1, 2. ¿Ndáa na̱ kivi kundaa miíyó tiempo vitin?

NDAKANIXI̱NÍ ña̱ ku̱a̱ʼún chí yichi̱ ta iin kama ki̱xáʼa ndátaka vi̱kó ta ndu̱naá chí ndiví. Ta ki̱xáʼa káni taxa chí ndiví ta ndeéní ndáʼyi̱ sa̱vi̱, tasaá ndeéní ki̱xáʼa kúun sa̱vi̱. Tasaá xínún ku̱a̱ʼún nandukún nu̱ú kusáviún, ta ni̱kusi̱íkaví-iniún tá nda̱ni̱ʼún nu̱ú kusáviún.

² Ta ki̱ʼva saá káa tiempo ña̱ ndóoyó vitin chi íyoní ña̱ kini. Ña̱kán sana ndákanixi̱níún: “¿Ndáa na̱ kivi kundaa miíyó?”. Iin ta̱ ka̱ʼyí Biblia ni̱ka̱ʼa̱nra ña̱yóʼo: “Ka̱ʼi̱n xíʼin Jehová: ‘Yóʼó kúú Ndióxi̱ miíi̱ ta ndáún yi̱ʼi̱, ta yi̱ʼi̱ kándíxai̱ yóʼóʼ” (Salmo 91:2). Jehová kivi chindeétáʼanra xíʼinyó ña̱ ya̱ʼayó nu̱ú tu̱ndóʼo ña̱ kúúmiíyó tiempo vitin, ta chí nu̱únínu taxira iin ña̱ va̱ʼaníka ndaʼa̱yó.

3. ¿Ndáaña xíniñúʼu keʼéyó ña̱ va̱ʼa chindeétáʼan Jehová xíʼinyó?

³ ¿Ndáa ki̱ʼva ndáa Jehová miíyó? Jehová kivi chindeétáʼanra xíʼinyó ña̱ ya̱ʼayó nu̱ú nda̱a̱ ndáaka tu̱ndóʼo ña̱ kúúmiíyó. Ta saátu ndakúníkara nu̱ú ndiʼi na̱ yiví na̱ kúni̱ saxóʼvi̱ miíyó. Tá xóʼvi̱yó tiempo vitin, kivi kandíxayó ña̱ sandíʼi-xa̱ʼa̱ Jehová ndiʼi ña̱yóʼo chí nu̱únínu. Ña̱ Biblia káchiña, ña̱ xíniñúʼu ndakundeéyó kuʼvi̱-iniyó kuniyó Ndióxi̱ (Judas 21). Ña̱ va̱ʼa chindeétáʼan Jehová xíʼinyó ña̱ ya̱ʼayó nu̱ú tu̱ndóʼo, xíniñúʼu ndakundeéyó kutáʼan viíyó xíʼinra. Soo, ¿ndáa ki̱ʼva kivi keʼéyó ña̱yóʼo?

4, 5. ¿Ndáa ki̱ʼva náʼa̱ Jehová ña̱ kúʼvi̱ní-inira xínira miíyó?

⁴ Ña̱ va̱ʼa ndakundeéyó kooyó migo Jehová, xíniñúʼu kunda̱a̱-iniyó ña̱ kúʼvi̱ní-inira xínira miíyó. Ndakanixi̱ní xa̱ʼa̱ ndiʼi ña̱ xa̱a̱ ke̱ʼé Jehová xa̱ʼa̱yó. Ta̱xira iin ñuʼú nu̱ú ndóoyó, nu̱ú íyoní planta xíʼin kití tí liviní. Ta saátu ta̱xira ku̱a̱ʼání ña̱ʼa ña̱ ya̱si̱n kuxuyó ta saátu ku̱a̱ʼání ti̱kui̱í. Saátu sa̱náʼa̱ Jehová miíyó nu̱ú Biblia ndáa ña̱ kúú ki̱vi̱ra, ta ndáa Ndióxi̱ kúúra. Soo inka ña̱ ke̱ʼéra ña̱ ni̱na̱ʼa̱ra ña̱ kúʼvi̱ní-inira xínira miíyó, kúú ña̱ chi̱ndaʼára se̱ʼera ta̱ Jesús ta̱ kúʼvi̱ní-inira xínira ki̱xira ni̱xi̱ʼi̱ra xa̱ʼa̱yó (Juan 3:16). Tíxa̱ʼvi ña̱ ni̱xi̱ʼi̱ ta̱ Jesús xa̱ʼa̱yó, va̱ʼaní ña̱ ndátuyó ndakiʼinyó chí nu̱únínu.

