TIMOTEO naní ta̱ loʼo ta̱ va̱xi nu̱ú na̱ʼná yóʼo xíʼin ta̱ apóstol Pablo. Ta̱ Timoteo ñuu Listra íyora xíʼin na̱ veʼera. Eunice naní siʼíra ta nána xi̱tánra naní Loida.

Ña̱ yichi̱ u̱ni̱ kúú ña̱ ki̱xa̱a̱ ta̱ Pablo ñuu Listra vitin. Xa̱ki̱ʼva iin ku̱i̱ya̱ kúúña ki̱xira xíʼin ta̱ Bernabé yóʼo ña̱ na̱túʼunna xa̱ʼa Ndióxi̱, yichi̱ nu̱ú. Ta vitin ta̱ Pablo ndi̱kó tukura ñuu yóʼo xíʼin ta̱ migora ta̱ Silas.

¿Á xíni̱ún ndáaña káʼa̱n ta̱ Pablo xíʼin ta̱ Timoteo? Ña̱yóʼo káʼa̱nra: ʼ¿Á kúni̱ún ku̱ʼún xíʼindi̱ ña̱ va̱ʼa chindeún ndi̱ʼi̱ ña̱ natúʼunyó xíʼin na̱ yiví xa̱ʼa Ndióxi̱ na̱ ndóo ñuu xíka?ʼ

ʼVa̱ʼava, kúni̱vai̱ ku̱ʼi̱n xíʼinndóʼ, káchi ta̱ Timoteo. Ña̱kán ni̱ya̱ʼa loʼo tiempo sa̱ndákoora na̱ veʼera ta̱ ku̱a̱ʼa̱nra xíʼin ta̱ Pablo xíʼin ta̱ Silas. Soo vitin siʼna ná sakuaʼayó xa̱ʼa ta̱ Pablo ndáaña ndo̱ʼora. Xa̱ni̱ya̱ʼa 17 ku̱i̱ya̱ tá ki̱ta ta̱ Jesús nu̱ú ta̱ Pablo yichi̱ ña̱ ku̱a̱ʼa̱n chí ñuu Damasco.

¿Á ndákaʼún tá ku̱a̱ʼa̱n ta̱ Pablo chí ñuu Damasco tiinra na̱ discípulo ta̱ Jesús? Ta vitin discípulo kúútu miívara. Na̱ sáa̱-ini xíniñaʼá nándukúnara ña̱ kaʼnínara, soo na̱ discípulo ta̱vá se̱ʼénara. Chi̱ka̱a̱nara ini iin ña̱ʼa ña̱ nu̱ura chí sa̱tá nama̱ ñuu Damasco ta ku̱a̱ʼa̱nvara.

Tándi̱ʼi nda̱kiʼin ta̱ Pablo ku̱a̱ʼa̱nra chí ñuu Antioquía natúʼunra xa̱ʼa Ndióxi̱. Yóʼo kúú nu̱ú siʼna nda̱kunaní na̱ discípulo ta̱ Jesús, cristiano. Ñuu yóʼo ke̱e ta̱ Pablo xíʼin ta̱ Bernabé ta ku̱a̱ʼa̱nna ñuu ña̱ íyo xíka natúʼunna xa̱ʼa Ndióxi̱. Iin ñuu ni̱xa̱ʼa̱nna kúú ña̱ naní Listra, yóʼo kúú nu̱ú íyo ta̱ Timoteo.

Xa̱kúyatin iin ku̱i̱ya̱, ta vitin ta̱ Pablo ndi̱kó tukura ñuu yóʼo. Tá ku̱a̱ʼa̱n ta̱ Timoteo xíʼin ta̱ Pablo xíʼin ta̱ Silas, ¿á xíni̱ún míí ku̱a̱ʼa̱nna? Koto nu̱ú mapa, yóʼo sakuaʼayó xa̱ʼana.

Siʼna ñuu Iconio ña̱ ndíka̱a̱ yatin xíʼin ñuu Listra ku̱a̱ʼa̱nna, ta saátu nda̱kiʼinna ku̱a̱ʼa̱nna inka ñuu ña̱ naní Antioquía. Tándi̱ʼi ku̱a̱ʼa̱nna chí ñuu Troas, ni̱ya̱ʼana ñuu Filipos, Tesalónica, saá ni̱xa̱a̱na ñuu Berea. Koto nu̱ú mapa, ¿míí ndíka̱a̱ ñuu Atenas? Ñuu yóʼo ni̱xi̱kana na̱túʼunna xa̱ʼa Tu̱ʼun Ndióxi̱. Tándi̱ʼi, iin ku̱i̱ya̱ sava ni̱xi̱kana ñuu Corinto. Tasaá nda̱kiʼinna ku̱a̱ʼa̱nna chí ñuu Éfeso ta loʼo tiempo ni̱xi̱yona yóʼo. Ta yóʼo ke̱ena ku̱a̱ʼa̱nna xíʼin barco chí ñuu Cesarea, tasaá nda̱yaʼana ku̱a̱ʼa̱nna chí ñuu Antioquía, ta kán kúú nu̱ú ni̱xi̱yo ta̱ Pablo.

Ta̱ Timoteo ku̱a̱ʼání ñuu ña̱ ni̱xi̱yo xíka ni̱xi̱kara chi̱ndeé táʼanra xíʼin ta̱ Pablo ña̱ na̱túʼunna xa̱ʼa Tu̱ʼun Ndióxi̱, ta ku̱a̱ʼání congregación ki̱xaʼá íyo tiempo saá. Tá ná kuchéún, ¿á kachíñún nu̱ú Ndióxi̱ táki̱ʼva i̱xaa ta̱ Timoteo?