KOTO nu̱ú na̱ʼná, tú barco yóʼo ku̱a̱ʼa̱n ndíʼi-xa̱ʼanú ta ku̱a̱ʼa̱n sáʼvinú ini mar. Na̱ yiví ni̱ko̱yona nu̱ú ti̱kui̱í. Savana xa̱ke̱ena chí yu̱ʼu̱ mar. ¿Á ndíka̱a̱ ta̱ Pablo xíʼinna? Yóʼo sakuaʼayó xa̱ʼa ña̱ ndóʼora.

¿Á ndákaʼún u̱vi̱ ku̱i̱ya̱ xi̱ndika̱a̱ ta̱ Pablo veʼeka̱a ña̱ ñuu Cesarea? Ta vitin chi̱ka̱a̱nara ini barco xíʼin inka na̱ ñúʼu xíʼinra veʼeka̱a ku̱a̱ʼa̱nna chí ñuu Roma. Tá na̱kuyatinna ñuʼú loʼo ña̱ ndíka̱a̱ nu̱ú mar ña̱ naní Creta, ndeékaví ko̱on sa̱vi̱ ta ka̱ni ta̱chí nu̱ú mar. Na̱ yiví kǒo kívi ku̱ʼu̱nna xíʼin tú barco. Ndeéní ko̱on sa̱vi̱ ta kǒo níkivi kunina Ñu̱ʼu ni tí ki̱mi. Ku̱a̱ʼání ki̱vi̱ ni̱ya̱ʼa, ndiʼi na̱ ku̱a̱ʼa̱n xíʼin tú barco kuvi ndiʼivana túvina.

Tasaá nda̱kundichi ta̱ Pablo ta ni̱ka̱ʼa̱nra xíʼinna: ʼNda̱a̱ ni iinndó kǒo kuvi, iinlá tú barco yóʼova ndiʼi-xa̱ʼa. Chi ñu̱ú ndi̱veʼé ki̱xi iin ta̱ ángel ta ni̱ka̱ʼa̱nra xíʼi̱n: “Pablo kǒo yi̱ʼvíún. Xa̱a̱ tá xa̱a̱vaún nu̱ú ta̱ xáʼndachíñu ñuu Roma. Ta ndiʼi na̱ ku̱a̱ʼa̱n xíʼún sáka̱kuva Ndióxi̱ na̱yóʼo”ʼ.

Xa̱ku̱a̱ʼa̱n 14 ki̱vi̱ ñúʼuna nu̱ú tu̱ndóʼo, ta ñu̱ú saá na̱ kíʼin kuenta xíʼin tú barco yóʼo xi̱nina xa̱yáxínva ndíka̱a̱ ti̱kui̱í. Ta ni̱yi̱ʼvína ña̱ kanindaanú xíʼin yu̱u̱, ta sa̱ndákavana iin ka̱a ña̱ tiin tú barco ña̱ va̱ʼa ná kundichinú. Tá ni̱tu̱vi xi̱nina ndíka̱a̱ iin ñuʼú. Ki̱xaʼána kávana tú barco ña̱ ná xa̱a̱nú kán.

Tá xa̱ni̱xa̱a̱ yatinna nu̱ú ndíka̱a̱ ñuʼú kán, tú barco kǒo níkivi ku̱ʼu̱nkanú chi nu̱ú yu̱tiva ni̱ti̱innú. Ta ti̱kui̱í ndeékaví kánindaara sa̱tánú, ta túyóʼo ku̱a̱ʼa̱n ndíʼi-xa̱ʼavanú. Ta̱ soldado ta̱ kíʼin kuenta xíʼin na̱ ku̱a̱ʼa̱n yóʼo, káchira: ʼNdiʼindó na̱ xíni kee ti̱kui̱í, keendó ta xa̱a̱ndó nda̱a̱ nu̱ú ndíka̱a̱ ñuʼú káa, ta ndóʼó na̱ kǒo xíni kee kuniñúʼundó tabla tú barco tú cha̱chi ña̱ va̱ʼa keendó ta ka̱kundóʼ. Táki̱ʼva káchi ta̱yóʼo saá i̱xaana, ta 276 kúú na̱ xi̱ñuʼu ini tú barco yóʼo ta ni iinna kǒo níxi̱ʼi̱, nda̱a̱ táki̱ʼva ni̱ka̱ʼa̱n ta̱ ángel xíʼin ta̱ Pablo saá ku̱u.

Na̱ yiví na̱ ñuu Malta na̱ íyo nu̱ú ni̱xa̱a̱ na̱yóʼo, va̱ʼaní-inina, chi chi̱ndeé táʼanna xíʼin ndiʼi na̱ ki̱xa̱a̱ xíʼin tú barco. Tá ndu̱va̱ʼa loʼo tiempo, saá chi̱ka̱a̱na ta̱ Pablo ini inka tú barco ta ku̱a̱ʼa̱nra xíʼinna chí ñuu Roma.