⁵ Jehová chi̱ndúʼúra iin Reino chí ndiví nu̱ú xáʼndachíñu ta̱ Mesías. Ta si̱lóʼo kúma̱ní ta ña̱ Reino yóʼo sandíʼi-xa̱ʼa̱ña ndiʼi tu̱ndóʼo ta ndasaliviña nu̱ú ñuʼú yóʼo, tasaá kivi kutakuyó ndiʼi tiempo ta si̱íní kundooyó (Salmo 37:29). Saátu xa̱ʼa̱ ña̱ kúʼvi̱ní-ini Jehová xínira miíyó sánáʼa̱ra miíyó ndáa ki̱ʼva si̱íka kutakuyó. Ta káʼa̱ntura xíʼinyó ña̱ ná ka̱ʼa̱nyó xíʼinra ta íyo tu̱ʼvara ña̱ kuniso̱ʼora miíyó. Nda̱a̱ táki̱ʼva xa̱a̱ na̱kunda̱a̱-iniyó, Jehová ndixa kúʼvi̱ní-inira xínira ndiʼiyó.

6. ¿Ndáaña xíniñúʼu keʼún tá ná kiʼún kuenta ña̱ kúʼvi̱ní-ini Jehová xínira yóʼó?

⁶ Tá xítoún ndiʼi ña̱ va̱ʼa ña̱ ke̱ʼé Jehová xa̱ʼún ta saátu ña̱ kúʼvi̱ní-inira xínira yóʼó, ¿ndáaña ndóʼún? ¿Á su̱ví ña̱ nda̱a̱ kúú ña̱ táxiníún tíxa̱ʼvi ndaʼa̱ra? Soo xíniñúʼu na̱ʼún ña̱ ndixa táxiún tíxa̱ʼvi ndaʼa̱ra. Nu̱ú ñuyǐví yóʼo íyo ku̱a̱ʼání na̱ yiví na̱ va̱ása táxika tíxa̱ʼvi. Ta saátu xi̱keʼéna tá tiempo ña̱ ni̱xi̱yo ta̱ Jesús. Iin yichi̱, ta̱ Jesús sa̱ndáʼara 10 na̱ ta̱a na̱ xi̱kuumií kue̱ʼe̱ lepra, soo iinlá kuití kúú ta̱ ta̱xi tíxa̱ʼvi ndaʼa̱ra xa̱ʼa̱ ña̱ sa̱ndáʼarara (Lucas 17:12-17). Miíyó kúni̱yó keʼéyó  nda̱a̱ táki̱ʼva ke̱ʼé ta̱ ta̱a kán, ta ndiʼi tiempo na̱ʼa̱yó ña̱ táxiyó tíxa̱ʼvi ndaʼa̱ Jehová.

7. ¿Ndáa ki̱ʼva xíniñúʼu kuʼvi̱-iniyó kuniyó Jehová?

⁷ Ta saátu xíniñúʼu kuʼvi̱ní-iniyó kuniyó Jehová. Ta̱ Jesús ni̱ka̱ʼa̱nra xíʼin na̱ discípulora ña̱ xíniñúʼu kuʼvi̱-inina kunina Jehová xíʼin ndiʼi níma̱na, xíʼin ndiʼi ña̱ tákuna ta saátu xíʼin ndiʼi xi̱nína (kaʼvi Mateo 22:37). ¿Ndáaña kúni̱ kachi ña̱yóʼo?

8, 9. ¿Ndáa ki̱ʼva náʼa̱yó nu̱ú Jehová ña̱ kúʼvi̱ní-iniyó xíniyóra?

⁸ Ta va̱ása xíniñúʼu ka̱ʼa̱n kuitíyó ña̱ kúʼvi̱-iniyó xíniyó Jehová. Chi tá kúʼvi̱-iniyó xíniyó Jehová xíʼin ndiʼi níma̱yó, xíʼin ndiʼi ña̱ tákuyó ta saátu xíʼin ndiʼi xi̱níyó, na̱ʼa̱yóña xíʼin ña̱ kéʼéyó (Mateo 7:16-20). Ña̱ Biblia káxiní káʼa̱nña, ña̱ tá kúʼvi̱-iniyó xíniyó Jehová kuniso̱ʼoyó ndiʼi ña̱ káʼa̱nra xíʼinyó. Ta, ¿á yo̱ʼvi̱ní keʼéyó ña̱yóʼo? Va̱ása, saáchi ndiʼi ña̱ káʼa̱n Jehová xíʼinyó keʼéyó va̱ása yo̱ʼvi̱ña (kaʼvi 1 Juan 5:3).

