HISTORIA 108
Yichi̱ ku̱a̱ʼa̱n chí ñuu Damasco
¿Á XÍNI̱ÚN ndáa ta̱ kúú ta̱ ndu̱va nu̱ú ñuʼú yóʼo? Ta̱ Saulo kúúra. Ta̱yóʼo kúú ta̱ xi̱ndaa ti̱ko̱to̱ na̱ ku̱un yu̱u̱ ta̱ Esteban. Koto ñuʼu̱ ña̱ ndáye̱ʼe̱ yóʼo. ¿Ndachun ndáye̱ʼe̱ña?
Tándi̱ʼi ni̱xi̱ʼi̱ ta̱ Esteban, ta̱ Saulo ku̱a̱ʼa̱nra nandukúra na̱ ndíku̱n sa̱tá ta̱ Jesús ña̱ kundiva̱ʼara xíʼinna. Kíʼvira veʼena ta távárana ku̱a̱ʼa̱nna xíʼinra ña̱ kuñuʼuna veʼeka̱a. Ku̱a̱ʼání na̱ discípulo xi̱nuna ku̱a̱ʼa̱nna inka ñuu, ta nu̱ú ku̱a̱ʼa̱nna kán nátúʼunna xa̱ʼa Tu̱ʼun Ndióxi̱. Soo ta̱ Saulo ku̱a̱ʼa̱nra chí inka ñuu nándukúrana. Ta vitin ku̱a̱ʼa̱nra chí ñuu Damasco. Soo, yichi̱ íyo iin ña̱ ndo̱ʼora:
Iin kama, nda̱ye̱ʼe̱ ñuʼu̱ chí ndiví nu̱úra. Koto nu̱ú na̱ʼná, ta̱yóʼo ndu̱vara nu̱ú ñuʼú. Tasaá xi̱niso̱ʼora ni̱ka̱ʼa̱n iinna chí ndiví, ta káchina: ʼSaulo, Saulo, ¿ndachun íxandi̱va̱ʼún xíʼi̱n?ʼ Na̱ yiví na̱ ku̱a̱ʼa̱n xíʼinra xi̱nina nda̱ye̱ʼe̱ ñuʼu̱ yóʼo ta xi̱niso̱ʼotuna ña̱ ni̱ka̱ʼa̱nna, soo kǒo níkunda̱a̱-inina xíʼinña.
ʼ¿Yukú kúú yóʼó?ʼ, káchi ta̱ Saulo.
ʼTa̱ Jesús kúi̱, ta̱ íxandi̱va̱ʼún xíʼi̱nʼ, káchira. Ña̱yóʼo kúni̱ kachiña xíʼin mií ta̱ Jesús íxandi̱va̱ʼa ta̱ Saulo tá íxandi̱va̱ʼara xíʼin iin na̱ ndíku̱n sa̱tá ta̱ Jesús.
Ta̱ Saulo ndáka̱tu̱ʼunra: ʼ¿Ndáaña xíniñúʼu keʼíi̱ vitin?ʼ
ʼKuaʼán ta ki̱ʼviún ñuu Damasco, kán ka̱ʼi̱n xíʼún ndáaña keʼúnʼ, káchi ta̱ Jesús xíʼinra. Tá nda̱kundichi ta̱ Saulo kǒo túvika nu̱úra. Ña̱kán na̱ ku̱a̱ʼa̱n xíʼinra ti̱inna ndaʼa̱ra ku̱a̱ʼa̱nra chí ñuu Damasco.
Ta vitin ta̱ Jesús ni̱ka̱ʼa̱nra xíʼin iin ta̱ discípulo ta̱ íyo ñuu Damasco: ʼAnanías, kuaʼán chí calle ña̱ naní Recta, veʼe ta̱ Judas, ta kán nda̱ka̱tu̱ʼún xa̱ʼa iin ta̱ naní Saulo. Chi yi̱ʼi̱ nda̱ka̱xin ta̱yóʼo ña̱ kachíñura nu̱íi̱ʼ.
Ta̱ Ananías ka̱ndíxara ta ki̱tara ku̱a̱ʼa̱nra. Tá ni̱xa̱a̱ra nu̱ú ta̱ Saulo chi̱núura ndaʼa̱ra xi̱níra, ta ni̱ka̱ʼa̱nra xíʼinra: ʼTa̱ Jesús chi̱ndaʼá yi̱ʼi̱ va̱xii̱ ña̱ va̱ʼa ndaʼa nu̱ún ta ndakiʼún espíritu yi̱i̱ Ndióxi̱ʼ. Iin kama nda̱ʼava nu̱úra.
Va̱ʼaní chiñu kéʼé ta̱ Saulo chi ku̱a̱ʼání na̱ yiví na̱ inka ñuu nátúʼunra xíʼin xa̱ʼa Tu̱ʼun Ndióxi̱. Ta nda̱kunaníra ta̱ apóstol Pablo, chí nu̱ú loʼoka sakuaʼayó xa̱ʼara. Soo vitin ná kotoyó ndáaña ni̱ka̱ʼa̱n Ndióxi̱ xíʼin ta̱ Pedro keʼéra.
