¿ÁXÍNI̱ÚN ndáa libro kúú ña̱ káʼvi ñá loʼo yóʼo xíʼin na̱ migoñá? Káʼviñá libro loʼo ña̱ káʼviún yóʼo... Historia ña̱ va̱xi nu̱ú Biblia. Ta historia ña̱ káʼviún yóʼo káʼvina... “¿Ndáaña keʼéyó ña̱ va̱ʼa kooyó ndiʼi tiempo?”

¿Á xíni̱ún ndáaña sakuaʼana xa̱ʼa? Siʼna sákuaʼayó xa̱ʼa Jehová xíʼin xa̱ʼa se̱ʼera ta̱ Jesús ña̱ va̱ʼa kooyó ndiʼi tiempo. Ña̱ Biblia káʼa̱nña: ʼÑa̱yóʼo kúú yichi̱ ña̱ va̱ʼa xa̱a̱yó kooyó ndiʼi tiempo. Ná sakuaʼayó xa̱ʼa Ndióxi̱ míí ta̱ nda̱a̱ xíʼin xa̱ʼa se̱ʼera, ta̱ Jesúsʼ.

¿Ndáaña xíniñúʼu keʼéyó ña̱ va̱ʼa sákuaʼayó xa̱ʼa Jehová xíʼin xa̱ʼa se̱ʼera? Iin ña̱ xíniñúʼu keʼéyó kúú ña̱ kaʼviyó libro yóʼo nda̱a̱ nu̱ú kíxaʼáña iin saá nda̱a̱ nu̱ú ndíʼiña. Ña̱ libro yóʼo nátúʼunña xa̱ʼa Jehová xíʼin xa̱ʼa ta̱ Jesús. Ta saátu nátúʼunña xa̱ʼa ña̱ʼa ña̱ xa̱ke̱ʼéna xíʼin xa̱ʼa ña̱ keʼéna chi nu̱únínu. Soo íyo inka libro kaʼviyó.

Koto inka libro ña̱ níndúʼu yóʼo. Ña̱ Biblia kúúña. Ka̱ʼa̱n xíʼin iinna ná káʼvina texto ña̱ va̱xi nu̱ú Biblia nu̱ú va̱xi iin iin historia yóʼo nu̱ún. Nu̱ú Biblia va̱xi ndiʼi ña̱ xíniñúʼuyó kunda̱a̱-iniyó xa̱ʼa Jehová ña̱ va̱ʼa ndasakáʼnuyóra táki̱ʼva kúni̱ miíra, tasaá xa̱a̱yó kooyó ndiʼi tiempo. Xa̱ʼa ña̱yóʼo ná chi̱ka̱a̱kayó ndée ña̱ kaʼviníyó Biblia.

Soo su̱ví kuití xa̱ʼa Jehová xíʼin xa̱ʼa ta̱ Jesús xíniñúʼu sakuaʼayó. Ni ku̱a̱ʼáníva ña̱ʼa xa̱xíni̱yó xa̱ʼa na̱yóʼo xíʼin xa̱ʼa ña̱ sánáʼa̱na, kǒo kúni̱ kachiña xa̱koovíyó ndiʼi tiempo. ¿Á xíni̱ún ndáaña xíniñúʼu keʼékayó?

Xíniñúʼu keʼéyó ña̱ káʼa̱n Biblia. ¿Á ndákaʼún xa̱ʼa ta̱ Judas Iscariote? Ta̱ Jesús nda̱ka̱xinra ta̱yóʼo ña̱ kuura iin apóstol xíʼin inka 11 na̱ apóstol. Xa̱xíni̱níra xa̱ʼa Jehová xíʼin xa̱ʼa ta̱ Jesús. Soo, ¿ndáaña ke̱ʼéra? Tá ni̱ya̱ʼa tiempo, su̱ví ña̱ va̱ʼa níkeʼéra chi ta̱xira ta̱ Jesús ndaʼa̱ na̱ sáa̱-ini xíniñaʼá xa̱ʼa 30 xu̱ʼún ña̱ plata. Ta̱ Judas kǒo ndatakura ña̱ xa̱a̱ra koora ndiʼi tiempo.

¿Á ndákaʼún xa̱ʼa ta̱ Guehazí, ña̱ Historia 69? Ta̱yóʼo ni̱kutóora xi̱nira ti̱ko̱to̱ xíʼin xu̱ʼún inkana. Sa̱ndáʼvirana ña̱ taxina ña̱ ndaʼa̱ra, ta Jehová ta̱xira castigo ndaʼa̱ra xa̱ʼa ña̱yóʼo. Tá ndo̱ʼo ta̱yóʼo saá ndoʼoyó tá kǒo kándíxayó ña̱ káʼa̱n Tu̱ʼun Ndióxi̱.

Soo ni̱xi̱yo ku̱a̱ʼáka na̱ yiví na̱ ndinuʼu-ini ka̱chíñu nu̱ú Jehová. Ná kooyó táki̱ʼva ni̱xi̱yo na̱yóʼo. ¿Á ndákaʼún xa̱ʼa ña̱ sa̱kuaʼayó nu̱ú historia 55 xa̱ʼa ta̱ loʼo Samuel? Ta̱yóʼo va̱ʼaní yichi̱ nda̱koora nu̱úyó, sa̱kán ku̱mí á u̱ʼu̱nva ku̱i̱ya̱ ndíka̱a̱ra tá ki̱xaʼára káchíñura ini templo nu̱ú Jehová. Xa̱ʼa ña̱yóʼo ni loʼovaún, kiviva kachíñún nu̱ú Jehová.

Koto nu̱ú ña̱ historia 87. Ndiʼiyó kúni̱yó keʼéyó táʼan ña̱ ke̱ʼé ta̱ Jesús. Ni loʼovara, na̱túʼunra xa̱ʼa Yivára xíʼin na̱ yiví tá ni̱xa̱ʼa̱nra ini templo. Ná keʼéyó táʼan ña̱ ke̱ʼéra. Ná natúʼunyó xíʼin ndiʼi na̱ yiví xa̱ʼa Jehová xíʼin xa̱ʼa ta̱ Jesús. Tá ná keʼéyó ndiʼi ña̱yóʼo, kivi xa̱a̱yó kooyó nu̱ú ñuyǐví xa̱á ndiʼi tiempo.