⁹ Tá xíniso̱ʼoyó ndiʼi ña̱ káʼa̱n Jehová xíʼinyó, si̱íníka ndóoyó (Isaías 48:17, 18). Soo, ¿ndáaña chindeétáʼan xíʼinyó ña̱ va̱ʼaka kooyó migora? Ná ka̱ʼa̱nyó xa̱ʼa̱ña.

10. ¿Nda̱chun xíniñúʼu ndakundeékaún sakuaʼún xa̱ʼa̱ Jehová?

¹⁰ ¿Ndáa ki̱ʼva ni̱xa̱ún ku̱ún migo Jehová? Tá ki̱xáʼún káʼviún Biblia, ni̱xa̱ún na̱kunda̱a̱ va̱ʼa iniún xa̱ʼa̱ Jehová tasaá ni̱xa̱ún kítáʼún xíʼinra. Ta ña̱ kítáʼún xíʼin Jehová nda̱a̱ táki̱ʼva íyo ñuʼu̱ saá íyoña, chi ña̱ va̱ʼa kǒo nda̱ʼva̱ ña̱ ñuʼu̱ yóʼo xíniñúʼu taánkaún titu̱n nu̱úña. Ña̱yóʼo kúni̱ kachiña ña̱ xíniñúʼu ndakundeékaún sakuaʼún xa̱ʼa̱ Jehová ña̱ va̱ʼa ndakúka koo ña̱ kítáʼún xíʼinra (Proverbios 2:1-5).

11. ¿Ndáaña kivi ndoʼún xíʼin ña̱ sákuaʼún nu̱ú Biblia?

¹¹ Tá ná ndakundeékaún kaʼviún Biblia, xa̱ún sakuaʼún ku̱a̱ʼání ña̱ʼa ta nda̱a̱ níma̱ún xa̱a̱ ña̱yóʼo. Koto ndáa ña̱ ndo̱ʼo u̱vi̱ na̱ discípulo ta̱ Jesús tá na̱túʼunra xíʼinna ndáa ña̱ kúni̱  kachi sava profecía. Na̱yóʼo ka̱china: “¿Á su̱ví nda̱a̱ níma̱yó ni̱xa̱a̱ ña̱ na̱túʼunra xíʼinyó tá va̱xiyó chí yichi̱, tá káxiní nda̱kanira tu̱ʼun Ndióxi̱ nu̱úyó?” (Lucas 24:32).

12, 13. a) ¿Á kivi xa̱a̱yó sandákooyó ña̱ kuʼvi̱-iniyó kuniyó Ndióxi̱? b) ¿Ndáaña xíniñúʼu keʼéyó ña̱ va̱ʼa kuʼvi̱ka-iniyó kuniyó Jehová?

¹² Ña̱ sa̱náʼa̱ ta̱ Jesús na̱ u̱vi̱ discípulora, nda̱a̱ níma̱na ni̱xa̱a̱ña. Sana saátu ni̱kusi̱íní-ini miíún tá ki̱xáʼún kúnda̱a̱-iniún xa̱ʼa̱ ña̱ káʼa̱n Biblia. Ta tíxa̱ʼvi ña̱yóʼo, va̱ʼa ni̱xa̱ún na̱kunda̱a̱-iniún xa̱ʼa̱ Jehová ta ni̱xa̱ún kúʼvi̱-iniún xíniúnra. Ta va̱ása kúni̱ún sandákoún ña̱ kuʼvi̱-iniún kuniúnra (Mateo 24:12).

