ ta̱ Jesúsʼ, káchina. Soo ta̱ Tomás káchira, xíniñúʼu kuni nu̱íi̱ ta̱ Jesús saáví kandíxai̱. Tá ni̱ya̱ʼa u̱na̱ ki̱vi̱ na̱ discípulo ñúʼu tukuna ini veʼe yóʼo. Ta vitin ndíka̱a̱ ta̱ Tomás xíʼinna. Iin kama ki̱ta ta̱ Jesús nu̱úna. Nda̱a̱ vitinví ka̱ndíxa ta̱ Tomás.