YÓʼO níndichi ta̱ apóstol Pedro, ta na̱ ndíta chí sa̱tára kúú na̱ migora. Soo, ¿ndachun xíkuxítí ta̱a yóʼo nu̱ú ta̱ Pedro? ¿Á va̱ʼa ña̱ kéʼéra? ¿Á xíni̱ún ndáa ta̱a kúúra?

Ta̱ Cornelio kúúra, iin ta̱ soldado ñuu Roma kúúra. Soo kǒo xíni̱ra ta̱ Pedro, ta ni̱ka̱ʼa̱nna xíʼinra ná kanara ta̱ Pedro kixira veʼera. Ná kotoyó ndáaña ku̱u.

Na̱ nu̱ú va̱ʼa xi̱ndiku̱n sa̱tá ta̱ Jesús na̱ ñuu Judá xi̱kuuna, soo ta̱ Cornelio su̱ví ta̱ ñuu Judá kúúra. Nisaáví kúni̱vara xínira Ndióxi̱, ta káʼa̱nra xíʼinra, ta ku̱a̱ʼání ña̱ʼa va̱ʼa kéʼéra xíʼin na̱ yiví. Ta iin xi̱kua, iin ángel ki̱ta nu̱úra, ta káchira xíʼinra: ʼNdióxi̱ kúni̱ra xínira yóʼó, ta ndakuiinra ña̱ káʼún xa̱ʼa xíʼinra. Chindaʼá iinna ná ku̱ʼu̱nna xa̱ʼa ta̱ naní Pedro. Ñuu Jope ndíka̱a̱ra, veʼe ta̱ Simón íyora, ta̱ íyo yatin yu̱ʼu̱ marʼ.

Ta̱ Cornelio kama chi̱ndaʼárana ku̱a̱ʼa̱nna xa̱ʼa ta̱ Pedro. Inka ki̱vi̱, ta̱ Pedro nda̱ara chí sa̱tá veʼe ta̱ Simón. Sa̱tá veʼe yóʼo, Ndióxi̱ sa̱túvira nu̱ú ta̱ Pedro ña̱ xi̱nira chí ndiví va̱xi iin ti̱ko̱to̱ káʼnu. Nu̱ú ti̱ko̱to̱ yóʼo ndiʼi nu̱ú kití ñúʼu xi̱nira. Ta ña̱ ley Ndióxi̱ káʼa̱nña, su̱ví tí va̱ʼa kúú tí yóʼo ña̱ kuxuna kuñurí, soo xi̱niso̱ʼora ni̱ka̱ʼa̱n iinna xíʼinra: ʼPedro, kaʼnírí ta kuxún ku̱ñuríʼ.

ʼKǒo kaʼníríʼ, káchi ta̱ Pedro. ʼNda̱a̱ ni iin yichi̱ kǒo xíxii̱ tí va̱ása va̱ʼaʼ. Soo xi̱niso̱ʼora ni̱ka̱ʼa̱nna xíʼinra: ʼKǒo ka̱ʼún su̱ví tí va̱ʼa kúúrí, chi vitin Ndióxi̱ káʼa̱nra tí va̱ʼava kúúríʼ. U̱ni̱ yichi̱ ni̱ka̱ʼa̱nna ña̱yóʼo. Ta̱ Pedro ndáka̱tu̱ʼunra miíra ndáaña kúni̱ kachi ña̱yóʼo, saá ki̱xa̱a̱va u̱ni̱ ta̱a veʼe ta̱ Simón, na̱ chi̱ndaʼá ta̱ Cornelio ku̱a̱ʼa̱n nándukú ta̱ Pedro.

Ta̱ Pedro nu̱ura ta ni̱ka̱ʼa̱nra: ʼYi̱ʼi̱ kúú ta̱ nándukúndó. ¿Ndáa chiñu va̱xindó nu̱íi̱?ʼ, tá na̱túʼunna xíʼinra, chi iin ángel kúú ta̱ ni̱ka̱ʼa̱n xíʼin ta̱ Cornelio ña̱ ná kanara ta̱ Pedro ña̱ ku̱ʼu̱nra veʼera, ta̱ Pedro ni̱ka̱ʼa̱nra ku̱ʼu̱nvara xíʼinna. Inka ki̱vi̱, ta̱ Pedro xíʼin sava na̱ migora ke̱ena ku̱a̱ʼa̱nna kotoniʼnina ta̱ Cornelio chí ñuu Cesarea.

Ta̱ Cornelio sa̱ndátakara na̱ táʼanra xíʼin na̱ migora. Koto nu̱ú na̱ʼná yóʼo, tá ki̱xa̱a̱ ta̱ Pedro ta̱ Cornelio xi̱kuxítíra nu̱úra. Soo ta̱ Pedro káchira xíʼinra: ʼKundichi, kǒo kuxítíún nu̱íi̱ chi ta̱a táʼan miívaún kúi̱ʼ. Ña̱ Biblia káʼa̱nña ña̱ va̱ása va̱ʼa kuxítíyó ta ndasakáʼnuyó iin na̱ yiví. Iinlá Jehová kúú ta̱ xíniñúʼu ndasakáʼnuyó.

Ta̱ Pedro ki̱xaʼára nátúʼunra xa̱ʼa Tu̱ʼun Ndióxi̱ xíʼinna. ʼVitin kúnda̱a̱-inii̱ va̱ʼa ndiʼi na̱ yiví ña̱ kachíñuna nu̱ú Ndióxi̱ʼ, káchira. Tá káʼa̱nkara, Ndióxi̱ chi̱ndaʼára espíritu yi̱i̱ra ki̱xa̱a̱ña, ta na̱ yiví yóʼo ki̱xaʼána káʼa̱nna inka tu̱ʼun. Iin nda̱kanda̱-ini na̱ discípulo na̱ ñuu Judá na̱ ki̱xa̱a̱ xíʼin ta̱ Pedro tá xi̱nina ña̱yóʼo. Vitin na̱kunda̱a̱-inina, ndiʼi na̱ yiví va̱ʼa nu̱ú Ndióxi̱. Miíyó ná kǒo nandosó-iniyó xa̱ʼa ña̱yóʼo.