¹³ Ta xa̱ʼa̱ ña̱ xa̱a̱ ni̱xa̱ún kúún migo Jehová xíniñúʼu chika̱ún ndee̱ ña̱ va̱ʼa ndakúka koo ña̱ kítáʼún xíʼinra. Ta ña̱ va̱ʼa ndakúka kooña, xíniñúʼu ndakundeékaún sakuaʼún xa̱ʼa̱ra ta saátu xa̱ʼa̱ se̱ʼera ta̱ Jesús. Ta saátu xíniñúʼu ndakanixi̱níún xa̱ʼa̱ ña̱ sákuaʼún, saátu ndáa ki̱ʼva keʼún ña̱ káʼa̱nña (Juan 17:3). Tá káʼviún Biblia ndakanixi̱ní xa̱ʼa̱ ña̱yóʼo:  “¿Ndáaña sánáʼa̱ ña̱yóʼo yi̱ʼi̱ xa̱ʼa̱ Jehová? ¿Nda̱chun xíniñúʼu kuʼvi̱-inii̱ kunii̱ra xíʼin ndiʼi níma̱i̱ ta saátu xíʼin ndiʼi ña̱ tákui̱?” (1 Timoteo 4:15).

14. ¿Ndáa ki̱ʼva chíndeétáʼan ña̱ oración xíʼinyó ña̱ va̱ʼa xa̱a̱yó kuʼvi̱níka-iniyó kuniyó Jehová?

¹⁴ Tá yóʼó íyo iin na̱ migoún sana káʼa̱n ni̱ʼún xíʼinna. Ta xa̱ʼa̱ ña̱ kéʼún ña̱yóʼo va̱ʼaníka xáún kítáʼún xíʼinna. Ta ki̱ʼva saátu íyo ña̱ kítáʼanyó xíʼin Jehová tá káʼa̱n ni̱ʼiyó xíʼinra (kaʼvi 1 Tesalonicenses 5:17). Ta ña̱ va̱ʼa káʼa̱nyó xíʼinra iin regalo ña̱ ta̱xira ndaʼa̱yó kúúña. Ña̱kán, ndiʼi tiempo xíniñúʼu ka̱ʼa̱nyó xíʼinra xíʼin ndiʼi níma̱yó (Salmo 62:8). Va̱ása xíniñúʼu sakuaʼa xíʼin xi̱níyó ña̱ ka̱ʼa̱nyó xíʼin Jehová, chi nda̱a̱ níma̱yó xíniñúʼu kana ña̱ ka̱ʼa̱nyó. Tá ná ndakundeéyó kaʼviyó Biblia ta ka̱ʼa̱nyó xíʼinra xíʼin ndiʼi níma̱yó, xa̱a̱yó kuʼvi̱níka-iniyó kuniyóra.

15, 16. ¿Ndáaña ndákanixi̱níún xa̱ʼa̱ ña̱ predicación?

¹⁵ Ña̱ va̱ʼa ndakundeéyó kooyó migo Jehová, xíniñúʼu ka̱ʼa̱nyó xíʼin inkana xa̱ʼa̱ ña̱ kándíxayó. Ta iin ña̱ va̱ʼaní kúú ña̱ ka̱ʼa̱nyó xíʼin inkana xa̱ʼa̱ Jehová (Lucas 1:74). Ta saátu iin chiñu ña̱ ndáyáʼviní ña̱ ta̱xi ta̱ Jesús ndaʼa̱ ndiʼi na̱ ndásakáʼnu Ndióxi̱ kúú ña̱yóʼo. Xa̱ʼa̱ ña̱yóʼo, ndiʼiyó xíniñúʼu natúʼun xa̱ʼa̱ Reino Ndióxi̱ xíʼin na̱ yiví. ¿Á xa̱a̱ ki̱xáʼún kéʼún ña̱yóʼo? (Mateo 24:14; 28:19, 20).

¹⁶ Nu̱ú ta̱ apóstol Pablo xi̱ndayáʼviní ña̱ predicación, xa̱ʼa̱ ña̱kán ni̱ka̱ʼa̱nra ña̱ kúúña iin chiñu ña̱ ndáyáʼviní (2 Corintios 4:7). Iin ña̱ ndáyáʼviní ña̱ kivi keʼún kúú ña̱ ka̱ʼún xíʼin inkana xa̱ʼa̱ Jehová ta saátu xa̱ʼa̱ ña̱ kúni̱ra. Ta nu̱ú miíra kúú ña̱ káchíñún tá ku̱a̱ʼún nátúʼún xíʼin na̱ yiví xa̱ʼa̱ra, ta chíndayáʼviníra chiñu ña̱ kéʼún nu̱úra (Hebreos 6:10). Tá ku̱a̱ʼún nátúʼún xíʼin na̱ yiví, chíndeétáʼún xíʼinna ña̱ xa̱a̱na koona migo Jehová tasaá ndúndakúka ña̱ kítáʼún xíʼinra.  Ta tíxa̱ʼvi ña̱yóʼo, kivi ndakiʼún ña̱ kutakún ndiʼi tiempo ta saátu na̱ xíniso̱ʼo ña̱ káʼún kivi ndakiʼinna ña̱yóʼo (kaʼvi 1 Corintios 15:58). ¿Á íyo inkaka chiñu ña̱ kivi sakúsi̱í-iniún?

17. ¿Nda̱chun iin chiñu númi̱ kúú ña̱ ku̱ʼu̱nyó natúʼunyó xíʼin na̱ yiví?

¹⁷ Ña̱ ku̱ʼu̱nyó natúʼunyó xíʼin na̱ yiví iin chiñu númi̱ kúú ña̱yóʼo. Ña̱ Biblia káchiña: “Ka̱ʼa̱n xíʼinna xa̱ʼa̱ tu̱ʼun Ndióxi̱, ña̱yóʼo kundi̱ʼi̱ka-iniún xa̱ʼa̱” (2 Timoteo 4:2). Na̱ yiví xíniñúʼu kuniso̱ʼona tu̱ʼun va̱ʼa ña̱ káʼa̱n xa̱ʼa̱ Reino Ndióxi̱. Ta saátu káchi ña̱ Biblia: “Ña̱ ki̱vi̱ káʼnu Jehová xa̱a̱ yatin va̱xiña. Xa̱a̱ yatin va̱xiña, ta kamaní va̱xiña”. Ta ña̱ ndiʼi-xa̱ʼa̱ na̱ ñuyǐví yóʼo “va̱ása kuku̱a̱chi̱ña” (Sofonías 1:14; Habacuc 2:3). Si̱lóʼo kúma̱ní ta sandíʼi-xa̱ʼa̱ Jehová ñuyǐví ta̱ Ndi̱va̱ʼa. Tá kúma̱níka kuu ña̱yóʼo, xíniñúʼu chindeétáʼanyó xíʼin na̱ yiví ña̱ va̱ʼa ndasakáʼnuna Jehová.

18. ¿Nda̱chun xíniñúʼu ndakutáʼanyó ña̱ va̱ʼa ndasakáʼnuyó Jehová?

¹⁸ Jehová kúni̱ra ña̱ ndiʼi na̱ káchíñu nu̱úra ná ndakutáʼanna ña̱ ndasakáʼnunara. Ña̱ Biblia káchiña: “Ná kundi̱ʼi̱-iniyó xa̱ʼa̱ táʼanyó ta ná kuʼvi̱ka-iniyó kunitáʼanyó ta keʼéyó ña̱ va̱ʼa xíʼin táʼanyó, ta kǒo sandákooyó ña̱ ndatakayó nda̱a̱ táki̱ʼva kéʼé inkana. Va̱ʼaka ná chika̱a̱yó ndee̱ xíʼin táʼanyó, saáchi kúnda̱a̱-iniyó ña̱ xa̱a̱ ku̱yatin kixaa̱ ki̱vi̱” (Hebreos 10:24, 25). Xíniñúʼu chika̱a̱níyó ndee̱ ña̱ va̱ʼa ku̱ʼu̱nyó ndiʼi reunión, ta kán kúú nu̱ú kivi chika̱a̱yó ndee̱ xíʼin táʼanyó.

19. ¿Ndáaña chindeétáʼan xíʼinyó ña̱ kuʼvi̱ka-iniyó kuniyó na̱ hermano?

¹⁹ Ta ti̱xin reunión kúú nu̱ú kivi ndani̱ʼún na̱ koo migoún. Ta na̱yóʼo kivi chindeétáʼanna xíʼún ña̱ kachíñún nu̱ú Jehová. Ta saátu xa̱ún kuxini̱ún na̱ hermano na̱ xa̱a̱ síín ñuu, na̱ chíka̱a̱ní ndee̱ ña̱ kachíñuna nu̱ú Jehová. Xa̱ʼa̱ ña̱ ndiʼiyó kúúyó na̱ yiví ku̱a̱chi, sava yichi̱ na̱ hermanoyó kivi keʼéna iin ña̱ va̱ása va̱ʼa. Tá saá ná kuu, ná ixakáʼnu-iniyó xa̱ʼa̱na (kaʼvi Colosenses 3:13). Ta chika̱ún ndee̱ ña̱ kiʼún kuenta ndáa ña̱ va̱ʼa kúú ña̱ kúúmií na̱ hermano.  Ta ña̱yóʼo chindeétáʼanña xíʼún ña̱ kuʼvi̱ka-iniún kuniúnna tasaá ndundakúka ña̱ kítáʼún xíʼin Jehová.

20, 21. ¿Ndáa ki̱ʼva koo ña̱ kutakuyó chí nu̱únínu?

²⁰ Jehová kúni̱ra ña̱ ndiʼi na̱ kúú migora va̱ʼaní ná koona. Ña̱ Biblia sánáʼa̱ña miíyó ña̱ chí nu̱únínu va̱ʼaníka koo ña̱ kutakuyó.

²¹ Ta chí nu̱únínu kúú ña̱ kutakuyó ndiʼi tiempo, ta su̱ví kuití 70 á 80 ku̱i̱ya̱ kooyó. Chi ndiʼi tiempo kutakuyó nu̱ú iin ñuʼú livi, tasaá va̱ása kookayó na̱ yiví ku̱a̱chi ta si̱íní kundooyó. Ña̱ Biblia káʼa̱nña, ña̱ saá kúú ña̱ kundooyó nda̱a̱ táki̱ʼva xi̱kuni̱ mií Jehová tá xa̱ʼa̱. Jehová káʼa̱nra taxira ña̱yóʼo ndaʼa̱yó, soo xíniñúʼu chika̱a̱yó ndee̱ ña̱ va̱ʼa ndakiʼinyóña (1 Timoteo 6:12, 19).

22. a) ¿Ndáa ki̱ʼva kivi xa̱a̱yó kutakuyó nda̱a̱ táki̱ʼva xi̱kuni̱ Jehová tá xa̱ʼa̱? b) ¿Nda̱chun va̱ása kivi ndakiʼinyó ña̱ kutakuyó ndiʼi tiempo xa̱ʼa̱ ña̱ chíka̱a̱níyó ndee̱?

²² ¿Ndáa ki̱ʼva kivi xa̱a̱yó kutakuyó nda̱a̱ táki̱ʼva xi̱kuni̱ Jehová tá xa̱ʼa̱? Xíniñúʼu chika̱a̱yó ndee̱ ña̱ keʼéyó ña̱ va̱ʼa (1 Timoteo 6:18). Ña̱yóʼo kúni̱ kachiña ña̱ xíniñúʼu keʼéyó ña̱ sákuaʼayó nu̱ú Biblia. Soo su̱ví xa̱ʼa̱ ña̱ chíka̱a̱níyó ndee̱ kúú ña̱ ndakiʼinyó ña̱ kutakuyó ndiʼi tiempo. Chi iin regalo ña̱ taxi Jehová ndaʼa̱ na̱ nda̱kú íyo ini xíʼinvara kúú ña̱yóʼo (Romanos 5:15). Yiváyó ta̱ íyo chí ndiví xíʼin ndiʼi níma̱ra kúni̱ra taxira ña̱ regalo yóʼo ndaʼa̱ na̱ káchíñu nu̱úra.

23. ¿Nda̱chun xíniñúʼu ndaka̱xin viíún ña̱ keʼún vitin?

²³ Ndakanixi̱ní xa̱ʼa̱ ña̱yóʼo: “¿Á ndásakáʼnui̱ Ndióxi̱ nda̱a̱ táki̱ʼva kúni̱ miíra?”. Tá ki̱ʼún kuenta ña̱ xíniñúʼu nasamaún savaka ña̱ kéʼún, ndi̱ku̱n keʼún ña̱yóʼo. Tá kándíxayó Jehová ta chíka̱a̱yó ndee̱ ña̱ keʼéyó ña̱ káʼa̱nra, ndáara miíyó. Jehová kundaara na̱ nda̱kú íyo ini káchíñu nu̱úra tá ná ndiʼi-xa̱ʼa̱ ña̱ íyo nu̱ú ñuyǐví yóʼo. Tándi̱ʼi taxira ña̱  kooyó ndiʼi tiempo nu̱ú iin ñuʼú livi, nda̱a̱ táki̱ʼva ni̱ka̱ʼa̱nra xíʼinyó. Tá ná ndaka̱xin viíún ña̱ keʼún vitin, va̱ʼa xa̱ún kutakún ndiʼi tiempo.